Zexariya 6 bob

Segizinshi ayan: to'rt sawash arbası (1-8),Eshuag'a berilgen taj (9-15).

¹ Men ja'ne na'zer taslag'anımda, eki qola tawdın' arasınan shıg'ıp kiyatırg'an to'rt sawash arbasın ko'rdim.

² Birinshi sawash arba qızıl atlarg'a, ekinshisi qara atlarg'a,

³ u'shinshisi aq atlarg'a, to'rtinshisi alashubar atlarg'a jegilgen edi. Bul atlardın' ha'mmesi ku'shli edi.

⁴ Men o'zim menen so'ylesip turg'an perishteden: – Mırzam, bular ne? – dep soradım.

⁵ Perishte bılay dep juwap berdi: – Bular ko'ktegi to'rt samal. Olar pu'tkil du'nyanın' İyesinin' da'rgayında bolg'annan keyin, aylanıwg'a shıg'adı.

⁶ Qara atlarg'a jegilgen sawash arbası arqag'a, aq atlarg'a jegilgen arba onın' izinen baradı, al ala-shubar atlarg'a jegilgen arba qublag'a ketedi.

⁷ Sol ku'shli atlar jolg'a shıg'ıp, jer ju'zin aylanıp shıg'ıwg'a asıqtı. Perishte olarg'a: – Barın'lar, jer ju'zin aylanıp shıg'ın'lar, – dedi. Sonda olar aylanıp shıg'ıwg'a ketti.

⁸ Keyin perishte mag'an dawıslap: – Qara! Atlar arqadag'ı elge bardı. Ol jerde Jaratqan İyenin' erkin orınladı, Jaratqan İye g'a'zepten qayttı, – dedi.

⁹ Jaratqan İyeden mag'an to'mendegi so'z tu'sti:

¹⁰ – Babilon su'rgininen qaytıp kelgen Xelday, Tobiya ha'm Edayadan sawg'aların alıp, sol ku'ni-aq, Sefaniya ulı İoshiyanın' u'yine bar.

¹¹ Berilgen gu'mis ha'm altınnan taj sog'ıp, onı İosadaq ulı bas ruwxaniy Eshuanın' basına kiygiz.

¹² Og'an bılay dep ayt: «A'lemnin' Jaratqan İyesi bılay deydi: Mine, Na'l degen adam! Ol turg'an jerinen shaqalap, Menin' İbadatxanamdı quradı.

¹³ Awa, Jaratqan İyenin', yag'nıy Menin' İbadatxanamdı quratug'ın ol boladı. Ol ullılıqqa bo'lenedi, taxtında otırıp, hu'kimdarlıq qıladı. Ruwxaniy de o'z taxtında otıradı, ekewinin' arasında birlik ornaydı».

¹⁴ Bul taj Xelem, Tobiya, Edaya ha'm Sefaniya ulı Xennin' g'amxorlıg'ına tapsırılıp, Jaratqan İyenin', yag'nıy Menin' İbadatxanamda estelik bolıp qaladı.

¹⁵ Uzaqta jasaytug'ınlar kelip, Jaratqan İyenin' İbadatxanasının' qurılısına qatnasadı. Solay etip, meni sizlerge A'lemnin' Jaratqan İyesinin' jibergenin bilip alasız. Eger Qudayın'ız Jaratqan İyenin' so'zlerin buljıtpay orınlasan'ız, usılardın' ha'mmesi orınlanadı.