Zexariya 12 bob
1 Payg'ambarshılıq so'z. Bul Jaratqan İyenin' İzrail haqqında aytqan so'zleri. Ko'klerdi jayıp, jer ju'zinin' negizin qurg'an ha'm insang'a o'mir demin bergen Jaratqan İye bılay deydi:
2 «Erusalimdi do'geregindegi xalıqlardı ten'seldiretug'ın sharap kesesi qılaman. Erusalim sıyaqlı Yahuda da qamal ishinde qaladı.
3 Sol ku'ni Men Erusalimdi basqa xalıqlar ushın awır tastay qılaman, onı ko'teriwge ha'reket etkenler o'zlerin mayırıp qoyadı. Jer ju'zindegi barlıq xalıqlar Erusalimge qarsı birigedi.
4 Sol ku'ni, – deydi Jaratqan İye, – ha'r bir attı qorqınıshtan sasqalatıp, atqa mingenlerdi es-aqılınan ayıraman. Yahuda xalqına na'zerimdi salıp, basqa xalıqlardın' barlıq atların soqır qılıp taslayman.
5 Sonda Yahuda basshıları ishinen: „Qudayı bolg'an A'lemnin' Jaratqan İyesine u'mit baylag'an Erusalim xalqı ku'sh-qu'diret bulag'ımız“, – dep oylaydı.
6 Sol ku'ni Yahuda basshıların otınlardın' ortasında janıp turg'an bir shoq sıyaqlı, da'n bawlarının' arasında janıp turg'an bir shomday qılaman. Ol on' ha'm soldag'ı, do'gerektegi barlıq xalıqlardı jandırıp joq qıladı. Erusalim bolsa, saw-salamat o'z jerinde turadı.
7 Dawıt a'wladının' ha'm Erusalim turg'ınlarının' dan'qı Yahudadan asıp ketpewi ushın, Jaratqan İye bolg'an Men Yahuda ordasına aldı menen jen'is beremen.
8 Men, Jaratqan İye sol ku'ni Erusalim turg'ınların qorg'ayman. Solay etip, aran'ızdag'ı en' ha'lsiz adam Dawıttay ku'shli, Dawıt a'wladı bolsa Quday sıyaqlı, o'zlerine basshılıq etken Jaratqan İyenin' perishtesindey boladı.
9 Sol ku'ni Erusalimge qarsı hu'jim qılg'an barlıq xalıqlardı joq etiwge kirisemen.
10 Dawıttın' a'wladı menen Erusalim turg'ınlarına miyrim ha'm duwa etiw ruwxın jiberemen. Olar Mag'an, yag'nıy o'zleri denesin teskenge qaraydı. Olar jalg'ız ulı ushın aza tutqanday, azalaydı, tun'g'ısh ulı ushın zar jılag'anday, jılaydı.
11 Sol ku'ni Erusalimdegi aza Megiddo oypatlıg'ındag'ı Hadad-Rimmonda bolg'an aza sıyaqlı ju'da' u'lken boladı.
12 Pu'tkil el azalaydı. Ha'r bir a'wlad o'z aldına aza tutadı: Dawıt a'wladı o'z aldına, olardın' hayalları o'z aldına, Natan a'wladı o'z aldına, olardın' hayalları o'z aldına,
13 Lebiy a'wladı o'z aldına, olardın' hayalları o'z aldına, Shimey a'wladı o'z aldına ha'm olardın' hayalları o'z aldına aza tutadı.
14 Qalg'an barlıq a'wladlar da o'z aldına aza tutadı. Olardın' hayalları da o'z aldına aza tutadı».
