Lebiyliler 5 bob

Ayıp qurbanlıg'ı (14-19).

¹ «Eger kim de kim ko'rgen-bilgenleri haqqında gu'walıq beriwge shaqırılsa, biraq ol bunnan bas tartsa, onda ol o'z ayıbının' jazasın tartadı.

² Kim de kim bilmey, haram sanalg'an bir na'rsege: jabayı ya u'y haywanının' yamasa jer bawırlawshı bir haywannın' o'ligine bir jerin tiygizip alsa, ol haramlang'an bolıp, ayıplı sanaladı.

³ Birew bilmey, adamnın' denesinen shıqqan o'zin haramlaytug'ın qanday da bir na'rsege bir jerin tiygizse, keyin ne islegenin tu'singen waqıtta, ol ayıplı sanaladı.

⁴ Eger kim de kim qanday da bir isti isleymen dep, oylanbastan ant iship, onı orınlamay qalsa, onda ol ayıplı sanaladı.

⁵ Eger kim de kim usı aytılg'an islerdin' birewinde ayıplı bolsa, islegen gu'nasın ashıq moyınlasın.

⁶ Ol gu'nasının' qunı sıpatında Jaratqan İyege gu'na qurbanlıg'ın bersin. Bul qurbanlıq mayda maldan bir qoy yamasa bir eshki bolsın. Sonda ruwxaniy adamdı gu'nasınan tazalaydı.

⁷ Eger adamnın' qoy a'keliwge jag'dayı bolmasa, onda ol gu'nasının' qunı sıpatında Jaratqan İyege eki qumırı yamasa eki jas kepter a'kelsin. Olardın' biri gu'na qurbanlıg'ı ushın, al ekinshisi jandırılatug'ın qurbanlıq ushın beriledi.

⁸ Olardı ruwxaniyge alıp kelsin. Ruwxaniy da'slep gu'na qurbanlıg'ın berip, qustın' moynın sındırsın, biraq onın' basın julıp taslamasın.

⁹ Keyin qustın' qanının' birazın qurbanlıq orınnın' qaptalına serpip, awısqan qandı qurbanlıq orınnın' tu'bine to'ksin. Bul – gu'na qurbanlıg'ı.

¹⁰ Sonnan son', ruwxaniy ekinshi qustı jandırılatug'ın qurbanlıq etip, qag'ıyda boyınsha bersin. Usılayınsha ruwxaniy adamdı gu'nasınan tazalaydı ha'm ol keshiriledi.

¹¹ Eger adamnın' eki qumırı yamasa eki kepter a'keliwge jag'dayı kelmese, onda ol islegen gu'nası ushın efanın' onnan bir mo'lsherindegi sapalı biyday unınan a'kelsin. Ol unnın' u'stine za'ytu'n mayın quymasın ha'm xosh iyisli shayır da qospasın. Sebebi bul – gu'na qurbanlıg'ı.

¹² Adam undı ruwxaniyge alıp kelsin. Ruwxaniy tolıq sadaqanın' belgisi retinde unnan bir uwıs alıp, onı qurbanlıq orında, Jaratqan İyege arnap jag'ılıp atırg'an sıylardın' u'stine qoyıp, tu'tetip jandırıp jibersin. Bul – gu'na qurbanlıg'ı.

¹³ Solay etip, ruwxaniy joqarıda aytılg'an gu'nalardın' birin islegen adamdı gu'nasınan tazalaydı ha'm onın' gu'nası keshiriledi. G'a'lle sadaqası sıyaqlı, sadaqanın' jandırılmag'an bo'legi ruwxaniyge tiyisli boladı».

¹⁴ Jaratqan İye Muwsag'a bılay dedi:

¹⁵ – Eger kim de kim Jaratqan İyege arnalıp, muxaddeslengen na'rselerdi bılg'ap, bilmey gu'na islese, ol ayıp qurbanlıg'ı sıpatında Jaratqan İyege mayda maldan bir minsiz qoshqar usınsın. Qoshqardın' qunı shekel awırlıg'ındag'ı gu'mis penen, Muxaddes orın o'lshemi menen bahalansın+.

¹⁶ Adam muxaddes na'rsege keltirgen zıyanının' qunın to'lep, ja'ne sol qunnın' u'stine besten birin qosıp, ruwxaniyge bersin. Ruwxaniy ayıp qurbanlıg'ı ushın berilgen qoshqar menen sol adamdı gu'nasınan tazalaydı ha'm ol keshiriledi.

¹⁷ Eger kim de kim Jaratqan İyenin' buyrıqlarında qadag'an etilgen na'rseni islep, gu'na qılsa, ol bilmey islese de, o'z ayıbının' jazasın tartadı.

¹⁸ Ol ruwxaniyge ayıp qurbanlıg'ı sıpatında mayda maldan bir qoshqar usınsın. Qoshqar minsiz ha'm qunı belgilengen bolıwı tiyis. Ruwxaniy adamdı bilmey islegen gu'nasınan tazalaydı ha'm ol keshiriledi.

¹⁹ Bul – ayıp qurbanlıg'ı, o'ytkeni adam Jaratqan İyege qarsı ayıp islegen edi.