Zexariya 5 bob
1 Men ja'ne na'zer taslag'anımda, ushıp baratırg'an orama kitaptı ko'rdim.
2 Perishte mennen: – Neni ko'rip tursan'? – dep soradı. Men: – Ushıp baratırg'an orama kitaptı ko'rip turıppan, onın' uzınlıg'ı jigirma shıg'anaq, eni on shıg'anaq, – dep juwap berdim.
3 Sonda perishte mag'an tu'sindirip, bılay dedi: – Bul kitapqa pu'tkil jer ju'zine keletug'ın na'let jazılg'an. Urlıq qılg'anlar orama kitaptın' bir ta'repindegi jazıw boyınsha, jalg'an ant ishkenler ekinshi ta'repindegi jazıw boyınsha elden joq qılınadı.
4 A'lemnin' Jaratqan İyesi: «Na'let jawdıraman. Urının' u'yine ha'm Menin' atım menen jalg'an ant ishetug'ınlardın' u'yine na'let jawadı. Na'let sol u'yde bolıp, jaydın' ag'ashları menen tasların pu'tkilley joq qıladı», – deydi.
5 Menin' menen so'ylesken perishte kelip, mag'an bılay dedi: – Na'zer tasla, kiyatırg'an na'rseni ko'r.
6 Men: – Bul ne? – dep soradım. Perishte: – Kiyatırg'an na'rse o'lshem ıdısı. Bul – eldegi pu'tkil xalıqtın' gu'nası, – dedi.
7 Qorg'asınnan sog'ılg'an qaqpag'ı ashıldı, ıdıstın' ishinde bolsa, bir hayal otırg'an eken.
8 Perishte: – Bul hayal – jawızlıq, – dep, hayaldı ıdıstın' ishine iyterip jiberdi de, awır qaqpag'ın jawıp tasladı.
9 Men ja'ne na'zer taslap, eki hayaldın' ushıp kiyatırg'anın ko'rdim. Olar la'ylektin' qanatlarına uqsag'an qanatların samalda jayg'an edi. Olar kelip, sol ıdıstı aldı da, aspang'a ko'terip alıp ketti.
10 Men o'zim menen so'ylesip atırg'an perishteden: – Idıstı qayaqqa alıp baratır? – dep soradım.
11 Ol mag'an: – Onı Shınar eline alıp baratır. Ol jerde og'an sıyınatug'ın u'y qurıp beredi, u'y tayın bolg'anda, ıdıstı sol jerde bir tu'beldirikke qoyadı, – dep juwap berdi.
