Yunus 1 bob
1 Jaratqan İye Amittay ulı Yunusqa bılay dedi:
2 «Qa'nekey, ullı Nineviya qalasına bar da, xalqına waz ayt. Sebebi olardın' jawızlıqları Mag'an jetip keldi».
3 Biraq Yunus Jaratqan İyeden Tarshishke qashpaqshı boldı. Ol Yafo qalasına kelip, Tarshishke baratug'ın bir kemeni taptı. Jol haqısın to'lep, kemege otırdı da, Jaratqan İyenin' na'zerinen qashıw ushın, Tarshishke qaray jolg'a shıqtı.
4 Sonda Jaratqan İye ten'izge ku'shli samal jiberdi. Ten'izde qa'ha'rli dawıl ko'terilip, keme shıl-pa'rshe bolıp sınıp keteyin dep qaldı.
5 Kemeshilerdi qorqınısh biylep, ha'r biri o'z qudayına dawıslap jalbarına basladı ha'm kemeni jen'illetiw ushın ju'klerdi ten'izge tasladı. Yunus bolsa, kemenin' to'mengi qabatına tu'sip jatıp, teren' uyqıg'a ketken edi.
6 Keme basshısı Yunustın' janına barıp: «Ha'y! Sen qalay uyıqlap atırsan'? Tur, o'z qudayın'a jalbarın. Mu'mkin, ol bizlerdi esine alar ha'm bizler aman qalarmız», – dedi.
7 Son'ınan kemeshiler bir-birine: «Kelin'ler, shek taslayıq ha'm bul apat basımızg'a kim sebepli tu'skenin bileyik», – dedi. Olar shek tasladı ha'm shek Yunusqa tu'sti.
8 Olar Yunustan: – Bizlerge ayt, bul apat bizlerdin' basımızg'a sen sebepli tu'sken joq pa? Ka'sip-ka'rin' ne, qayaqtan kiyatırsan'? O'zin' qay jerlisen' ha'm qaysı milletke tiyislisen'? – dep soradı.
9 Yunus: – Men evreymen, ten'izdi ha'm jerdi jaratqan aspannın' Qudayı Jaratqan İyege sıyınaman, – dep juwap berdi.
10 Kemeshilerdi qattı qorqınısh biylep, olar Yunustan: «Nege bulay isledin'?» – dep soradı. Olar Yunustın' Jaratqan İyeden qashıp kiyatırg'anın biletug'ın edi. O'ytkeni Yunus olarg'a bunı aytıp bergen edi.
11 Ten'iz qutırıwın kem-kemnen ku'sheyte berdi. Olar Yunustan: – Ten'izdin' tınıshlanıwı ushın bizler sag'an ne islewimiz kerek? – dep soradı.
12 Ol: – Meni ko'terip, ten'izge ılaqtırın', sonda ol tınıshlanadı. Sebebi bul ku'shli dawılg'a men sebepli duwshar bolg'anın'ızdı bilemen, – dep juwap berdi.
13 Kemeshiler qurg'aqlıqqa jetiw ushın bar ku'shlerin salıp eskek esse de, biraq jete almadı. O'ytkeni ten'iz olarg'a qarsı qutırıwın kem-kemnen ku'sheyte berdi.
14 Sonda olar Jaratqan İyege dawıslap bılay dedi: «O, Jaratqan İye! Sag'an jalbarınamız, usı adamnın' janı sebepli bizler nabıt bolmayıq. Eger ol ayıpsız bolsa, onın' qanı ushın bizlerdi juwapker qılma. Sebebi Sen, Jaratqan İye, O'zin'e maqul bolg'an isti isledin'».
15 Son'ınan olar Yunustı ten'izge ılaqtırıp jiberdi. Sonda qutırıp turg'an ten'iz tınıshlandı.
16 Bul waqıya sebepli kemeshiler Jaratqan İyeden qattı qorqıp qaldı ha'm Og'an arnap qurbanlıq shalıp, wa'deler berdi.
