Lebiyliler 23 bob
1 Jaratqan İye Muwsag'a bılay dedi:
2 – İzrail xalqına bılay dep ayt: «Muxaddes jıynalıs dep ja'riya qılınatug'ın bayramlarım, Jaratqan İyege arnalg'an bayramlar mınalar boladı:
3 Altı ku'n jumıs islen'ler. Biraq jetinshi ku'n sizler ushın tolıq dem alatug'ın Shabbat ku'ni ha'm muxaddes jıynalıs ku'ni boladı. Hesh qanday jumıs islemen'ler. Qaysı jerde jasasan'ız da, Shabbat ku'nin Jaratqan İyege bag'ıshlan'lar.
4 Belgilengen waqıtta muxaddes jıynalıs dep ja'riya qılatug'ın Jaratqan İyege arnalg'an bayramlar mınalar:
5 Birinshi aydın' on to'rtinshi ku'ni keshte Jaratqan İyege arnalg'an Qutqarılıw bayramın bayramlan'lar.
6 On besinshi ku'ni Jaratqan İyege arnalg'an Ashıtqısız nan bayramı bolsın. Solay etip, jeti ku'n ashıtqısız nan jen'ler.
7 Bayramnın' birinshi ku'ni muxaddes jıynalıs bolsın. Sol ku'ni ku'ndelikli jumısların'ızdı islemen'ler.
8 Jeti ku'n dawamında Jaratqan İye ushın qurbanlıq berin'ler. Jetinshi ku'ni muxaddes jıynalıs bolsın. Ku'ndelikli jumısların'ızdı islemen'ler».
9 Jaratqan İye Muwsag'a bılay dedi:
10 – İzrail xalqına bılay dep ayt: «Sizlerge beretug'ın elge kirip, arpa zu'ra'a'tin jıynag'anın'ızda, jıynag'an zu'ra'a'tin'izdin' birinshi bawın ruwxaniyge a'kelip berin'.
11 Qabıl etiliwi ushın, Shabbat ku'ninen keyingi ku'ni ruwxaniy bawdı Jaratqan İyenin' aldında joqarı ko'terip usınsın.
12 Baw joqarı ko'terip usınılg'an ku'ni Jaratqan İyege bir jasar minsiz erkek toqlı jandırılatug'ın qurbanlıq etip usının'.
13 Toqlı menen birge g'a'lle sadaqası qılıp, za'ytu'n mayı aralastırılg'an bir efa sapalı unnın' onnan ekisin bersin. Bul – Jaratqan İyege xosh iyisli sıy boladı. Jandırılatug'ın qurbanlıq penen birge ishimlik sadaqası etip, bir hin sharaptın' to'rtten birin usının'.
14 Qudayın'ızg'a usı sadaqanı alıp keletug'ın ku'nge deyin nan, quwırmash ha'm jan'a pisken da'n jemen'ler. Qay jerde jasasan'ız da, bul a'wladlar dawamında sizlerge ma'n'gi qag'ıyda bolsın.
15 Shabbat ku'ninen keyingi bawdı joqarı ko'terip usıng'an ku'nnen baslap, jeti ha'pte sanan'.
16 Jetinshi Shabbattan keyin, eliwinshi ku'n baslang'anda, Jaratqan İyege taza biyday zu'ra'a'tinen sadaqa a'kelin'.
17 Jasap atırg'an jerin'izden Jaratqan İyege joqarı ko'terip usınılatug'ın sadaqa etip, eki nan alıp kelin'. Nanlar birinshi zu'ra'a'tin'izden bolıp, onnan eki efa sapalı unnan ashıtqı salınıp jawılsın ha'm bunı Jaratqan İyege usının'.
18 Nan menen birge jandırılatug'ın qurbanlıq ushın, Jaratqan İyege bir jasardan bolg'an minsiz jeti erkek toqlı, bir bug'a ha'm eki qoshqardı alıp kelin'. G'a'lle ha'm ishimlik sadaqası menen usınılatug'ın bul qurbanlıq Jaratqan İyege xosh iyisli sıy boladı.
19 Gu'na qurbanlıg'ına bir teke, tatıwlıq qurbanlıg'ına bir jasardan eki toqlı alıp kelin'ler.
20 Ruwxaniy eki toqlını birinshi biyday zu'ra'a'tinen jabılg'an nan menen birge, Jaratqan İyenin' aldında joqarı ko'terip usınsın. Jaratqan İyege bag'ıshlanıp, muxaddes bolg'an bul qurbanlıqlar ruwxaniylerge tiyisli.
21 Sol ku'ndi muxaddes jıynalıs dep ja'riyalan'lar ha'm ku'ndelikli jumısların'ızdı islemen'ler. Bul jasap atırg'an ha'r bir jerin'izde a'wladların'ız dawamında ma'n'gi qag'ıyda bolsın.
22 Jerin'izdegi eginlerdi jıynag'anın'ızda, atızın'ızdın' shetine deyin orıp alman'. Tu'sip qalg'an masaqlardı jıynap alman'. Olardı jarlılarg'a ha'm kelgindi adamlarg'a qaldırın'lar. Men – Qudayın'ız Jaratqan İyemen».
23 Jaratqan İye Muwsag'a bılay dedi:
24 – İzrail xalqına bılay dep ayt: «Jetinshi aydın' birinshi ku'ni dem alıs ku'ni bolsın. Sol ku'ni ka'rnay shertilip, eslew ku'ni belgilensin ha'm muxaddes jıynalıs o'tkerilsin.
25 Sol ku'ni ku'ndelikli jumısların'ızdı islemen'ler, Jaratqan İyege qurbanlıqlar usının'lar».
26 Jaratqan İye Muwsag'a bılay dedi:
27 – Jetinshi aydın' onınshı ku'ni Gu'nadan pa'kleniw ku'ni. Sol ku'ni muxaddes jıynalıs bolsın ha'm oraza tutıp, Jaratqan İyege sıy usının'lar.
28 Sol ku'ni hesh qanday jumıs islemen'ler. O'ytkeni Qudayın'ız Jaratqan İyenin' aldında gu'naların'ızdan pa'klenetug'ın ku'nin'iz boladı.
29 Sol ku'ni oraza tutpag'an ha'r bir adam o'z xalqı arasınan joq qılınadı.
30 Sol ku'ni qanday da bir jumıs islegen adamdı o'z xalqı arasınan joq etemen.
31 Hesh qanday jumıs islemen'. Bul jasap atırg'an ha'r bir jerin'izde a'wladlar boyı ma'n'gi qag'ıyda bolsın.
32 Sol ku'ni sizler ushın tolıq dem alatug'ın Shabbat ku'ni bolıp, oraza tutın'lar. Aydın' tog'ızınshı ku'ninin' keshinen baslap, erten'gi keshke deyin Shabbat ku'nin belgilen'ler.
33 Jaratqan İye Muwsag'a bılay dedi:
34 – İzrail xalqına bılay dep ayt: «Jetinshi aydın' on besinshi ku'ninen baslap, jeti ku'n dawamında Jaratqan İyege arnap, Qos bayramın belgilen'ler.
35 Bayramnın' birinshi ku'ni muxaddes jıynalıs o'tkerin'ler. Sol ku'ni ku'ndelikli jumısların'ızdı islemen'ler.
36 Jeti ku'n dawamında ku'nine bir ma'rte Jaratqan İyege sıy usının'lar. Segizinshi ku'ni de muxaddes jıynalıs o'tkerin' ha'm Jaratqan İyege sıy usının'lar. Bul saltanatlı jıynalıs boladı. Ku'ndelikli jumısların'ızdı islemen'ler.
37 Muxaddes jıynalıs dep ja'riya qılınatug'ın Jaratqan İyege arnalg'an bayramlar usılar boladı. Bayramlarda Jaratqan İyege arnalg'an sıylardı, jandırılatug'ın qurbanlıqlardı, g'a'lle sadaqaların, basqa qurbanlıqlardı ha'm ishimlik sadaqaların belgilengen o'z ku'nlerinde alıp kelin'ler.
38 Bular Jaratqan İyenin' Shabbatınan, Jaratqan İyege arnap alıp keletug'ın sıyların'ızdan, wa'de ha'm ıqtıyarlı qurbanlıqların'ızdan tısqarı bolsın.
39 Jerlerin'izdin' zu'ra'a'tlerin jıynap bolg'an waqtın'ızda, jetinshi aydın' on besinshi ku'ninen baslap, jeti ku'n dawamında Jaratqan İyege arnap Qos bayramın o'tkizin'. Bayramnın' birinshi ha'm segizinshi ku'ni dem alıs ku'ni bolsın.
40 Birinshi ku'ni miywe ag'ashların'ızdın' en' jaqsı miywelerin, palma ag'ashının' japıraqların, mol japıraqlı terektin' talların, da'rya boyında o'setug'ın tallardın' shaqaların jıynap, Qudayın'ız Jaratqan İyenin' aldında jeti ku'n dawamında shadlanın'lar.
41 Bunı ha'r jılı jeti ku'n dawamında Jaratqan İyenin' bayramı etip belgilen'ler. Jıldın' jetinshi ayında belgilenetug'ın usı bayram a'wladların'ız dawamında ma'n'gi qag'ıyda bolıp qalsın.
42 Jeti ku'n dawamında qosta jasan'lar. Ha'r bir jergilikli izraillı qoslarda jasasın.
43 Sonda keleshek a'wladların'ız İzrail xalqın Mısırdan alıp shıqqan waqtımda, olardın' qoslarda jasag'anın bilip aladı. Men – Qudayın'ız Jaratqan İyemen».
44 Usılay etip, Muwsa İzrail xalqına Jaratqan İyege arnalg'an bayramların ja'riyaladı.
