Lebiyliler 4 bob

Gu'na qurbanlıg'ı (1-35)

¹ Jaratqan İye Muwsag'a bılay dedi:

² – İzrail xalqına bılay dep ayt: «Eger kim de kim Men buyrıqlarımda qadag'an qılg'an bir na'rseni islep, bilmey gu'na qılsa, to'mende ko'rsetilgenlerge a'mel qılsın:

³ Eger bas ruwxaniy gu'na islep, xalqın ayıpker qılsa, islegen gu'nası ushın Jaratqan İyege gu'na qurbanlıg'ı etip minsiz bir bug'a usınsın.

⁴ Ol bug'anı Ushırasıw shatırının' aldına, Jaratqan İyenin' aldına alıp kelsin. Son'ınan qolın bug'anın' basına qoysın ha'm Jaratqan İyenin' aldında onı shalsın.

⁵ Bas ruwxaniy bug'anın' qanınan biraz alıp, Ushırasıw shatırının' ishine kirsin.

⁶ Ol barmag'ın qang'a batırıp, qandı Jaratqan İyenin' aldında, En' muxaddes bo'lmeni bo'lip turg'an perdege qaray jeti ret serpsin.

⁷ Son'ınan ol shatırdag'ı, Jaratqan İyenin' aldındag'ı xosh iyisli tu'tetki tu'tetiletug'ın orınnın' shaqlarına qandı su'rtsin. Bug'anın' awısqan qanın shatırdın' kirer awzının' aldındag'ı jandırılatug'ın qurbanlıq orınnın' tu'bine to'ksin.

⁸ Keyin gu'na ushın berilgen bug'anın' pu'tkil mayın: isheklerin qaplag'an sharbı mayları menen ish mayların,

⁹ eki bo'tekesin, olardın' mayların ha'm bawırının' to'mengi ushın

¹⁰ tatıwlıq qurbanlıg'ı sıpatında berilgen maldın' mayın ayırg'anday, ayırıp alsın. Bas ruwxaniy olardı jandırılatug'ın qurbanlıq beriletug'ın orınnın' u'stinde tu'tetip jandırsın.

¹¹ Al bug'anın' qalg'an bo'leklerin: terisin, go'shin, gellesin, tuyaqların ha'm ishek-qarnı menen da'rislerin

¹² ordanın' sırtındag'ı ku'l to'giletug'ın taza jerge aparıp, olardı otınnın' u'stine qoyıp, jag'ıp jibersin.

¹³ Eger pu'tkil İzrail ja'miyeti Jaratqan İyenin' buyrıqlarında qadag'an etilgen na'rseni islep, bilmey gu'na qılsa, olar ba'ri bir ayıplı sanaladı.

¹⁴ İslegen gu'nası belgili bolg'anda, olar ja'miyet atınan gu'na qurbanlıg'ı etip bir bug'a usınıp, onı Ushırasıw shatırının' aldına alıp kelsin.

¹⁵ Ja'miyet aqsaqalları Jaratqan İyenin' aldında qolların bug'anın' basına qoyıp, onı Jaratqan İyenin' aldında shalsın.

¹⁶ Bas ruwxaniy bug'anın' qanınan biraz alıp, Ushırasıw shatırının' ishine kirsin.

¹⁷ Ruwxaniy barmag'ın qang'a batırıp, qandı Jaratqan İyenin' aldında, En' muxaddes bo'lmeni bo'lip turg'an perdege qaray jeti ret serpsin.

¹⁸ Son'ınan ruwxaniy qandı shatırdag'ı, Jaratqan İyenin' aldındag'ı tu'tetki tu'tetiletug'ın orınnın' shaqlarına su'rtsin. Bug'anın' awısqan qanın shatırdın' kirer awzının' aldındag'ı jandırılatug'ın qurbanlıq orınnın' tu'bine to'ksin.

¹⁹ Bug'anın' pu'tkil mayın alıp, onı qurbanlıq orınnın' u'stinde tu'tetip jandırsın.

²⁰ Ruwxaniy o'z gu'nası ushın bergen bug'ag'a ne islegen bolsa, bul bug'ag'a da sonı islesin. Usılayınsha ruwxaniy ja'miyetti gu'nadan tazalaydı ha'm olardın' gu'naları keshiriledi.

²¹ Aldıng'ı bug'anı qalay jandırg'an bolsa, bul bug'anı da ordanın' sırtına alıp shıg'ıp, jag'ıp jibersin. Bul – ja'miyettin' gu'nası ushın qurbanlıq boladı.

²² Eger basshılardın' biri Qudayı bolg'an Jaratqan İyenin' buyrıqlarında qadag'an etilgen bir na'rseni islep, bilmey gu'na qılsa, ol ayıplı sanaladı.

²³ İslegen gu'nası o'zine a'shkara etilgen waqıtta, ol qurbanlıqqa minsiz bir teke alıp kelsin.

²⁴ Keyin ol qolın tekenin' basına qoyıp, onı jandırılatug'ın qurbanlıqlar shalınatug'ın jerde, Jaratqan İyenin' aldında shalsın. Bul – gu'na qurbanlıg'ı.

²⁵ Ruwxaniy barmag'ın gu'na qurbanlıg'ının' qanına batırıp, qandı jandırılatug'ın qurbanlıq orınnın' shaqlarına su'rtsin. Awısqan qandı orınnın' tu'bine to'ksin.

²⁶ Keyin tekenin' pu'tkil mayın tatıwlıq qurbanlıg'ının' mayı sıyaqlı, qurbanlıq orınnın' u'stinde tu'tetip jandırsın. Usılayınsha, ruwxaniy sol ko'semdi gu'nasınan tazalaydı ha'm onın' gu'nası keshiriledi.

²⁷ Eger xalıq arasınan birew Jaratqan İyenin' buyrıqlarında qadag'an etilgen bir na'rseni islep, bilmey gu'na qılsa, ol ayıplı sanaladı.

²⁸ İslegen gu'nası o'zine a'shkara bolg'anda, ol gu'nası ushın qurbanlıqqa minsiz bir eshki a'kelsin.

²⁹ Son' ol qolın gu'na ushın berilgen qurbanlıqtın' basına qoyıp, onı jandırılatug'ın qurbanlıq shalınatug'ın jerde shalsın.

³⁰ Ruwxaniy qurbanlıqtın' qanına barmag'ın batırıp, jandırılatug'ın qurbanlıq orınnın' shaqlarına su'rtsin. Awısqan qandı qurbanlıq orınnın' tu'bine to'ksin.

³¹ Qurbanlıq bergen adam eshkinin' pu'tkil mayın tatıwlıq qurbanlıg'ının' mayı sıyaqlı ayırıp alsın. Ruwxaniy maydı Jaratqan İyege xosh iyisli sıy qılıp, qurbanlıq orında tu'tetip jandırsın. Usılayınsha, ruwxaniy sol adamdı gu'nasınan tazalaydı ha'm onın' gu'nası keshiriledi.

³² Eger birew gu'na qurbanlıg'ı ushın qoy bermekshi bolsa, qoy minsiz bolsın.

³³ Ol qolın qurbanlıqtın' basına qoysın ha'm onı jandırılatug'ın qurbanlıqlar shalınatug'ın jerde shalsın.

³⁴ Keyin ruwxaniy barmag'ın shalıng'an qoydın' qanına batırıp, jandırılatug'ın qurbanlıq orınnın' shaqlarına su'rtsin. Al awısqan qandı qurbanlıq orınnın' tu'bine to'ksin.

³⁵ Tatıwlıq qurbanlıg'ı ushın berilgen qoy sıyaqlı, adam bul qurbanlıqtın' da pu'tkil mayın ayırıp alsın. Ruwxaniy onı qurbanlıq orında Jaratqan İyege arnap jag'ılıp atırg'an sıylardın' u'stine qoyıp, tu'tetip jandırıp jibersin. Usılayınsha, ruwxaniy adamdı gu'nasınan tazalaydı ha'm onın' gu'nası keshiriledi».