Malaxiya 1 bob
1 Payg'ambarshılıq so'zi. Jaratqan İye Malaxiya arqalı İzrail xalqına mın so'zlerdi xabarladı:
2 Jaratqan İye: «Men sizlerdi su'yip kelemen», – deydi. Al sizler bolsan'ız: «Bizlerge bolg'an su'yispenshiligin'di qalayınsha ko'rsetken edin'?» – dep soraysız. Jaratqan İye: «Esaw Yaqıptın' ag'ası emes pe edi? Sonday bolsa da, Men Yaqıptı su'ydim,
3 al Esawdı bolsa, jek ko'rdim. Esawdın' tawlı u'lkelerin wayran qılıp, elin sho'ldin' sag'allarına tapsırdım», – dep juwap beredi.
4 Eger Esawdın' urpag'ı edomlılar: «Bizler bu'lginshilikke ushıradıq, biraq wayran bolg'an jerlerimizdi qayta tiklep alamız», – dep aytsa, A'lemnin' Jaratqan İyesi bılay dep juwap beredi: «Olar qayta qursa da, Men ja'ne wayran qılaman. Sonda olardın' u'lkesi Jawızlıq u'lkesi dep atalıp, al o'zleri Jaratqan İyenin' qa'ha'rine ma'n'gi ushırag'an xalıq boladı.
5 Bunı o'z ko'zlerin'iz benen ko'rip, sizler: „Jaratqan İye İzrail shegaralarının' sırtında da dan'qqa iye!“ – dep aytatug'ın bolasız».
6 – Ruwxaniyler! Ul a'kesine, qul xojayınına hu'rmet ko'rsetedi. Eger Men sizlerdin' a'ken'iz bolsam, sizlerdin' Mag'an ko'rsetken hu'rmetin'iz qayaqta? Eger xojayının'ız bolsam, Mennen qorqqanın'ız qayaqta? – dedi A'lemnin' Jaratqan İyesi. – Ha'y, ruwxaniyler, sizler Menin' atımdı hu'rmetlemey qoydın'ız. Degen menen, sizler: «Senin' atın'a qalayınsha hu'rmet ko'rsetpedik?» – dep soraysız.
7 Sizler qurbanlıq ornıma haram sadaqalar alıp kelesizler. Solay islesen'iz de, «Bizler Senin' qurbanlıq ornın'dı qalay haramladıq?» – dep soraysızlar. Biraq «Jaratqan İyenin' dasturxanın qa'dirlemesek te boladı», – dep aytasız.
8 Soqır maldı qurbanlıq qılıw nadurıs emes pe? Mayıp yamasa awırıw haywandı qurbanlıq qılıw nadurıs emes pe? Usınday bir haywandı o'z ha'kimin'izge aparıp ko'rin'! Onın' sennen kewli tolar ma eken yamasa ol seni jaqsı qabıllay ma eken? – deydi A'lemnin' Jaratqan İyesi.
9 – Endi sizlerge O'z miyrim-sha'pa'a'timdi ko'rsetiwim ushın, Mag'an, Qudayg'a jalbarının'. Biraq sizler Mag'an sonday qurbanlıqlardı usınsan'ız, onda Men sizlerge miyrimimdi tu'sirip, qabıl eter me edim? – deydi A'lemnin' Jaratqan İyesi.
10 – Qa'ne endi, aran'ızdag'ı birin'iz biykarg'a qurbanlıq orında ot jag'ılmasın, dep İbadatxananın' esigin jawıp taslasa, jaqsı bolar edi! Menin' kewlim sizlerden toq emes, – deydi A'lemnin' Jaratqan İyesi. – Sizlerdin' sadaqaların'ızdı qabıl etpeymen.
11 O'ytkeni shıg'ıstan batısqa deyingi xalıqlardın' arasında Menin' atım ullı boladı! Ha'mme jerde Menin' atıma arnap, tu'tetki tu'tetiledi, taza qurbanlıqlar beriledi. Sebebi xalıqlar arasında Menin' atım ullı boladı! – deydi A'lemnin' Jaratqan İyesi.
12 – Al sizler bolsan'ız: «Jaratqan İyenin' dasturxanı qa'dirsiz, ondag'ı sadaqalar arzımas», – dep Menin' atıma til tiygizesiz.
13 Sonın' menen birge, «Qanday awır ju'k!» – dep Mag'an murınların'ızdı girjiytesiz, – deydi A'lemnin' Jaratqan İyesi. – Qurbanlıq ushın urlang'an, mayıp ha'm awırıw haywanlardı alıp kelgenin'izde, Men solardı sizlerdin' qolın'ızdan qabıl etiwim kerek pe? – deydi Jaratqan İye.
14 – O'z su'riwin'izden Mag'an, Jaratqan İyege bag'ıshlap usınıwg'a wa'de berip qoyg'an erkek haywannın' ornına kemshiligi bar haywandı qurbanlıq qılg'an o'tirikshige na'let bolsın! Sebebi Men ullı Patshaman. Xalıqlar Menin' atımnan qorqadı, – deydi A'lemnin' Jaratqan İyesi.
