Lebiyliler 9 bob

Ruwxaniylerdin' o'z xızmetin baslaw(1-24).

¹ Segizinshi ku'ni Muwsa Xarondı, onın' ulların ha'm İzraildın' aqsaqalların shaqırdı.

² Sonda Muwsa Xarong'a bılay dedi: – Gu'na qurbanlıg'ı ushın minsiz bir tana, jandırılatug'ın qurbanlıq ushın minsiz bir qoshqar alıp, olardı Jaratqan İyege usın.

³ Son'ınan İzrail xalqına ayt, olar da gu'na qurbanlıg'ı ushın bir teke, jandırılatug'ın qurbanlıq ushın bir jasar minsiz tana menen bir jasar minsiz toqlı a'kelsin.

⁴ Jaratqan İyenin' aldında tatıwlıq qurbanlıg'ı ushın bir bug'a ha'm bir qoshqar alıp, bug'an qosa za'ytu'n mayı menen aralastırılg'an g'a'lle sadaqasın usınsın. O'ytkeni bu'gin olarg'a Jaratqan İye ko'rinedi.

⁵ Olar Muwsanın' buyırg'anlarının' ha'mmesin Ushırasıw shatırının' aldına alıp keldi. Ha'mme jaqın kelip, Jaratqan İyenin' aldında turdı.

⁶ Sonda Muwsa olarg'a: – Jaratqan İyenin' saltanatı sizlerge ko'riniwi ushın, Ol sizlerge mınalardı islewdi buyırmaqta, – dep,

⁷ Xarong'a bılay dedi: – Qurbanlıq orıng'a jaqınlap, gu'na qurbanlıg'ın ha'm jandırılatug'ın qurbanlıg'ın'dı ber. Usılay etip, o'zin'di de, xalqın'dı da gu'nalardan tazala. Sonnan keyin, Jaratqan İye buyırg'anınday, xalqın'nın' qurbanlıg'ın berip, olardı gu'nalardan tazala.

⁸ Solay etip, Xaron qurbanlıq orıng'a jaqınlasıp, o'zi ushın gu'na qurbanlıg'ına alıp kelgen tananı shaldı.

⁹ Ulları og'an tananın' qanın alıp keldi. Xaron barmag'ın qang'a batırıp, qurbanlıq orınnın' shaqlarına su'rtti. Awısqan qandı qurbanlıq orınnın' tu'bine to'kti.

¹⁰ Jaratqan İyenin' Muwsag'a bergen buyrıg'ı boyınsha, ol gu'na qurbanlıg'ının' mayın, eki bo'tekesin ha'm bawırının' to'mengi ushın qurbanlıq orında tu'tetip jandırdı.

¹¹ Al tananın' go'shi menen terisin ordanın' sırtında jag'ıp jiberdi.

¹² Keyin Xaron jandırılatug'ın qurbanlıqtı shaldı. Onın' ulları qurbanlıqtın' qanın og'an berdi ha'm ol qandı qurbanlıq orınnın' to'rt qaptalına serpip jiberdi.

¹³ Son'ınan ulları og'an jandırılatug'ın qurbanlıqtın' barlıq jiliklerin ha'm basın a'kelip berdi. Xaron ha'mmesin qurbanlıq orınnın' u'stinde tu'tetip jandırdı.

¹⁴ Al qurbanlıqtın' ishekqarnın ha'm tuyaqların juwıp, qurbanlıq orında jandırılatug'ın qurbanlıqqa qosıp tu'tetip jandırdı.

¹⁵ Bunnan son', Xaron xalıqtın' qurbanlıg'ın alıp keldi. Xalıqtın' gu'naları ushın berilgen tekeni shaldı ha'm birinshi qurbanlıq sıyaqlı bunı da gu'na qurbanlıg'ı sıpatında usındı.

¹⁶ Xaron jandırılatug'ın qurbanlıqtı da qag'ıydag'a say ta'rizde berdi.

¹⁷ Son'ınan ol g'a'lle sadaqasın berdi. Onnan bir uwıs alıp, onı azanda beriletug'ın jandırılatug'ın qurbanlıqqa qosa qurbanlıq orınnın' u'stinde tu'tetip jandırdı.

¹⁸ Xaron xalıqtın' tatıwlıq qurbanlıg'ı ushın alıp kelgen bug'ası menen qoshqarın da shaldı. Ulları qurbanlıqlardın' qanın og'an a'kelip berdi. Ol qandı qurbanlıq orınnın' to'rt qaptalına serpip jiberdi.

¹⁹ Xaronnın' ulları bug'a menen qoshqardın' mayın, yag'nıy quyrıq mayın, ishekqarınlarındag'ı mayların, eki bo'tekesin ha'm bawırının' to'mengi ushın

²⁰ to'slerdin' u'stine qoydı. Xaron usı maylı bo'leklerdi alıp, qurbanlıq orında tu'tetip jandırdı.

²¹ Sonnan keyin, Muwsanın' buyırg'anınday, ol to'slerdi ha'm on' sandı Jaratqan İyenin' aldında joqarı ko'terip usındı.

²² Xaron gu'na, jandırılatug'ın ha'm tatıwlıq qurbanlıqların berip bolg'annan son', qolların jayıp, xalıqqa pa'tiya berdi. Sonnan son', ol to'menge tu'sti.

²³ Muwsa menen Xaron Ushırasıw shatırına kirdi ha'm olar sırtqa shıqqannan son', xalıqqa pa'tiyasın berdi. Sonda Jaratqan İyenin' saltanatı pu'tkil xalıqqa ko'rindi

²⁴ ha'm Jaratqan İyenin' otı payda bolıp, qurbanlıq orınnın' u'stindegi jandırılatug'ın qurbanlıqtı ha'm maylardı jandırıp jiberdi. Bunı ko'rgen pu'tkil xalıq shadlanıp baqırısıp, et betinen jerge jıg'ıldı.