Malaxiya 3 bob
1 – Mine, Men O'z xabarshımdı jiberip atırman. Ol Menin' aldımda jol tayarlaydı. Sizler ko'riwdi an'sap ju'rgen kelisimnin' xabarshısı kiyatır. Sizler izlep atırg'an İye tosattan O'z İbadatxanasına keledi, – deydi A'lemnin' Jaratqan İyesi.
2 – Biraq Ol kelgende, kim shıday aladı? Ol payda bolg'anda, kim tura aladı? Sebebi Ol taplap tazalaytug'ın ot sıyaqlı, kir juwıwshının' sabını sıyaqlı boladı.
3 Ol gu'misti eritip tazalap alatug'ın adam sıyaqlı hu'kim taxtına otırıp, lebiylilerdi pa'kleydi. Awa, altın ha'm gu'misti tazalag'anday etip, tazalaydı. Sonda olar Jaratqan İyege tuwrı jol menen qurbanlıqlar usınatug'ın boladı.
4 Keyin o'tken ku'nlerdegidey, burıng'ı jıllardag'ı sıyaqlı, Yahuda ha'm Erusalimde usınılg'an sadaqalar Jaratqan İyege maqul boladı.
5 – Sonda sizlerdi hu'kim qılıw ushın baraman. Mennen qorqpag'anlarg'a: juldız izertlewshilerge, buzıqlıq qılg'anlarg'a, jalg'an ant ishkenlerge, jumısshının' is haqısın bermegenlerge, jetim-jesirlerdi eziwshilerge ha'm kelgindilerdin' huqıqın sheklegenlerge qarsı shıg'ıp, olardı tezlik penen a'shkaralayman, – deydi A'lemnin' Jaratqan İyesi+.
6 – Men Jaratqan İyemen, Men hesh waqıtta o'zgermeymen. Sonın' ushın, sizler joq bolıp ketpedin'ler, ha'y, Yaqıp urpaqları!
7 Sizler atababaların'ızdın' da'wirinen baslap, Menin' qag'ıydalarımnan ju'z burıp, og'an a'mel qılmay kiyatırsız. Endi ta'wbe qılıp, Menin' aldıma kelin'ler. Sonda Men de sizlerge qaytıp baraman, – deydi A'lemnin' Jaratqan İyesi. – Biraq sizler: «Ne sebepten ta'wbe qılıwımız kerek?» – dep soraysızlar.
8 Adamzat Qudaydan bir na'rse urlawı mu'mkin be? Al sizler bolsa, Mennen urlap atırsızlar. «Sennen ne urlappız?» – dep soraysız. Sizler u'sirler ha'm sadaqalardı urlap atırsızlar!
9 Sizler g'arg'ısqa ushıradın'lar. Sebebi sizler – pu'tkil xalıq Mennen urlap atırsız.
10 İbadatxanamda azıq-awqat bolıwı ushın, barlıq onnan birlerin'izdi zatlar saqlanatug'ın bo'lmege alıp kelin'ler. Meni usılayınsha sınap ko'rin'ler, – deydi A'lemnin' Jaratqan İyesi. – Sonda aspan qaqpaqların ashaman, sizlerdin' u'stin'izge bereket jawdırıp, tolıp-tastıraman.
11 Eginlerin'izdi shegirtkelerdin' jep ketiwine jol qoymayman ha'm ju'zim bag'ların'ız jemissiz qalmaydı, – deydi A'lemnin' Jaratqan İyesi.
12 – Sonda barlıq xalıqlar sizlerdi: «Qanday baxıtlı xalıq» – dep ataydı. Sebebi sizlerdin' elin'iz a'jayıp bir jer boladı, – deydi A'lemnin' Jaratqan İyesi.
13 Sizler Mag'an qarsı jaman so'zler so'yledin'iz, – deydi Jaratqan İye. – Sonda da sizler: «Bizler Sag'an qarsı ne aytıp edik?» – dep soraysız.
14 Sizler bılay dep aytqan edin'iz: «Qudayg'a xızmet etiwdin' paydası joq. A'lemnin' Jaratqan İyesinin' talapların orınlawdın', Onın' aldında aza tutqan adamday bolıp ju'riwdin' bizlerge ne keregi bar?
15 Al endi bizler menmenlerdi baxıtlı dep esaplaymız. Jawızlıq qılıwshılar tabısqa erisip atır. Mine, Qudaydı sınag'anlar jazadan aman qalıp atır».
16 Biraq Jaratqan İyeden qorqatug'ınlar o'z ara sa'wbetlesti. Jaratqan İye olardın' sa'wbetine qulaq salıp, tın'ladı. Jaratqan İyeden qorqıp, Onın' atın sıylag'anlar ushın, Onın' aldında bir estelik kitabı jazıldı.
17 – Men belgilegen sol ku'nde, olar Menin' g'a'ziynem boladı, – deydi A'lemnin' Jaratqan İyesi, – A'ke o'zine boysıng'an ulına qanday miyrim ko'rsetse, Men de olarg'a sonday miyrim ko'rsetemen.
18 Sol waqıtta sizler a'dil adam menen jawız adamnın', Qudayg'a xızmet etken adam menen xızmet etpegen adamnın' arasındag'ı ayırmashılıqtı ja'ne ko'resiz.
