Lebiyliler 8 bob
1 Jaratqan İye Muwsag'a bılay dedi:
2 – Xaron ha'm onın' ulların, olar menen birge ruwxaniylik kiyimlerin, maylaw ushın arnalg'an za'ytu'n mayın, gu'na qurbanlıg'ı ushın beriletug'ın bug'anı, eki qoshqardı ha'm bir sebet ashıtqısız nanlardı alıp kel.
3 Keyin pu'tkil ja'miyetti Ushırasıw shatırının' aldına jıyna.
4 Muwsa Jaratqan İyenin' buyrıg'ın orınladı. Ha'mme Ushırasıw shatırının' aldına jıynalg'anda,
5 Muwsa ja'miyetke: – Men ha'zir Jaratqan İyenin' buyrıg'ın a'melge asıraman, – dedi de,
6 Xaron ha'm onın' ulların aldıg'a shıg'arıp, olardı suw menen juwınıw ra'siminen o'tkizdi.
7 Sonnan keyin, Xarong'a uzın ko'ylek kiygizip, beline belbew bayladı ha'm onın' sırtınan bahalı ruwxaniylik kiyim kiygizdi. Onın' u'stine efodtı tag'ıp, belbewi menen buwdı.
8 Ko'ksine qaltalı o'n'irsheni taqtı. O'n'irshenin' ishine Urim ha'm Tummimdi saldı.
9 Xaronnın' basına sa'lle orap, sa'llenin' aldı betine muxaddes altın tajdı qoydı. Muwsa ha'r bir na'rseni Jaratqan İyenin' buyırg'anınday qılıp isledi.
10 Son'ınan Muwsa maylaw ra'simine arnalg'an za'ytu'n mayın alıp, Muxaddes shatırdı ha'm onın' ishindegi ha'r bir na'rseni maylap, muxaddes qıldı.
11 Qurbanlıq orınnın' u'stine maydan jeti ret serpti. Ja'ne de, orınnın' barlıq buyımlarına, u'lken la'genge ha'm onın' tuyaqlarına may serpip, olardı muxaddes qıldı.
12 Xarondı muxaddes qılıp bag'ıshlaw ushın, basına za'ytu'n mayın quyıp, onı maylaw ra'siminen o'tkizdi.
13 Sonnan son', Xaronnın' ulların aldıg'a shıg'ardı. Olarg'a uzın ko'ylekler kiydirip, bellerine belbew bayladı ha'm baslarına kishigirim sa'lle oradı. Muwsa bulardı da Jaratqan İyenin' buyırg'anınday qılıp isledi.
14 Keyin Muwsa gu'na qurbanlıg'ı etip beriletug'ın bug'anı a'keldi. Xaron ha'm onın' ulları qolların bug'anın' basına qoydı.
15 Muwsa bug'anı shaldı. Qurbanlıq orındı tazalaw ushın, qandı barmag'ı menen orınnın' shaqlarına su'rtip shıqtı. Awısqan qandı qurbanlıq orınnın' tu'bine to'kti. Usılayınsha ol qurbanlıq orındı gu'nalardan tazalaw ra'simi o'tkeriletug'ın halg'a tayarlap, onı muxaddes qıldı.
16 Muwsa maldın' ish mayların, bawırının' to'mengi ushın, eki bo'tekesin ha'm bo'teke mayların alıp, qurbanlıq orınnın' u'stinde tu'tetip jandırdı.
17 Al bug'anın' qalg'an bo'leklerin – terisin, go'shin ha'm da'rislerin ordanın' sırtında jag'ıp jiberdi. Muwsa bulardı da Jaratqan İyenin' buyırg'anınday qılıp isledi.
18 Keyin Muwsa jandırılatug'ın qurbanlıqqa bir qoshqardı a'keldi. Xaron ha'm onın' ulları qolların qoshqardın' basına qoydı.
19 Muwsa qoshqardı shalıp, onın' qanın qurbanlıq orınnın' to'rt qaptalına serpip jiberdi.
20 Qoshqardı jiliklerge bo'lip, jiliklerin, gellesin ha'm mayın tu'tetip jandırdı.
21 shek-qarnın ha'm tuyaqların juwıp, qoshqardı tolıg'ı menen qurbanlıq orınnın' u'stinde tu'tetip jandırdı. Bul jandırılatug'ın qurbanlıq – Jaratqan İyege xosh iyisli sıy boladı. Muwsa ha'mmesin Jaratqan İyenin' buyırg'anınday qılıp isledi.
22 Bunnan son', Muwsa Xaron ha'm onın' ullarının' bag'ıshlanıwına arnalg'an qurbanlıq ushın beriletug'ın qoshqardı alıp keldi. Xaron ha'm onın' ulları qolların qoshqardın' basına qoydı.
23 Muwsa qoshqardı shalıp, onın' qanın aldı. Qandı Xaronnın' on' qulag'ının' sırg'alıg'ına, on' qolının' ha'm on' ayag'ının' bas barmaqlarına su'rtti.
24 Son'ınan Xaronnın' ulların aldıg'a shıg'ardı. Olardın' da on' qulag'ının' sırg'alıg'ına, on' qol ha'm on' ayag'ının' bas barmaqlarına qan su'rtti. Awısqan qandı qurbanlıq orınnın' to'rt qaptalına serpip jiberdi.
25 Muwsa maldın' mayın, yag'nıy quyrıq mayın, ish mayların, bawırının' to'mengi ushın, eki bo'tekesin, bo'teke mayların ha'm on' sanın aldı.
26 Keyin Jaratqan İyenin' aldındag'ı ashıtqısız nan salıng'an sebetten bir sho'rek, za'ytu'n mayı qosılg'an sho'rek ha'm bir pa'tir alıp, maldın' mayı menen on' sanının' u'stine qoydı.
27 Muwsa bulardın' ha'mmesin Xaron ha'm onın' ullarının' qollarına berdi. Olar bulardı Jaratqan İyenin' aldında joqarı ko'terip usındı.
28 Keyin Muwsa bulardı olardın' qollarınan alıp, qurbanlıq orınnın' u'stinde jandırılatug'ın qurbanlıq penen birge tu'tetip jandırdı. Bular – bag'ıshlanıw qurbanlıg'ı, Jaratqan İyege xosh iyisli sıy boladı.
29 Son' Muwsa to'sti alıp, onı Jaratqan İyenin' aldında joqarı ko'terip usındı. Bag'ıshlanıw qurbanlıg'ı ushın berilgen qoshqardan Muwsanın' payına usı to's tiydi. Muwsa ha'mmesin Jaratqan İyenin' buyırg'anınday qılıp isledi.
30 Muwsa maylaw ra'simine arnalg'an za'ytu'n mayın ha'm qurbanlıq orındag'ı qandı alıp, Xaron menen onın' ullarının' u'stine ha'm olardın' kiyimlerine serpti. Usılayınsha, Muwsa Xarondı, onın' ulların ha'm olardın' kiyimlerin muxaddes qıldı.
31 Son' Muwsa Xaron ha'm onın' ullarına: – Go'shti Ushırasıw shatırının' kirer awzının' aldında pisirin'ler. Onı bag'ıshlanıw sadaqaları salıng'an sebettegi nan menen birge sol jerde jen'ler. Mag'an: «Bunı Xaron ha'm onın' ulları jesin», – dep buyırılg'an.
32 Go'sh penen nannan awısıp qalg'anın jag'ıp jiberin'ler.
33 ag'ıshlanıw ku'nlerin'iz tamam bolg'ansha, jeti ku'n dawamında Ushırasıw shatırının' aldınan hesh jaqqa shıg'ıp ketpen'ler. Sebebi bag'ıshlanıw ku'nlerin'iz jeti ku'n dawam etiwi tiyis.
34 Bu'gingi islengen ra'simdi Jaratqan İye sizlerdin' gu'naların'ızdın' tazalanıwı ushın buyırg'an edi.
35 Jeti ku'n dawamında ku'ni-tu'ni Ushırasıw shatırının' aldında tayın bolıp, Jaratqan İyenin' buyrıg'ın orınlawın'ız tiyis. Bolmasa, o'lip qalasızlar. Mag'an usılay buyrıq berilgen, – dedi.
36 Solay etip, Xaron ha'm onın' ulları Jaratqan İyenin' Muwsa arqalı bergen barlıq buyrıqların orınladı.
