Sanlar 12 bob
1 Muwsa Xabashstannan bolg'an hayalg'a u'ylengeni ushın, Ma'riyam menen Xaron og'an qarsı so'yledi.
2 Olar: «Jaratqan İye tek g'ana Muwsa arqalı so'ylegen be edi? Ol bizler arqalı da so'ylegen joq pa edi?» – dedi. Jaratqan İye olardın' bul so'zlerin esitti.
3 Muwsa jer ju'zinde jasaytug'ın barlıq adamlardın' ishinde en' kishipeyil adam edi.
4 Jaratqan İye ku'tilmegende Muwsa, Xaron ha'm Ma'riyamg'a: – U'shewin'iz Ushırasıw shatırına barın', – dedi. U'shewi de shatırg'a bardı.
5 Jaratqan İye minara sıyaqlı bult ishinde tu'sip, shatırdın' kirer awzının' aldında turdı ha'm Xaron menen Ma'riyamdı shaqırıp aldı. Olar ekewi aldıg'a qaray shıqqanda,
6 Jaratqan İye olarg'a bılay dedi: – Menin' so'zlerime qulaq salın': Eger aran'ızda bir payg'ambar bar bolsa, Men, Jaratqan İye O'zimdi tanıtaman og'an ayan arqalı, So'ylesemen onın' menen tu'sinde.
7 Biraq qulım Muwsa menen bulay so'ylespeymen, Pu'tkil u'yimdegilerge juwapker adam – Muwsadur.
8 Onın' menen jumbaqlı tu'rde emes, Al ju'zbe-ju'z so'ylesemen ashıq tu'rde. Ol Menin' biynemdi ko'redi. Sonday bolsa da, qulım Muwsag'a qarsı so'ylewden qorqpadın'lar ma?
9 Sonda Jaratqan İye olarg'a g'a'zepleniwi menen, ol jerden ketti.
10 Bult Muxaddes shatırdan ketiwden-aq, Ma'riyam teri keselligine shalınıp, etleri qar sıyaqlı tu'lep ketti. Xaron Ma'riyamg'a burılıp qarag'anda, onın' teri keselligine shalıng'anın ko'rdi.
11 Xaron Muwsag'a: – Oh, mırzam, iltimas aqılsızlıq qılıp, islegen gu'namız ushın jazalama.
12 Ma'riyam anasının' qarnında-aq denesi shirip baslag'an o'li na'restege uqsap qalmasın, – dedi.
13 Muwsa Jaratqan İyege: – Oh, Quday, Ma'riyamg'a shıpa ber! – dep jalbarındı.
14 Jaratqan İye Muwsag'a: – Eger onın' a'kesi ju'zine tu'kirgende, ol jeti ku'n dawamında shermende bolıp qalmas pa edi? Onı jeti ku'n dawamında bo'leklep, ordadan shıg'arıp jiberin', sonnan keyin izine qaytıwına boladı, – dep juwap berdi.
15 Solay etip, Ma'riyam jeti ku'n dawamında bo'leklenip, ordadan shıg'arıp jiberildi, ol qaytıp kelgenshe, xalıq jolg'a shıqpadı.
