Lebiyliler 21 bob
1 Jaratqan İye Muwsag'a bılay dedi: – Xaronnın' ulları bolg'an ruwxaniylerge bılay dep ayt: «Ruwxaniylerdin' hesh biri o'z ag'ayinlerinin' arasındag'ı bir marhumg'a jantasıp, o'zin haramlamasın.
2 Al eger de marhum o'zinin' jaqın tuwg'anı: anası, a'kesi, ulı, qızı, ag'a-inisi yamasa
3 u'yindegi turmısqa shıqpag'an a'japa-qarındası bolsa, onda onın' o'ligine jantasıp, o'zin haramlawı mu'mkin.
4 Biraq qa'yin jurtı ta'repinen birew qaytıs bolsa, sol sebepli o'zin haramlamasın.
5 Ruwxaniyler aza tutqanda shashın qırdırıp, saqallarının' ushların qırqtırmasın ha'm denelerin tilip jaraqatlamasın.
6 Olar Qudayı ushın muxaddes bolsın, Qudayının' atına til tiygizbesin. Olar Jaratqan İyege arnalg'an, yag'nıy Qudayına awqat sıpatında berilgen sıylardı usıng'anı ushın muxaddes bolsın.
7 Ruwxaniyler buzıq yamasa zorlang'an hayallarg'a ha'm ajırasqan hayallarg'a u'ylenbewi tiyis. Sebebi ruwxaniy Quday ushın muxaddes.
8 Qudayın'ızg'a awqat sıpatında berilgen sıylardı usınatug'ın ruwxaniyler bolg'anlıqtan, sizler de olardı muxaddes sanap, hu'rmet qılın'. Ol sizler ushın muxaddes. O'ytkeni Men sizlerdi O'zime ajıratıp alıp, muxaddes qılatug'ın Jaratqan İye – muxaddespen.
9 Eger bir ruwxaniydin' qızı buzıqlıq qılıp, o'zin haramlasa, onda ol o'zin de, a'kesin de haramlag'an boladı. Onday qız otqa jandırıp jiberilsin.
10 Basına maylaw mayı quyılıp, ruwxaniylik kiyimlerdi kiyiwge tayınlang'an ha'm basqa ruwxaniylerden ullı bolg'an bas ruwxaniy aza tutıp, shashların jayıp ju'rmesin ha'm kiyimlerin jırtpasın.
11 Ol hesh qanday o'lige jaqınlaspasın, ha'tteki qaytıs bolg'an a'kesi, ya anası bolsa da, o'zin haramlamasın.
12 Aza tutıw ushın, ol Muxaddes shatırdag'ı xızmetin qaldırmasın, Qudaydın' Muxaddes shatırın haramlamasın. Sebebi maylang'an ruwxaniy Qudayına bag'ıshlang'an. Men – Jaratqan İyemen.Bas ruwxaniy tek g'ana pa'k qızg'a u'ylensin.
13 Bas ruwxaniy tek g'ana pa'k qızg'a u'ylensin.
14 Ol jesir, ku'yewinen ajırasqan, zorlang'an yamasa buzıq hayalg'a u'ylenbesin. Tek g'ana o'z xalqınan bolg'an pa'k qızg'a u'ylensin.
15 Solay etip, ol muxaddes a'wladın haram bolıwdan saqlasın. Men onı O'zime ajıratıp alıp, muxaddes qılg'an Jaratqan İyemen».
16 Jaratqan İye Muwsag'a ja'ne bılay dedi:
17 – Xarong'a bılay dep ayt: «Keleshekte a'wladın'nan denesinde kemshiligi bar hesh bir adam awqat sıpatında beriletug'ın sıydı usınıw ushın Qudayına jaqınlamasın.
18 Denesinde kemshiligi bar hesh bir adam qurbanlıq orıng'a jaqınlamasın: soqır, aqsaq, mayıp, sıqılsız,
19 ayag'ı yamasa qolı sınıq,
20 bu'kir, irgejeyli, ko'zinde kemshiligi bar, qıshıma jarası bar, qotır ha'm jınısıy qos tuqım bezi ezilgen adam.
21 Ruwxaniy Xaronnın' urpag'ınan denesinde kemshiligi bar hesh bir adam Jaratqan İyenin' awqatın, yag'nıy Og'an arnalg'an sıylardı usınıw ushın qurbanlıq orıng'a jaqınlamasın.
22 Degen menen, ol adam Qudayına usınılg'an muxaddes ha'm en' muxaddes awqattan jewine boladı.
23 Biraq ol Muxaddes bo'lmedegi perdege ha'm qurbanlıq orıng'a jaqınlamasın. Sebebi onın' denesinde kemshiligi bar. Ol muxaddes zatlarg'a jaqınlap, olardı haramlamasın. Men olardı O'zime ajıratıp alıp, muxaddes qılatug'ın Jaratqan İyemen».
24 Muwsa Xaron menen ullarına ha'm pu'tkil İzrail xalqına usılardı ja'riyaladı.
