Mixa 6 bob
1 Jaratqan İyenin' aytqan mına so'zine qulaq salın': «Qa'ne, turın'! Shag'ımın'ızdı tawlar aldında aytın', To'beshikler dawısın'ızdı esitsin».
2 Ha'y, tawlar Jaratqan İyenin' ayıplawına qulaq salın'! Ha'y, jer ju'zinin' bekkem tiykarları Og'an qulaq tu'rin', Sebebi Jaratqan İye O'z xalqına qarsı dawın aytar, İzrail xalqı menen tartısar.
3 Jaratqan İye bılay deydi: «Ha'y, xalqım, Men sag'an ne qıldım? Qa'ne, juwap ber, sag'an qanday awırmanlıg'ım tu'sti?!
4 Mısırdan seni alıp shıqqan edim, Azat etken edim qullıq moyıntırıg'ınan. Sag'an jolbasshı bolsın dep, Muwsanı, Xarondı ha'm Ma'riyamdı jibergen edim.
5 Ha'y, xalqım, Moab patshası Balaqtın' sizlerge qarsı jawız niyetin, Beor ulı Bilamnın' og'an qalay juwap bergenin esle. Shittimnen Gilgalg'a deyingi bolg'an waqıyalardı esle, Sonda bilip alasan' seni qanday etip qutqarg'anımdı».
6 Jaratqan İyenin' aldına ne alıp barayın? Joqarıdag'ı Qudayg'a qalay sıyınayın? Og'an arnap jandırılatug'ın qurbanlıq bereyin be? Bir jasar tananı usınayın ba?
7 Og'an arnap mın'lap qoshqarlardı soysam, Za'ytu'n mayın da'rya qılıp ag'ızsam, Jaratqan İyenin' mennen kewli tolar ma eken? Ayıbım ushın tun'g'ısh ulımdı bereyin be? Gu'nam ushın o'z perzentimdi qurban eteyin be?
8 Ha'y, adamzat, nenin' jaqsı ekenin, Jaratqan İye bildirdi sag'an, Onın' sennen talap qılatug'ını ibaratdur mınadan: A'dillik qılıp, su'yispenshilikke sadıq bol, Mu'la'yim bolıp, Quday menen birge ju'r.
9 Jaratqan İye qala xalqına dawıslap bılay deydi, Og'an qulaq salıw – danalıqdur: «Ha'y, tın'lan', xalıq ha'm qala ja'miyeti!
10 U'ylerin haram baylıq penen toltırıp atırg'anlarg'a, Ta'reziden jep atırg'anlarg'a qalay itibar bermeyin.
11 Ta'reziden jegenine, Nadurıs o'lshem tas qollang'anına, Qalay shıday alaman?
12 Zorlıq qıladı qaladag'ı baylar, Jalataydur qala xalqı da, Tillerinen bolsa jalg'an so'zler shıg'ar.
13 Sonın' ushın, Men sizlerdi uraman, Gu'naların'ız ushın wayran qılaman.
14 Sizler jeysiz, biraq toymaysız, Ha'mme waqıtta ash qaladı qarnın'ız. Zat jıynaysız, onı saqlay almaysız, Jıynap-tergenin'izdi qılısh penen joq qılaman.
15 Egesiz, biraq orıp almaysız, Za'ytu'n mayın sıg'ıp alasız, Biraq maydan u'stin'izge su'rte almaysız, Ju'zim iskenjede ju'zim sıg'asız, Biraq onın' sharabınan ishe almaysız.
16 O'ytkeni erdin'iz patsha Omriydin' u'rp-a'detlerine, Patsha Axabtın' a'wladının' jawız qılmıslarına. Olardın' ma'sla'ha'ti menen jasadın'ız, Sonlıqtan Men sizlerdi joq qılaman. Sizlerdi ko'rgenler u'stin'izden ku'lip, Barlıq xalıqlardın' tabasına qaladı».
