Mixa 7 bob
1 Wah, sorım qurıdı! Ju'zimzar jıyın-terimi bolınıp, Jazg'ı miyweler terip alıng'annan son', Shaqalarınan jewge bir solqım da taba almag'an, Bir dana a'njirge zar bolg'an adam sıyaqlıman.
2 Bul elde Qudayg'a sadıq adam qalmadı, Durıs ju'rgen hesh kim qalmadı adamlar arasında. Qan to'giw ushın adamlar an'ılar buqqıda, Duzaq quradı tuwısqanlar birbirine.
3 Jamanlıq qılıwg'a sheberdur olar, Ha'meldar ha'm qazı para aladı. Ku'shli adam qa'legenin zorlıq penen qıldıradı, Birgelikte haqlıqtı buzıp ko'rsetedi.
4 Olardın' en' jaqsısı jantaqqa uqsaydı, Hu'jdanlısı bolsa, tikenekten beter. Biraq sizler ku'tip turg'an ku'nleri, Jetip keldi jazalanatug'ın ku'nleri, Endi olar sasqalaqlap qaladı.
5 İsenben' qon'sın'ızg'a, su'yenben' dostın'ızg'a. Qoynın'ızda hayalın'ız jatqanda, Qum quyın' awzın'ızg'a.
6 O'ytkeni sol waqıtları ul o'z a'kesin xorlaydı, Qız anasının' betinen aladı, Kelin bolsa, qa'yin enesine qarsı turadı. Adamnın' dushpanları o'z u'y-ishi boladı.
7 Biraq men Jaratqan İyege ko'z tigemen, Qutqarıwshım bolg'an Qudaydı u'mit penen ku'temen, So'zsiz esitedi meni Qudayım menin'.
8 Jag'dayımdı ko'rip, shad bolman', ha'y, dushpanlarım! Jıg'ılsam da, o'zim turaman. Qaran'g'ılıqta qalsam da, Jaratqan İye mag'an nur boladı.
9 Jaratqan İyege qarsı gu'na isledim. Endi Onın' g'a'zebine shıdayman. Biraq Ol meni jaqlap, aqlaydı. Jarıqlıqqa meni alıp shıg'adı, Sonda Onın' a'dilligin ko'remen.
10 Dushpanım bunı ko'redi, «Qudayın' Jaratqan İye qay jerde?» – dep masqara qılg'an, Sol dushpanım shermende boladı. Onın' qulawın o'z ko'zim menen ko'remen, Solay etip, ayaq astı boladı ko'shedegi batpaq sıyaqlı.
11 Ha'y, Erusalim, mınaday waqıt keledi: Senin' diywalların' qayta qurıladı, Shegaran' senin' ken'eyip ketedi.
12 Sol waqıtta ha'mme jerden xalıqlar keledi. Assiriyadan Mısırg'a deyin, Mısırdan Evfrat da'ryasına deyin sozılg'an jerlerden, Uzaq ten'iz boylarınan ha'm alıs taw janbawırlarınan, Ag'ıp keledi ko'p xalıqlar.
13 Biraq ishinde jasap atırg'anlardın' qılmıslarınan, Du'nya ju'zi qan'ırap bosap qaladı.
14 Jaratqan İye, xalqın'nın' shopanı bol, A'tirapları o'nimdarlı jerler, Biraq tog'ay ishinde jalg'ız jasaytug'ın su'riwin'di, O'z hasan' menen basqara go'r. Uzaq o'tmishte bolg'anınday, Bashan ha'm Gilad jaylawlarında otlata go'r.
15 Bizlerdi Mısırdan alıp shıqqan ku'nlerin'degidey, Ka'ramatların'dı ko'rset xalqın' ushın.
16 Ka'ramatların'dı ko'rgen milletler, Ku'sh-qu'diretlerine jarasa shermende boladı. Qorqınıshtan qolları menen awızların basıp, Qulaqları olardın' geren' bolıp qaladı.
17 Jılan ha'm jer bawırlawshılar sıyaqlı topıraq jalaydı olar, Qorqqanınan titirep qorg'anlarınan shıg'adı. Qudayımız Jaratqan İye, olar hu'reyi ushıp, Qaltırap Senin' aldın'a keledi.
18 Quday, Sag'an uqsası bar ma eken? O'z xalqın'nın' qalg'anlarının', Jınayatların ha'm ko'terilislerin keshiretug'ın basqa Quday joqdur. Ma'n'gige g'a'zeplenbessen' xalqın'a, Sebebi sadıq miyrimin'di ko'rsetiwdi maqul ko'resen'.
19 Sen bizlerge ja'ne miyrim-sha'pa'a't qılarsan', Ezip taslarsan' ayıplarımızdı ayag'ın' astında, Pu'tkil gu'nalarımızdı ten'iz tu'bine ılaqtırasan'.
20 O'tmishte ata-babalarımızg'a, İbrayımg'a ha'm Yaqıpqa ant iship, wa'de bergensen', Olardın' urpag'ına bergen haqıyqat so'zin'de sadıq turasan'.
