Lebiyliler 6 bob

Ruwxaniylerdin' qurbanlıq beriw qag'ıydaları Ku'ndelikli jandırılatug'ın qurbanlıq (8-13), G'a'lle sadaqası (14-23), Gu'na qurbanlıg'ı (24-30).

¹ Jaratqan İye Muwsag'a bılay dedi:

² – Eger kim de kim o'zine amanat etilgen, o'zine tapsırılg'an yamasa urlang'an bir mal-mu'lik tuwrısında jaqının aldasa,

³ ya onı nahaqlıq penen qolg'a kirgizse yamasa joytılg'an bir na'rseni tawıp alıp, onı jasırsa, usınday yamasa usıg'an uqsaytug'ın gu'nalardın' birin islep, onı islemedim dep jalg'an ant ishse, ol Jaratqan İyenin' aldında ayıp is qılg'an boladı.

⁴ Adam usılardın' birin islep, gu'na qılg'anda, ol ha'r qanday nahaq jol menen qolg'a kirgizgen zattı iyesine qaytarıp bersin.

⁵ Ol ayıbı ashılg'an ku'ni zatlardın' u'stine besten birin qosıp iyesine tolıg'ı menen qaytarıp bersin.

⁶ Son'ınan Jaratqan İyege ayıp qurbanlıg'ı etip usınıw ushın, qunı belgilengen ha'm minsiz bolg'an qoshqardı ruwxaniyge a'kelsin.

⁷ Sonda ruwxaniy Jaratqan İyenin' aldında onı gu'nasınan tazalaydı ha'm onın' islegen ayıbı qanday bolsa da, ol keshiriledi.

⁸ Jaratqan İye Muwsag'a ja'ne bılay dedi:

⁹ – Xaron ha'm onın' ullarına mınaday dep buyır: «Ku'ndelikli jandırılatug'ın qurbanlıqtı beriw qag'ıydası mınaday: jandırılatug'ın qurbanlıq qurbanlıq orınnın' u'stinde tu'n boyı, azang'a deyin qalıwı kerek. Qurbanlıq orınnın' u'stindegi ot so'nbesin.

¹⁰ Azanda ruwxaniy zıg'ırdan islengen kiyimi menen diz kiyimin kiyip alsın. Keyin ol qurbanlıq orınnın' u'stindegi jandırılatug'ın qurbanlıqtan qalg'an ku'ldi jıynap, qurbanlıq orınnın' janına qoysın.

¹¹ Son'ınan ruwxaniy sol kiyimlerin sheship, a'dettegi kiyimlerin kiysin ha'm ku'ldi ordanın' sırtındag'ı taza jerge aparıp taslasın.

¹² Qurbanlıq orınnın' u'stindegi ot hesh qashan o'shpey, u'zliksiz janıp tursın. Ruwxaniy ha'r ku'ni azanda otqa otın salıp, jandırılatug'ın qurbanlıqtın' bo'leklerin onın' u'stine qoysın. Keyin tatıwlıq qurbanlıqlarının' mayın onın' u'stinde tu'tetip jandırsın.

¹³ Qurbanlıq orınnın' u'stindegi ot hesh qashan o'shpey, u'zliksiz janıp tursın».

¹⁴ «G'a'lle sadaqasın beriw qag'ıydası mınaday: Xaronnın' ulları g'a'lle sadaqasın qurbanlıq orınnın' aldına a'kelip, Jaratqan İyege usınsın.

¹⁵ Ruwxaniy za'ytu'n mayı qosılg'an sapalı unnan bir uwısın toltırıp alsın ha'm xosh iyisli shayırdın' ha'mmesin alıp, olardı tolıq sadaqanın' belgisi retinde qurbanlıq orınnın' u'stinde tu'tetip jandırsın. Bul – tolıq sadaqanın' belgisi ha'm Jaratqan İyege xosh iyisli sıy boladı.

¹⁶ Sadaqanın' jandırılmag'an bo'legin Xaron ha'm onın' ulları jesin. Onnan ashıtqısız nan jawıp, muxaddes jerde, Ushırasıw shatırının' ha'wlisinde jesin.

¹⁷ Og'an ashıtqı qosılmasın. Men bunı O'z sıylarımnan ruwxaniylerdin' payı qılıp berdim. Bul – ayıp qurbanlıg'ı ha'm gu'na qurbanlıg'ı sıyaqlı ju'da' muxaddes.

¹⁸ Xaron a'wladınan bolg'an ha'r bir er adam onnan jewine boladı. Bul Jaratqan İyege arnalg'an sıylardan a'wladlar dawamında ma'n'gige olardın' payı boladı. Qurbanlıqlarg'a tiyip ketken ha'r bir na'rse muxaddes boladı».

¹⁹ Jaratqan İye Muwsag'a tag'ı bılay dedi:

²⁰ – Xaron ha'm onın' urpag'ınan biri bas ruwxaniylikke maylanıp, tayınlang'an ku'nnen baslap, onın' beretug'ın sadaqası mınaday bolsın: ol onnan bir efa sapalı unnın' yarımın azanda, al qalg'an yarımın keshte g'a'lle sadaqası etip bersin. Ol bul sadaqanı ha'r ku'ni berip turıwı tiyis.

²¹ Sol ung'a za'ytu'n mayı qosıp iylenip, tabada pisirilsin. Bul g'a'lle sadaqasın bo'leklep sındırıp, Jaratqan İyege xosh iyisli sıy qılıp usınsın.

²² Bunı Xaron a'wladınan bolg'an bas ruwxaniy Jaratqan İyege usınsın. Bul ma'n'gige Jaratqan İyenin' payı boladı. Usı sadaqa tolıg'ı menen tu'tetip jandırılıwı tiyis.

²³ Bas ruwxaniydin' bergen ha'r bir g'a'lle sadaqası tolıg'ı menen jandırıp jiberilsin, onı jewge bolmaydı.

²⁴ Jaratqan İye Muwsag'a bılay dedi:

²⁵ – Xaron ha'm onın' ullarına bılay dep ayt: «Gu'na qurbanlıg'ın beriw qag'ıydası mınaday: gu'na qurbanlıg'ı jandırılatug'ın qurbanlıq shalınatug'ın jerde, Jaratqan İyenin' aldında shalınsın. Ol – ju'da' muxaddes.

²⁶ Gu'na qurbanlıg'ın usınıwdı orınlaytug'ın ruwxaniy onın' go'shin muxaddes jerde, Ushırasıw shatırının' ha'wlisinde jesin.

²⁷ Qurbanlıqtın' go'shine tiyip ketken ha'r bir na'rse muxaddes boladı. Onın' qanı kimnin' kiyimine shashırasa, kiyim muxaddes jerde juwılsın.

²⁸ Qurbanlıqtın' go'shi pisirilgen ılay ıdıs sındırıp taslanıwı kerek. Eger go'sh qola ıdısta pisirilgen bolsa, ıdıs ısqılap tazalanıp, suw menen juwılsın.

²⁹ Ruwxaniyler a'wladınan bolg'an ha'r bir er adam gu'na qurbanlıg'ının' go'shinen jewine boladı. Bul qurbanlıq ju'da' muxaddes.

³⁰ Biraq gu'na qurbanlıg'ının' qanı Ushırasıw shatırının' ishine, gu'nadan tazalaw ushın Muxaddes bo'lmege alıp kirilse, bunday qurbanlıqtın' go'shin jewge bolmaydı. Ol tolıg'ı menen otqa jandırıp jiberiliwi tiyis».