Zexariya 7 bob
1 Dariydin' patshalıg'ının' to'rtinshi jılının' tog'ızınshı ayı bolg'an Kislew ayının' to'rtinshi ku'ni Jaratqan İyeden Zexariyag'a so'z tu'sti.
2 Beyt-Eldin' turg'ınları Sareserdi, Regem-Melexti ha'm onın' adamların Erusalimge jiberip, bılay degen edi:
3 – Barıp, A'lemnin' Jaratqan İyesinin' U'yindegi ruwxaniyler ha'm payg'ambarlardan: «Bizler ko'p jıllardan berli besinshi ayda İbadatxananın' wayran qılıng'anın eske tu'sirip, qayg'ırıp, oraza tutıp kiyatırmız. Usınday qılıwdı dawam ete bereyik pe?» – dep soran'lar.
4 A'lemnin' Jaratqan İyesi mag'an jibergen so'zinde bılay dedi:
5 – Eldin' barlıq xalqına ha'm ruwxaniylerine ayt: «Jetpis jıl dawamında sizler besinshi ha'm jetinshi aylarda oraza tutıp, qayg'ırdın'ız. Biraq shınında da usını Men ushın islegen be edin'iz?
6 İship-jegenin'iz sıyaqlı, o'z paydan'ız ushın oraza tutpadın'ız ba?
7 Erusalim ha'm onın' a'tirapındag'ı awıllar gu'llep jaynag'anda, Negeb ha'm batıstag'ı taw etekleri adamlarg'a tolı waqıtta, Jaratqan İye bolg'an Men bir neshe jıl aldın payg'ambarlar arqalı usı so'zlerimdi aytqan joqpan ba?»
8 Jaratqan İyeden Zexariyag'a ja'ne so'z tu'sti:
9 A'lemnin' Jaratqan İyesi bolg'an Men bılay degen edim: «A'dil hu'kim shıg'arın'lar. Bir-birin'izge miyirman ha'm rehimli bolın'lar.
10 Jetimjesirlerge, kelgindilerge ha'm ka'mbag'allarg'a zulımlıq qılman'lar. Birbirin'izge jawızlıq qılıwdı oylaman'lar».
11 Biraq xalqım qulaq salıwdan bas tarttı. O'jetlik etip, esitpew ushın qulaqların jawıp aldı.
12 A'lemnin' Jaratqan İyesi bolg'an Men Ruwxım menen aldıng'ı payg'ambarlar arqalı so'yledim. Biraq xalqım ju'reklerin tas qılıp, nızam ha'm so'zlerime qulaq salmadı. Sonın' ushın, Men olarg'a qattı g'a'zeplendim.
13 Men shaqırg'anda, olar qulaq salmadı, olar shaqırg'anda, Men de olarg'a qulaq salmayman, – deydi A'lemnin' Jaratqan İyesi.
14 – Men olardı o'zleri tanımaytug'ın xalıqlardın' arasına shashıp tasladım. Olardın' eli adamsız qaldı, ol jerge hesh kim kirip-shıqpaytug'ın boldı. Go'zzal el qula du'zge aylandı.
