Zexariya 2 bob
1 Keyin men ja'ne na'zer tasladım ha'm qolında o'lsheytug'ın jibi bar bir adamdı ko'rdim.
2 Men onnan: – Qayaqqa baratırsız? – dep soradım. Ol mag'an: – Erusalimdi o'lshewge, eni ha'm uzınlıg'ı qansha shıg'atug'ının ko'riwge baratırman, – dep juwap berdi.
3 Keyin, menin' menen so'ylesip atırg'an perishte ketip baratır edi, basqa bir perishte aldınan shıg'ıp,
4 og'an bılay dedi: – Tez barıp, sol adamg'a ayt: «Erusalimde adam ha'm mallar sonshelli ko'p bolg'anlıqtan, diywallarının' ishine sıymay qaladı.
5 Menin' O'zim onın' do'geregindegi otlı diywalı, ishindegi saltanatı bolaman, – deydi Jaratqan İye».
6 «Qa'nekey, arqa ta'reptegi elden qashın'lar, – deydi Jaratqan İye. – Sebebi sizlerdi jerdin' to'rt ta'repine tarqatıp jiberdim, – deydi Jaratqan İye.
7 – Babilonda jasap atırg'an Sion xalqı, qashıp qutılın'lar».
8 A'lemnin' Jaratqan İyesi O'z dan'qı ushın meni sizlerdi tonag'an xalıqlarg'a jiberdi. Ol bılay deydi: «Sizlerge tiygen Menin' ko'zimnin' qarashıg'ına tiygen boladı.
9 Men olarg'a qarsı qolımdı ko'teremen. O'zlerine qul etken xalıqlar olardı tonaydı». Sonda sizler meni A'lemnin' Jaratqan İyesi jibergenin bilip alasızlar.
10 Jaratqan İye: «Ha'y, qız Sion, shadlanıp, baqır! Mine, Men sizlerdin' aran'ızda jasaw ushın kelemen.
11 Sol ku'ni ko'p milletler Jaratqan İyege, yag'nıy Mag'an qosılıp, Menin' xalqım boladı. Shınında, Men sizlerdin' aran'ızda jasayman», – deydi. Sol waqıtta meni A'lemnin' Jaratqan İyesi sizlerge jibergenin bilesiz.
12 Yahuda muxaddes jerdegi Jaratqan İyenin' mu'lki boladı, Erusalimdi ja'ne tan'lap aladı.
13 Ha'y, pu'tkil adamzat, Jaratqan İyenin' aldında u'nsizlik saqlan'! Ol O'zinin' muxaddes ma'kanınan shıg'ıp kiyatır!
