Xaggay 2 bob
1 Sol jıldın' jetinshi ayının', jigirma birinshi ku'ni Jaratqan İyeden payg'ambar Xaggayg'a mınaday so'z tu'sti:
2 – Yahuda ha'kimi Shealtiel ulı Zerubbabelge, bas ruwxaniy İosadaq ulı Eshuag'a ha'm qalg'an xalıqqa bılay dep ayt:
3 «Sizlerdin' aran'ızda usı İbadatxananın' burıng'ı saltanatın ko'rgen adam bar ma? Ha'zirgi ko'rinisi qanday? Burıng'ıg'a salıstırg'anda, ha'zir hesh na'rse emestey bolıp ko'rinip turg'an joq pa?
4 Endi sen, ha'y, Zerubbabel, jigerlen! – deymen Men, Jaratqan İye. Ha'y, bas ruwxaniy İosadaq ulı Eshua, jigerlen! Ha'y, eldegi pu'tkil xalıq, jigerlenin'! – deymen Men, Jaratqan İye. Jumısqa kirisin'ler! Sebebi Men sizler menen birgemen! – dep Jaratqan İyen'iz bolg'an Men aytıp atırman.
5 Mısır jerinen shıqqanın'ızda, sizler menen du'zgen kelisimim boyınsha, Menin' Ruwxım sizlerdin' aran'ızda boladı. Qorqpan'lar!»
6 A'lemnin' Jaratqan İyesi bılay deydi: «Tez arada aspan ha'm jerdi, ten'iz ha'm qurg'aqlıqtı ja'ne silkindiremen.
7 Barlıq xalıqlardı titiretemen ha'm olar bahalı buyımların usı jerge alıp keledi, – dep Jaratqan İye bolg'an Men aytaman. Men usı İbadatxananı saltanatqa bo'leymen.
8 Gu'mis te, altın da Meniki, – dep A'lemnin' Jaratqan İyesi bolg'an Men aytaman.
9 Keleshekte bul İbadatxananın' saltanatı aldıng'ısınan da ullı boladı. Sol jerge tınıshlıq beremen. Bunı A'lemnin' Jaratqan İyesi bolg'an Men aytaman».
10 Dariydin' patshalıg'ının' ekinshi jılında, tog'ızınshı aydın', jigirma to'rtinshi ku'ni Jaratqan İyeden payg'ambar Xaggayg'a mınaday so'z tu'sti:
11 «A'lemnin' Jaratqan İyesi bılay deydi: „Ruwxaniylerge Nızamg'a baylanıslı mına sorawdı ber:
12 Eger aran'ızdag'ı birin'iz qurbanlıqtan alıng'an muxaddes go'shti kiyiminin' etegi menen alıp baratırg'an bolsa, onın' etegi nang'a, sorpag'a, sharapqa, za'ytu'n mayına yamasa basqa bir awqatqa tiyip ketse, sol awqat muxaddes bola ma?“» Xaggay usı sorawdı bergende, ruwxaniyler: «Yaq», – dep juwap berdi.
13 Xaggay so'zin dawam etip, bılay dedi: «O'lige bir jerin tiygizip, haram sanalg'an bir adam usı awqatlardın' birewine bir jerin tiygizip alsa, sol awqat haram sanala ma?» Ruwxaniyler: «Awa, haram sanaladı» – dep juwap berdi.
14 Sonda Xaggay bılay dedi: «Jaratqan İye: „Bul xalıq, usı millet Menin' ko'z aldımda da sonday. Olardın' ha'r bir islegen isleri, qurbanlıq orında usıng'an ha'r bir qurbanlıqları da haram“, – deydi.
15 Endi bu'gingi ku'nnen baslap neler bolg'anın oylanıp ko'rin'. Jaratqan İyenin' İbadatxanasının' tasın o'rip baslamasın'ızdan aldın neler bolg'anı haqqında jaqsılap oylanıp ko'rin'.
16 Qırmang'a jigirma o'lshem da'n alaman dep barg'anın'ızda, onnan tek g'ana on o'lshem da'n shıg'atug'ın edi. Sharap sıg'atug'ın iskenjeden eliw gu'ze sharap alaman dep barg'anın'ızda bolsa, onnan tek g'ana jigirma gu'ze sharap shıg'atug'ın edi.
17 O'ytkeni Men sizlerdin' qol miynetin'izdi quwrap qalıw, keselleniw ha'm burshaq penen jazaladım. Sonda da, Mag'an qaytıp keliwden bas tarttın'lar, – deymen Men, Jaratqan İye.
18 Bu'gin, tog'ızınshı aydın' jigirma to'rtinshi ku'ninen baslap, Jaratqan İyenin' İbadatxanasının' tırnag'ın qaytadan salıp baslag'an ku'nnen baslap neler bolıp atırg'anına dıqqat salıp, oylanıp ko'rin'ler.
19 G'a'llexanada bir tuqım qalıp pa edi? Ju'zim, a'njir, anar ha'm za'ytu'n ag'ashı bu'ginge deyin miywesin berip pe edi? Biraq bu'ginnen baslap, Men sizlerdi jarılqayman».
20 Sol aydın' jigirma to'rtinshi ku'ni Jaratqan İyeden Xaggayg'a ekinshi ma'rte mınaday so'z tu'sti:
21 «Yahuda ha'kimi Zerubbabelge bılay dep ayt: „Men aspan menen jerdi silkindiremen.
22 Patshalıqlardı qulataman, jat xalıqlardın' ku'shin joq qılaman. Sawash arbaların olardın' u'stinde otırg'anlar menen qosıp, awdarıp taslayman. Atlar ha'm shabandozları jıg'ıladı, olardın' ha'mmesi bir-birinin' qılıshınan o'ledi“».
23 «Sol ku'ni seni, – deymen A'lemnin' Jaratqan İyesi bolg'an Men, – O'z qolıma alaman, ha'y, Shealtiel ulı qulım Zerubbabel, – dep Jaratqan İye bolg'an Men aytaman. Seni O'zimnin' mo'r ju'zigim sıyaqlı qılaman, sebebi Men seni tan'ladım, – deymen Men, A'lemnin' Jaratqan İyesi».
