Sefaniya 3 bob
1 Ha'siret shegedi, boysınbaytug'ın ha'm haramlang'an qala, Eziwshilerge tolı qala!
2 Ol hesh qulaq salmadı, O'zine sabaq almadı, Jaratqan İyeden u'mit etpedi, O'z Qudayına bet burmadı.
3 Qala hu'kimdarları aqırg'an arıslan yan'lı, Qazılar tu'nde gezip ju'rgen ash qasqırlar sıyaqlı, Olar tan'g'a deyin oljadan hesh na'rse qaldırmaydı.
4 Payg'ambarları ta'kabbir ha'm biyopa, Ruwxaniyleri muxaddes na'rseni haramlaydı, Olar Qudaydın' nızamın buzadı.
5 Biraq a'dil Jaratqan İye ele sol qalada, Ol nahaqlıq qılmaydı, Ha'r ku'ni azanda a'dalatlıg'ın ju'zege asıradı, Ha'r tan'da bunı toqtatpaydı. Degen menen, nahaqlar uyat degendi bilmeydi.
6 Jaratqan İye bılay deydi: «Men xalıqlardı joq ettim, Qorg'anların qulattım, Ko'shelerin wayran qıldım, endi olardan hesh kim ju'rmeydi, Qalaları wayran bolıp, bosap qaldı, Birde bir adamzatı qalmadı.
7 Xalqım Mennen qorqar, Bunnan o'zine sabaq alar, dep oyladım. Sonday qılg'anda, ma'kanlag'an jerine tiymegen bolar edim, Beretug'ın jazama ushıramag'an bolar edi. Degen menen, olar ha'r bir isinde gu'na islewge ha'wes edi.
8 Endi Meni ku'tin'ler, – deydi Jaratqan İye, – Xalıqlardı tonaytug'ın ku'nimdi ku'tin'ler. Men xalıqlardı jıynawdı, Patshalıqlardı bir jerge toplawdı sheshtim. Olardın' u'stine otlı g'a'zebimdi, Ku'shli qa'ha'rimdi shashaman. Otlı qa'ha'rim pu'tkil jer ju'zin jandırıp taslaydı.
9 Keyin Men barlıq xalıqlardın' awızların pa'kleymen, Sonda olar Menin' atımdı aytıp shaqırıp, Birgelikte Mag'an xızmet etedi.
10 Shashırap ketken, Mag'an sıyınatug'ın xalqım, Kush elindegi da'ryalardın' arg'ı jag'ınan, Mag'an sıylar alıp keledi.
11 Ha'y, Erusalim, Mag'an qarsı shıqqan qozg'alan'ların' ushın, Sol ku'ni uyalıp qalmaysan', O'ytkeni sendegi menmen ha'm maqtanshaqlardı joq qılaman. Muxaddes tawımda sen hesh qashan ja'ne ko'kirek ko'termeysen'.
12 Sendegi kishipeyil ha'm qarapayım adamlardı qaldıraman, Olar Jaratqan İye bolg'an Menin' atımnan pana tabadı.
13 İzraillılardan aman qalg'anları nahaqlıq qılmaydı, Jalg'an so'ylemeydi, Hesh kimdi aldamaydı, Olar qoylarday tınısh otlaydı, jatadı, Olardı qorqıtatug'ın hesh kim bolmaydı».
14 Ha'y, qız Sion, shadlanıp qıshqır! Ha'y, İzrail, quwanıshlı tu'rde baqır! Shın ju'rekten shadlanıp, yosh, Ha'y, qız Erusalim!
15 Jaratqan İye sag'an qarsı hu'kimdi alıp tasladı, Dushpanların'dı quwıp jiberdi. İzraildın' Patshası Jaratqan İye senin' ishin'de. Endi qaytıp apattan qorqpaysan'.
16 Sol ku'ni Erusalimge mınaday so'zler aytıladı: «Qorqpa, ha'y, Sion, qolların' bosaspasın.
17 Qudayın' Jaratqan İye senin' ishin'de, Ol qu'diretli qutqarıwshı. Ol sizlerdi dep quwanıp, shadlanadı, Su'yispenshiligi menen sizlerdi jubatadı, Sen ushın ba'lent dawıs penen shadlanadı».
18 «Ha'y, su'rgin bolıp, bayramlardan bos qalg'anlar, Sizler qapa bolg'an edin'ler, Endi Men sizlerden apattı alıp taslayman, Bunnan bılay, masqara bolmaysız.
19 Mine, sizlerge zulım qılg'anlardı O'zim jazalayman, Aqsag'anlardı qutqarıp, tarap ketkenlerdi jıynap alaman. Shermende bolg'an ellerinde, Olardı abıray ha'm hu'rmetke eristiremen.
20 Sol waqıtta Men sizlerdi jıynap, Elin'izge jetelep, alıp kelemen. Sizlerdi ja'ne abadanshılıqqa eristiremen, Bunı o'z ko'zin'iz benen ko'resiz, Du'nyadag'ı barlıq xalıqlardın' aldında, Sizlerdi hu'rmet ha'm abırayg'a eristiremen», – deydi Jaratqan İye.
