Zexariya 9 bob

İzraildın' dushpanlarının' jazalanıwı (1-8), Wa'de etilgen patsha (9-10), Tutqınlardı azat etiw wa'desi (11-13), Jaratqan İyenin' O'z xalqın qorg'awı (14-17).

¹ Payg'ambarshılıq so'z. Jaratqan İyenin' so'zi Xadrax jurtına, a'sirese Damask qalasına qaratılg'an: İnsanlardın' ha'm İzrail urıwlarının' ko'zi Jaratqan İyede.

² Bul so'z Xadrax penen shegaralas Xamatqa, Uqıplılarg'a tolı bolsa da Tir ha'm Sidon qalalarına da qaratıladı.

³ Tir o'zine bir qorg'an qurdı, Gu'misti topıraqtay etip, Altındı daladag'ı qumday etip u'ydi.

⁴ Degen menen, İye onın' mal-du'nyasın alıp qoyadı, Baylıg'ın ten'izge ılaqtıradı, Qalanı bolsa, ot jalmaydı.

⁵ Ashkelon bunı ko'rip, za'rresi ushadı, Gaza da qorqınıshqa tu'sip, qaltıraydı, Usı awhalg'a tu'sken Ekron u'miti so'nedi. Gaza o'z patshasınan ayırıladı, Ashkelon qan'ırap bosap qaladı.

⁶ Jaratqan İye bılay deydi: «Ashdodta qanı aralas xalıq jasaydı, Filist xalqının' ta'kabbirligine shek qoyaman.

⁷ Men olardın' awızlarınan qanlı go'shti, Tislerinin' arasınan haram awqatlardı alıp taslayman. Aman qalg'anları bolsa, Qudayg'a, Mag'an tiyisli boladı, Yahuda urıwının' bir bo'legine aylanadı. Ekron qalası ebus xalqı sıyaqlı Meniki boladı.

⁸ U'yimnin' do'geregine orda quraman, Basqınshılardan qorg'ayman. Menin' O'zim onı baqlap turg'anım ushın, Hesh kim xalqımnın' jerine qarsı ju're almaydı.

⁹ Ha'y, qız Sion, qattı shadlan! Ha'y, qız Erusalim, ba'lent dawısta shadlan! Mine, patshan' sag'an kiyatır! Ol a'dil, jen'impaz ha'm kishipeyil. Eshekke, jas eshekke, Gu'rrege minip sag'an kiyatır!

¹⁰ Efrayımnan sawash arbaların, Erusalimnen atlardı alıp taslayman. Sawash sadaqları joq qılınadı, Patshan'ız xalıqlarg'a tınıshlıq ja'riyalaydı, Onın' hu'kimdarlıg'ı ten'izden ten'izge, Evfrat da'ryasınan du'nyanın' shetine deyin sozıladı.

¹¹ Sion, sizlerge kelsek, qurbanlıq qanı menen bekitken kelisimim sebepli, Tutqındag'ı xalqın'ızdı suwsız qudıqtan azat etemen.

¹² Ha'y, u'mit etken tutqınlar, Qorg'anın'ızg'a qaytın'. Bu'gin Men sizlerge aytaman, Joytqanların'ızdı eki ese etip qaytaraman.

¹³ Yahudanı sadag'ım sıyaqlı, Efrayımdı oq sıyaqlı qollanaman. Ha'y, Sion, seni qılıshtay etip qollanaman, Greklerge qarsı qozg'ayman.

¹⁴ Sonda Jaratqan İye O'z xalqının' u'stinde payda boladı, Onın' og'ı shaqmaqtay shag'adı. Quday İye ka'rnay shaladı, Qubla dawılları menen hu'jim qıladı.

¹⁵ A'lemnin' Jaratqan İyesi O'z xalqın qorg'aydı, Xalıq o'z dushpanların joq qıladı, Saqpan tasları menen jen'iske erisedi. Olar sharap ishken ma'sku'nemlerdey baqıradı, Olar qurbanlıq qanın serpiwge arnalg'an tabaqtay, Qurbanlıq orınnın' to'rt mu'yeshindey qang'a tolı boladı».

¹⁶ Sol ku'ni olardın' Qudayı Jaratqan İye, Shopan o'z su'riwin saqlag'anday etip, olardı qorg'aydı. Onın' elinde olar taj ga'wharınday jarqıraydı.

¹⁷ Bul qanday a'jayıp ha'm go'zzal boladı! Jas jigit ha'm qızlar, Da'n menen sharaptın' molshılıg'ınan gu'llep jasnaydı.