Amos 2 bob
1 Jaratqan İye bılay deydi: «Moab jınayat u'stine jınayat isledi, Men jazasız qaldırmayman olardı. Olar Edom patshasının' su'yeklerin, Ha'k ku'ydirgendey etip jag'ıp jiberdi.
2 Sonın' ushın, Moabqa ot jawdıraman, Ot jandırıp, joq etedi Keriyot qorg'an qalasın. Shawqım, sawash dabılları ha'm ka'rnay sesleri astında, Moab xalqı qırılıp ketedi.
3 Onın' hu'kimdarın joq qılaman, Ha'meldarı menen birge barlıq xızmetshilerin o'ltiremen». Bular Jaratqan İyenin' so'zleri.
4 Jaratqan İye bılay deydi: «Yahuda jınayat u'stine jınayat isledi, Jazasız qaldırmayman olardı. Jaratqan İyenin', Menin' nızamlarımnan olar bas tarttı, Qag'ıydalarımdı orınlamadı. Ata-babaları sıyaqlı jalg'an qudaylarg'a erip, Tuwrı joldan azg'ırıldı.
5 Sonın' ushın, Yahudag'a ot jawdıraman, Ot jandırıp joq etedi Erusalim qorg'an qalasın».
6 Jaratqan İye bılay deydi: «İzrail jınayat u'stine jınayat isledi, Jazasız qaldırmayman olardı. Ayıpsız adamdı pulg'a sattı, Ka'mbag'aldı bir jup ayaq kiyimge almastırdı.
7 Olar jarlının' basın topıraqqa bılg'ap, ayaq astı qıldı, Biysharag'a jol bermey, shetke shıg'arıp tasladı, A'kesi menen balası bir qız benen jatıp, Menin' muxaddes atıma til tiygizdi.
8 Ha'r bir qurbanlıq orınnın' qasında, Girewge alg'an kiyimlerdi jayıp, u'stinde jatadı. Ja'riyma qılıp to'letken sharaptı, O'zlerinin' Qudayının' u'yinde ishedi.
9 O'z xalqım ushın Men amor xalqın joq qıldım. Olar kedr ag'ashınday uzın, Emen ag'ashınday bekkem bolsa da, Shaqalarındag'ı miywelerin, Jerdegi tamırların qurttım.
10 Sizlerdi Mısır jerinen Men alıp shıqtım, Amor xalqının' jerlerin iyelesin dep, Sho'lde qırıq jıl jeteledim.
11 Ulların'ızdan payg'ambarlar, Jas jigitlerin'izden Mag'an bag'ıshlang'an na'zirler tayınladım. Solay emes pe, İzrail xalqı?» Bular Jaratqan İyenin' so'zleri.
12 «Sizler na'zirlerge sharap ishtirdin'iz, Payg'ambarlarg'a „Payg'ambarshılıq qılman'!“ Dep buyrıq berdin'iz.
13 Awır ju'k tiyelgen arba jerdi ezgenindey etip, Men sizlerdi ezemen.
14 Sonda shaqqanlar qashıp qutıla almaydı, Ku'shlilerdin' ku'sh-quwatı qalmaydı, Jawıngerler o'z janın qutqara almaydı.
15 Sadaqshı o'z ornında tura almaydı, Tez juwıratug'ınlar qasha almaydı, Atlı o'z janın qutqara almaydı.
16 Sol ku'ni en' da'w ju'rek jawınger de, O'z qural-jaraqların taslap qashadı». Bular Jaratqan İyenin' so'zleri.
