Zexariya 8 bob
1 A'lemnin' Jaratqan İyesinen mag'an ja'ne so'z tu'sti.
2 A'lemnin' Jaratqan İyesi bılay deydi: «Men Siondı qattı qızg'anaman. Og'an bolg'an qızg'anıshım ishimdi jandıradı».
3 Jaratqan İye bılay deydi: «Siong'a qaytıp kelemen, Erusalim Menin' ma'kanım boladı. Sonda Erusalim „Sadıq qala“, A'lemnin' Jaratqan İyesinin' tawı „Muxaddes taw“ dep ataladı».
4 A'lemnin' Jaratqan İyesi bılay deydi: «Qollarına hasa uslag'an kempir-g'arrılar ja'ne Erusalim maydanlarında otıradı.
5 Qalanın' ko'sheleri oynap ju'rgen bala ha'm qızlarg'a toladı».
6 A'lemnin' Jaratqan İyesi bılay deydi: «Aman qalg'an xalqımnın' ko'zine usı ku'nler mu'mkin emes bolıp ko'ringeni menen, Menin' ko'zime onday bolıp ko'rinbeydi». Bunı A'lemnin' Jaratqan İyesi aytadı.
7 A'lemnin' Jaratqan İyesi bılay deydi: «Xalqımdı ku'nshıg'ıs ha'm batıstag'ı ellerden qutqarıp alaman.
8 Erusalimde jasawı ushın olardı qaytarıp alıp kelemen. Olar Menin' xalqım, Men olardın' sadıq ha'm a'dil Qudayı bolaman».
9 A'lemnin' Jaratqan İyesi bılay deydi: «Ku'shli bolın'lar! Menin' İbadatxanam qayta qurılıwı ushın tiykarı salıng'an ku'nleri payg'ambarlardın' aytqan so'zlerin esitip atırsız.
10 Sol waqıtqa deyin miyneti ushın adamlarg'a is haqı, haywanlarg'a jem berilmeytug'ın edi. Dushpanlar sebepli hesh kim tınıshlıq ishinde kirip shıg'a almaytug'ın edi. Men ha'mmeni bir-birine qarsı qoyg'an edim.
11 Biraq xalqımnın' aman qalg'anlarına burıng'ıday islemeymen». Bul A'lemnin' Jaratqan İyesinin' so'zi.
12 «Endi tuqım tınıshlıq ishinde sebilip, ju'zimzar o'z miywesin beredi, topıraq o'nimli bolıp, aspan o'z shıg'ın tu'sirip turadı. Bulardın' barlıg'ın aman qalg'an xalıqtın' iyeligine beremen.
13 Ha'y, Yahuda ha'm İzrail xalqı, Men sizlerdi qutqaraman! Sizler milletler arasında na'let tımsalı edin'iz, endi sizler bereket tımsalı bolasız. Qorqpan'lar, ku'shli bolın'lar!»
14 A'lemnin' Jaratqan İyesi bılay deydi: «Ata-babaların'ız g'a'zebime tiygende, sizlerge apat jiberiwdi sheshtim ha'm ayamadım, – bunı A'lemnin' Jaratqan İyesi aytadı.
15 – Endi bolsa, Erusalimge ha'm Yahuda xalqına ja'ne jaqsılıq qılıwdı sheshtim. Qorqpan'lar!
16 Sizler islewin'iz kerek bolg'an na'rseler mınalar: bir-birin'izge haqıyqattı so'ylen'ler. Hu'kim shıg'arg'anın'ızda, a'dalatlıqtı ha'm a'dillikti saqlan'Ju'regin'izde bir-birin'izge qarsı jawızlıq jobalastırman', jalg'annan ant ishpen'. Sebebi Men bulardın' barlıg'ınan jerkenemen. Bunı Jaratqan İye aytadı».
17 Ju'regin'izde bir-birin'izge qarsı jawızlıq jobalastırman', jalg'annan ant ishpen'. Sebebi Men bulardın' barlıg'ınan jerkenemen. Bunı Jaratqan İye aytadı»+.
18 A'lemnin' Jaratqan İyesinen mag'an ja'ne to'mendegi so'z tu'sti.
19 A'lemnin' Jaratqan İyesi bılay deydi: «To'rtinshi, besinshi, jetinshi ha'm onınshı aylardag'ı oraza Yahuda xalqı ushın quwanıshlı ha'm shadlıqqa tolı baxıtlı bayramlarg'a aylanadı. Sonlıqtan a'dalatlıqtı ha'm tınıshlıqtı su'yin'».
20 A'lemnin' Jaratqan İyesi bılay deydi: «Keleshekte ko'p xalıqlar ha'm basqa qalalarda jasaytug'ın adamlar Erusalimge keledi.
21 Bir qalanın' turg'ınları basqa qalag'a barıp: „Jaratqan İyeden rehim sorap, Onın' ju'zin izlew ushın barayıq. Men de sizler menen baraman“, – deydi.
22 A'lemnin' Jaratqan İyesi bolg'an Meni izlep, Mennen rehim soraw ushın ko'p milletler ha'm ku'shli xalıqlar Erusalimge keledi».
23 A'lemnin' Jaratqan İyesi bılay deydi: «Sol ku'nlerde ha'r tu'rli tilde so'yleytug'ın milletlerden on adam bir yahudiydin' etegine asılıp: „Ruxsat ber, senin' menen birge barayıq. Sebebi Qudaydın' senin' menen birge ekenin esittik“, – dep aytadı».
