Zexariya 4 bob

Besinshi ayan: altın ha'ste ha'm za'ytu'n ag'ashları (1-14).

¹ Menin' menen so'ylesken perishte qaytıp kelip, uyqıdan oyatqanday etip meni oyattı.

² Ol mennen: – Neni ko'rip tursan'? – dep soradı. Men bılay dep juwap berdim: – Ha'mme jeri altınnan sog'ılg'an ha'steni ko'rip turıppan, onın' joqarısında za'ytu'n mayına arnalg'an bir tostag'an turıptı. Ha'stenin' jeti shırası ha'm olardın' jeti tu'tikshesi bar.

³ Sonday-aq, ha'stenin' qasında eki za'ytu'n ag'ashı bar. Birewi tostag'annın' on' ta'repinde, ekinshisi sol ta'repinde turıptı.

⁴ Men o'zim menen so'ylesip atırg'an perishteden: – Bulardın' ma'nisi ne, mırzam? – dep soradım.

⁵ Ol: – Bulardın' ma'nisin bilmeysen' be? – dedi. Men: – Yaq, mırzam, – dep juwap berdim.

⁶ Sonın' ushın, ol mag'an mınalardı aytıp berdi: – Jaratqan İye Zerubbabel ushın mına so'zlerdi ayttı: «Ku'sh ha'm qu'diret penen emes, al Menin' Ruwxım menen tabısqa erisesen'. Bul A'lemnin' Jaratqan İyesinin' so'zi

⁷ Sen ne bolıpsan', ha'y, ba'lent taw? Zerubbabeldin' aldında sen bir tegislik bolıp qalasan'! Ol İbadatxananın' aqırg'ı tasın ornatqanda, xalıq: „Qanday go'zzal, qanday go'zzal!“ – dep baqırısadı».

⁸ Jaratqan İyeden mag'an ja'ne to'mendegi so'z tu'sti:

⁹ «Bul İbadatxananın' tiykarg'ı tası Zerubbabeldin' qolları menen qoyıldı, qurılıstı da onın' qolları aqırına jetkeredi. Sol waqıtta, A'lemnin' Jaratqan İyesi bolg'an Menin' seni jibergenimdi bilesen'.

¹⁰ Qurılıstın' kishkene isi baslang'an ku'ndi kim mensinbeydi? Adamlar Zerubbabeldin' qolındag'ı jazıwı bar qalayı taxtanı ko'rgende, shadlanadı». Sonda perishte mag'an bılay dedi: – Mına jeti shıra pu'tkil jer ju'zine qarap turatug'ın Jaratqan İyenin' ko'zleri.

¹¹ Men perishteden mınanı soradım: – Ha'stenin' on' ha'm shep ta'repindegi bul eki za'ytu'n ag'ashlarının' ma'nisi ne?

¹² Altınday may ag'ıp turg'an eki altın tu'tikshenin' qasındag'ı bul eki na'l neni an'latadı?

¹³ Ol mennen: – Bulardın' ma'nisin bilmeysen' be? – dep soradı. Men: – Yaq, mırzam, – dep juwap berdim.

¹⁴ Perishte: – Bular pu'tkil du'nyanın' İyesine xızmet etiwshi ha'm za'ytu'n mayı menen maylang'an eki adam boladı, – dedi.