Lebiyliler 22 bob

Sıylardın' muxaddesligi (1-16), Qabıl etilmeytug'ın qurbanlıqlar (17-33).

¹ Jaratqan İye Muwsag'a bılay dedi:

² – Xarong'a ha'm onın' ullarına bılay dep ayt: «İzrail xalqının' Mag'an beretug'ın muxaddes sıylarına hu'rmet penen qarasın, Menin' muxaddes atıma til tiygizbesin. Men – Jaratqan İyemen.

³ Eger a'wladın'ızdan biri İzrail xalqının' Mag'an alıp kelgen muxaddes sıylarına haram halda jaqınlassa, ol Menin' da'rgayımnan joq qılınadı. Men – Jaratqan İyemen.

⁴ Xaron urpag'ınan jaman teri keselligine duwshar bolg'an yamasa jınısıy ag'zasınan irin' ajıralıp shıqqan birewi taza bolmag'ansha, muxaddes sıylardı jemesin. O'li denege tiygeni ushın haram sanalg'an bir na'rsege jantasqan, urıg'ı aqqan,

⁵ adamdı haram qılatug'ın jer bawırlawshılardın' birine yamasa bir na'rseden haram sanalg'an bir adamg'a jantasqan

⁶ ruwxaniy keshke deyin haram sanaladı. Ol suwg'a juwınbag'ansha muxaddes sıylardan jemesin.

⁷ Ku'n batqannan son', ol taza sanaladı ha'm muxaddes sıylardan jewine boladı. O'ytkeni bul onın' awqatı bolıp esaplanadı.

⁸ Haram o'lgen yamasa jabayı haywanlar ta'repinen bawızlang'an o'likti jep, ruwxaniy o'zin haramlamasın. Jaratqan İye – Men bolaman.

⁹ Ruwxaniyler Menin' buyrıqlarıma a'mel qılsın. Bolmasa gu'nalarının' jazasın tartadı, buyrıqlarımdı pisent etpegeni ushın o'ledi. Men – olardı O'zime ajıratıp alıp, muxaddes qılatug'ın Jaratqan İyemen.

¹⁰ Ruwxaniydin' shan'araq ag'zalarınan bolmag'an basqa hesh kim, ruwxaniydin' u'yinde waqtınsha jasap atırg'an adam bolsın, xızmetshisi bolsın, muxaddes sıylardan jemesin.

¹¹ Biraq ruwxaniydin' pulg'a satıp alg'an yamasa u'yinde tuwılg'an qul ha'm shorıları onın' awqatınan jewine boladı.

¹² Ruwxaniydin' qızı ruwxaniy bolmag'an adamg'a turmısqa shıqsa, ol bag'ıshlap usınılg'an muxaddes sıylardan jemesin.

¹³ Biraq ol balası bolmay, jesir qalg'an bolsa yamasa ku'yewinen ayırılısqan bolsa ha'm a'kesinin' u'yine qaytıp kelgennen son', qız waqtındag'ıday u'yinde jasasa, onda a'kesinin' awqatınan jewine boladı. Al ruwxaniydin' shan'arag'ınan bolmag'an hesh bir adam onnan jemesin.

¹⁴ Eger kim de kim bilmesten muxaddes sıydan jep qoysa, ol sol sıydın' ornın toltırıp, u'stine besten bir bo'legin qosıp, ruwxaniyge qaytarıp bersin.

¹⁵ Ruwxaniyler İzrail xalqının' Jaratqan İyege alıp kelgen muxaddes sıyların basqa izraillılardın' jewine jol qoyıp, o'zlerine tiyisli muxaddes sıylardı haramlamasın.

¹⁶ Bolmasa izraillılar gu'nag'a batıp, jazag'a tartıladı. Sebebi Men – qurbanlıqlardı O'zime ajıratıp, muxaddes qılatug'ın Jaratqan İyemen».

¹⁷ Jaratqan İye Muwsag'a bılay dedi:

¹⁸ – Xarong'a, onın' ullarına ha'm pu'tkil İzrail xalqına bılay dep ayt: «İzrail xalqınan yamasa izraillılar arasında jasap atırg'an kelgindilerden biri Jaratqan İyege bergen wa'desin orınlaw ushın yamasa o'z ıqtıyarı menen jandırılatug'ın qurbanlıq bermekshi bolsa,

¹⁹ qurbanlıg'ının' qabıl etiliwi ushın, minsiz bir erkek iri mal yamasa mayda mal alıp kelsin.

²⁰ Kemshiligi bar hesh bir haywandı qurbanlıqqa usınban'lar. O'ytkeni bular qabıl etilmeydi.

²¹ Kim de kim bergen wa'desin orınlaw ushın yamasa o'z ıqtıyarı menen Jaratqan İyege tatıwlıq qurbanlıg'ın beriw ushın iri mal yamasa mayda mal alıp kelse, onın' qabıl etiliwi ushın a'kelgen malı minsiz bolıwı tiyis. Onın' hesh qanday kemshiligi bolmasın.

²² Soqır, mayıp, jaraqatlang'an, irin'li jarası bar, qıshıma jarası bar yamasa qotırı bar maldı Jaratqan İyege usınban'lar ha'm Og'an sıy qılıp, qurbanlıq orınnın' u'stine qoyman'lar.

²³ Al mu'shelerinin' biri uzın yamasa kelte bolg'an iri mal yamasa mayda maldı ıqtıyarlı tu'rde beretug'ın qurbanlıq ushın usınıwın'ızg'a boladı. Biraq bunday maldı wa'de etilgen qurbanlıq etip usınban', ol qabıl etilmeydi.

²⁴ Tuqım bezi ezilgen, julınıp qalg'an yamasa kesip taslang'an maldı Jaratqan İyege usınban'lar, elin'izde bug'an hesh qashan jol qoyman'lar.

²⁵ Usınday kemshiligi bar maldı jat jerli adamnan alıp, Qudayg'a awqat sıpatında qurbanlıq etip bermen'. Sebebi bul mal zıyanlang'an ha'm kemshiligi bar. Ol qabıl etilmeydi».

²⁶ Jaratqan İye Muwsag'a bılay dedi:

²⁷ – Buzaw, qozı yamasa ılaq jan'a tuwılg'an waqtında jeti ku'n anasının' qasında bolsın. Segizinshi ku'nnen baslap, onı Jaratqan İyege arnap qurbanlıq etip bersen'iz boladı.

²⁸ İri yamasa mayda maldı tuwg'an balası menen birge bir ku'nde soyman'lar.

²⁹ Jaratqan İyege minnetdarshılıq qurbanlıg'ın bergen waqıtta, onı qabıl etiletug'ın tu'rde usının'.

³⁰ Onın' go'shin sol ku'ni jep taslan', azang'a deyin awıstırman'. Men – Jaratqan İyemen.

³¹ Buyrıqlarıma boysınıp, olardı orınlan'lar. Men – Jaratqan İyemen.

³² Menin' muxaddes atıma til tiygizben'ler. İzrail xalqı Meni muxaddes dep ta'n alsın. Sizlerdi O'zime ajıratıp alıp, muxaddes qılatug'ın Jaratqan İyemen.

³³ Qudayın'ız bolıw ushın sizlerdi Mısırdan alıp shıqtım. Men – Jaratqan İyemen\.