Zexariya 13 bob
1 «Sol ku'ni Dawıt a'wladın ha'm Erusalim turg'ınların gu'nadan ha'm haramılıqtan tazalaw ushın ag'ıp turg'an bir bulaq boladı.
2 Sol ku'ni elden butlardın' atların o'shiremen, artıq olar eske alınbaydı, – deydi A'lemnin' Jaratqan İyesi, – jalg'an payg'ambarlardı da, napa'k ruwxtı da joq qılaman.
3 Eger ja'ne birew payg'ambarshılıq qılatug'ın bolsa, onın' o'z tuwg'an ata-anası: „Sen o'lesen', sebebi Jaratqan İyenin' atı menen jalg'an so'ylep tursan'“, – deydi. Al ol payg'ambarshılıq etken jag'dayda, onın' o'z ata-anası onın' denesin tu'yrep, o'ltiredi.
4 Sol ku'ni ha'r bir jalg'an payg'ambar ayan ko'rip, payg'ambarshılıq etiwge uyalatug'ın boladı. Payg'ambardın' ju'nli kiyimin kiymeydi ha'm adamlardı qaytıp aldamaydı.
5 Onın' ornına ol: „Men payg'ambar emespen, diyxanman. Jaslıg'ımnan berli bir adamnın' qolında atızg'a qarayman“, – deydi.
6 Birew onnan: „Denen'degi jaralar qay jerden payda boldı?“ – dep sorag'anda, ol: „Bular doslarımnın' u'yinde arttırg'an jaralar“, – dep juwap beredi».
7 «Oyan, ha'y qılısh! Menin' shopanıma, Menin' jaqınıma qarsı shıq, – deydi A'lemnin' Jaratqan İyesi. – Shopandı urıp o'ltir, Qoylar tarqalıp ketsin. Men qozılarg'a qarsı qol ko'teremen.
8 Pu'tkil elde, – deydi A'lemnin' Jaratqan İyesi, – xalıqtın' u'shten ekisi qırılıp, joq boladı, U'shten biri aman qaladı.
9 Aman qalg'an u'shten birin ottan o'tkeremen, Olardı gu'mistey eritip, tazalayman, Altındı sınag'anday, sınayman. Olar Menin' atımdı aytıp shaqıradı, Men de olarg'a juwap beremen, „Bular Menin' xalqım“, – deymen, Olar da Meni: „Jaratqan İye – bizlerdin' Qudayımız“, – deydi».
