1 Ha'siret shegesen', ha'y, qolları qan qala! Jalg'ang'a ha'm talan-taraj etilgen zatlarg'a tolg'an qala. Ol jerdegi tonawshılıq hesh qashan tawısılmas.
2 Esitiler qamshının' tarsıldısı ha'm do'n'geleklerdin' du'sirlisi, Shawıp baratırg'an at tuyaqlarının' dawısı, Sawash arbalarının' tasır-tusırlısı.
3 Hu'jimge kirdi atlı a'skerler, Qılıshlar jalt-jult eter, nayzalar jıltırar, U'yilip ketti o'li deneler, Sansız bolıp ketti o'likler, Bularg'a su'rnigip atır adamlar.
4 Sen, suyıq ayaqlıq penen sheksiz buzıqshılıq qılg'an sıyqırshı hayalsan', Buzıqlıg'ın' menen xalıqlardı o'zin'e tutqın qılıp, Sıyqırshılıg'ın' menen o'zin'e qul etken edin'.
5 A'lemnin' Jaratqan İyesi bılay deydi: «Sag'an qarsıman, ha'y Nineviya! Men senin' ko'ylegin'nin' etegin joqarı ko'terip, Milletlerge jalan'ash denen'di ko'rsetip, Patshalıqlardın' aldında shermende qılaman.
6 U'stin'e taslandı taslap, seni xorlayman, Adamlarg'a tamasha bolasan' sen
7 Seni kim ko'rse de artqa sheginip, bılay deydi: „Wayran boldı Nineviya, Ol ushın kimnin' janı ashıydı eken?“ Seni jubatatug'ın hesh kim joq».
8 Mısırdın' bas qalası Tebesten senin' qay jerin' artıq edi? Da'rya boyında jaylasqan edi sol qala da, Suw menen qorshalıp, qorg'anı Nil da'ryası edi, Suwlar onın' qorg'an diywalları bolg'an edi.
9 Kush ha'm Mısır onın' sheksiz ku'shinin' bulag'ı edi, Put ha'm Liviya da onın' awqamlasları edi.
10 Solay bolsa da, Tebes xalqı su'rgin etilip, tutqıng'a alıp ketildi, Ha'r bir ko'shenin' basında tasqa urıp o'ltirildi na'resteleri. Aqsu'yek bekleri ushın shek taslandı, Shınjır menen kisenlendi barlıq ullı adamları.
11 Ha'y, Nineviya, sen de ma's bolıp, tentireklep ju'resen', Sen de dushpanların'nan jasırınatug'ın jer izleysen'.
12 Senin' barlıq qorg'anların', A'njir ag'ashının' birinshi pisken miywesine megzer. Ag'ashtı silkitkende, a'njirler jeytug'ınnın' awzına tu'ser.
13 A'skerlerin'e qara! Hayal adamnan parqı joq olardın', Da'rwazaların' dushpanlar ushın ken' ashılar. Ot jag'ıp joq qıldı da'rwazaların'nın' ta'mbilerin.
14 Qamalg'a tu'setug'ın waqtın' ushın suwın'dı toltır, Bekkemle qorg'anların'dı! Gerbish tayarlaw ushın ılaydı iyle, Quyatug'ın qa'liplerin'di tayarla.
15 Ba'ri bir ot jalmap seni jutıp jiberedi, Qılısh seni qırıp taslaydı. Jas shegirtkeler eginlerdi jep joq qılg'anday, Dushpanların' seni joq qıladı. Sizler shegirtkelerdey ko'beye berin'ler!
16 Aspandag'ı juldızlardan da ko'p sawdagerlerin', Olar jas shegirtkeler yan'lı elin'di talan-taraj eter, Keyin qanat qag'ıp ushıp keter.
17 Senin' hu'kimdar ha'm xızmetkerlerin', Suwıq ku'nde diywallarg'a qonatug'ın, Al quyash shıqqanda ushıp ketip, g'ayıp bolatug'ın shegirtkelerge uqsaydı.
18 Ha'y, Assiriya patshası, el basqarıwshıların' o'ldi, Aqsu'yeklerin' bolsa, ma'n'gi uyqıg'a ketti, Tarap ketti xalqın' tawlarg'a. Olardı jıynaytug'ın hesh kim qalmadı.
19 Jaraqatın'nın' dawası joq, jaraların' o'limge alıp barar. Senin' awhalın'dı esitken barlıq adamlar, Shadlanıp qolların shappatlar. O'ytkeni senin' sheksiz jawızlıg'ın'nan azap shekpegen adam bar ma edi? Hesh kim qashıp qutıla almag'an edi.
