Zexariya 10 bob
1 Erte ba'ha'rde Jaratqan İyeden jawın tilen', Jawın bultların jiberetug'ın, Adamlarg'a jawın jawdıratug'ın, Dalalarda o'simlik o'siretug'ın Jaratqan İye boladı.
2 Butlardın' so'yleytug'ını o'tirik, Palkerlerdin' ashqan palı jalg'an, Olar ko'rmegen tu'slerin jalg'annan toqıydı, Paydası joq jubanısh so'zlerin aytadı. Sonın' ushın, bul xalıq su'riwdey gezip ju'r, Shopansız bolg'anı ushın azap shegip atır.
3 Jaratqan İye bılay deydi: «G'a'zebim shopanlarg'a qarsı lawladı, Jolbasshılardı jazalayman. A'lemnin' Jaratqan İyesi bolg'an Men O'z su'riwime, Yahuda xalqına g'amxorlıq qılaman. Olardı a'jayıp sawash atı sıyaqlı qılaman.
4 Ku'shli mu'yesh tası, shatırdın' qazıg'ı ha'm sawash quralınday, Barlıq basshılar Yahudadan shıg'adı.
5 Olar sawashta ko'shedegi batpaqtı basqılag'an jawıngerlerdey boladı, Jaratqan İye, Men olar menen birge bolg'anım ushın, Olar urısqa shıg'ıp, Dushpanının' atlıların shermende qıladı.
6 Yahuda xalqın ku'sheytemen, Yusup a'wladın qutqaraman, Olarg'a rehim qılaman, Su'rginnen qaytarıp alıp kelemen. Men olardan hesh qashan ju'z burmag'anımday boladı, Sebebi Men olardın' Qudayı Jaratqan İyemen, Olarg'a qulaq salaman.
7 Efrayım xalqı batır jawıngerlerdey boladı, Sharap iship alg'anday, ju'rekleri yoshadı. Balaları bunı ko'rip, shadlanadı, 0 Ju'rekleri Jaratqan İye sebepli quwanısh tabadı.
8 Shopanday shaqırıp, olardı jıynayman, Men olardı azat qılaman. Burıng'ıday, olar ja'ne ko'beyedi.
9 Olardı xalıqlardın' arasına tarqatıp jibersem de, Uzaq jerlerde Meni esleydi, Balaları menen birge aman qalıp, qaytıp keledi.
10 Olardı Mısırdan qaytarıp alıp shıg'aman, Assiriya jerinen jıynap alaman. Olar ko'beygenlikten, o'z elindegi jerlerge sıymaydı, Sonın' ushın, olardı Giladqa ha'm Lebanong'a alıp kelemen.
11 Xalqım apat ten'izinen o'tedi, Olar ten'izdin' tolqınların tınıshlandıradı, Nil da'ryasının' tu'bi qurıp qaladı. Assiriyanın' ta'kabbirligi basıladı, Mısır patshalıq hasasınan ayırıladı.
12 Xalqımdı O'z ku'shim menen qu'diretli qılaman, Olar Menin' atım menen ju'redi». Bular Jaratqan İyenin' so'zi.
