Naxum 2 bob
1 Basqınshılar bastırıp kiyatır, ha'y Nineviya, qorg'anın'dı bekkemle, Jollardı qadag'ala, belin'di bekkem buwıp, bar ku'shin'di jıyna.
2 Dushpanları İzraildı tas-talqan etip, Ju'zimbag'ların wayran etken edi. Biraq Yaqıptın' aldıng'ı ullılıg'ın qayta tiklegendey etip, Jaratqan İye İzraildın' ullılıg'ın da qayta tikleydi.
3 Nineviya, dushpanın'nın' a'skerlerinin' qalqanı qıp-qızıldur, La'shkerlerinin' kiyimi qırmızı ren'dur, Sawash arbaları sawash ku'ni jalınday jaltıldaydı, Nayzaları hawada shayqalıp turadı.
4 Ko'sheler boylap jelip ushar sawash arbaları, Zuwıldaydı qala maydanlarında arman-berman, Janıp turg'an shom sıyaqlı ot shıg'arıp, jıldırım sıyaqlı jarqıraydı.
5 Sa'rka'rdası la'shkerbasıların jıynaydı, Alg'a basqanda, olar o'z jolında asıg'adı. Qalqanların o'zlerine pana qılıp, Qala diywalına japırıladı.
6 Da'rya bo'getleri ashıladı, Saray suw menen shayılıp, jer menen jeksen boladı.
7 Aldın ala ja'riyalang'anday su'rgin etiler Nineviya, Onın' shorıları kepterdey nala sheger, O'kinishten olar ko'kiregine urar.
8 Nineviya qalası suwı jıg'ıp ketken hawız yan'lı, Qashıp keter ishindegi xalıqlar, Artınan: «Toqtan'lar, toqtan'lar!» dep baqırar, Biraq qayrılıp qaramas hesh kim artına.
9 Tonalg'an gu'mis menen altını, Tawısılmaydı Nineviyanın' qımbatbaha zatları, Ol tolıdur ha'r tu'rli g'a'ziynege.
10 Quladı, jer menen jeksen bolıp, wayran boldı Nineviya. Qorqınıshtan ruwxları tu'sip ketti, Dizeleri qaltırap, titirep ketti deneleri, Solg'ın tartıp, bozardı ha'r birinin' ju'zi.
11 Ne bolıp qaldı arıslan inine uqsag'an Nineviyag'a? Arıslan o'z balaların baqqan sol jerge. Arıslan ha'm ana arıslan ju'rgen waqıtta, Qa'wip-qa'tersiz edi olardın' balaları.
12 Arıslan jeterlishe an' awlag'an edi balaları ushın, Ana arıslan ushın oljaların bawızlag'an edi. Awlag'an awları menen o'z inin, Oljalar menen toltırg'an edi o'z uyasın.
13 A'lemnin' Jaratqan İyesi bılay deydi: «Sag'an qarsıman, ha'y, Nineviya! Sawash arbaların'dı jandırıp jiberemen. Jas arıslanların' qılıshtan o'ledi. Endigiden bılay, sen tonawshılıq qıla almaysan'. Xabarshıların'nın' dawısı artıq esitilmeydi».
