Sanlar 13 bob
1 Sonnan keyin, xalıq Xaserottan shıg'ıp, Paran sho'line barıp, qonıs bastı.
2 Jaratqan İye Muwsag'a bılay dedi:
3 – Men İzrail xalqına berip atırg'an Qanan jerin ko'zden o'tkeriw ushın adamlar jiber. Atalarınan tarag'an ha'r bir urıwdan bir basshıdan jiber.
4 Muwsa Jaratqan İyenin' buyrıg'ı boyınsha Paran sho'linen adamlardı jiberdi. Bulardın' ha'mmesi İzrail xalqının' basshıları edi.
5 Olardın' atları mınaday edi: Ruben urıwınan Zakkur ulı Shammua,
6 Shimon urıwınan Xoriy ulı Shafat,
7 Yahuda urıwınan Efunne ulı Kaleb,
8 İssaxar urıwınan Yusup ulı İgal,
9 Efrayım urıwınan Nun ulı Hoshea,
10 Benyamin urıwınan Rafu ulı Paltiy,
11 Zebulon urıwınan Sodiy ulı Gaddiel,
12 Yusup urıwınan, yag'nıy Menashshe urıwınan Susiy ulı Gaddiy,
13 Dan urıwınan Gemalliy ulı Ammiel,
14 Asher urıwınan Mixail ulı Setur,
15 Naftaliy urıwınan Wofsiy ulı Naxbiy,
16 Gad urıwınan Maxiy ulı Geuel.
17 Eldi ko'zden o'tkeriw ushın Muwsanın' jibergen adamları usılar edi. Sol waqıtta Muwsa Nun ulı Hosheag'a Eshua, dep at berdi.
18 Muwsa olardı Qanan jerin ko'zden o'tkeriw ushın jiberip atırıp, olarg'a bılay dedi: – Negeb arqalı ju'rip, tawlı jerlerge barın'.
19 Ol jerler qanday ekenin, ol jerde jasap atırg'an xalıq ku'shli me, yamasa ha'lsiz be, olar ko'p pe, yamasa az ba, bilip alın'.
20 Olardın' jasap atırg'an jeri jaqsı ma, yamasa jaman ba, qalaları qorg'ansız ba, yamasa qorg'anlı ma, ko'rin'.
21 Topırag'ı o'nimdarlı ma, yamasa o'nimsiz be, do'geregi terekli me, yamasa joq pa, bilip kelin'. Qolın'ızdan kelgeninshe, ol jerdin' jetistirgen miywelerinen alıp kelin'! Sol waqıtta ju'zim pisigi endi baslanıp atırg'an edi.
22 Solay etip, sol adamlar jolg'a shıg'ıp, eldi Zin sho'linen baslap, LeboXamatqa jaqın bolg'an Rexobqa deyin ko'zden o'tkerdi.
23 Olar Negebti kesip o'tip, anaqlardın' Aximan, Sheshay ha'm Talmay degen tiyreleri jasap atırg'an Xebron qalasına bardı. Xebron Mısırdag'ı Soan qalasınan jeti jıl aldın qurılg'an edi.
24 Jansızlar Eshkol sayına jetip barg'anda, ol jerden bir solqım ju'zimdi kesip aldı. Olardan ekewi bir qada ag'ashqa ju'zimdi ildirip alıp ju'rdi. Sonın' menen birge, anar ha'm a'njir miywesin de aldı.
25 İzraillılardın' kesip alg'an ju'zim solqımı sebepli, sol say Eshkol dep ataldı.
26 Jansızlar qırıq ku'n jerdi aralap shıqqannan keyin izlerine qayttı.
27 Olar Paran sho'lindegi Qadeshke, Muwsa menen Xaronnın' ha'm İzrail ja'miyetinin' janına keldi. Olarg'a ha'm pu'tkil ja'miyetke ko'rgenbilgenlerin aytıp, sol jerdin' miywelerin ko'rsetti.
28 Olar Muwsag'a bılay dep bayanladı: – Bizlerdi jibergen jerge bardıq. Ol jerde shınında da su't ha'm pal ag'ıp turg'an eken! Mine, mınaw sol jerdin' miywelerinen!
29 Biraq ol jerde jasap atırg'an xalıq ku'shli, qalaları da qorg'anlı ha'm ju'da' u'lken eken. Ha'tteki, ol jerde Anaq a'wladınan shıqqan da'w adamlardı da ko'rdik.
30 Amalek xalqı Negebte, xet, ebus ha'm amor xalıqları tawlı u'lkede, qanan xalqı ten'izdin' boyında ha'm İordan da'ryasının' jag'asında jasaydı eken.
31 Kaleb Muwsanın' aldında xalıqtı tınıshlandırıp: – Ol jerge barıp, eldi qolg'a kirgizeyik. A'lbette, bug'an jeterli ku'shimiz bar, – dedi.
32 Degen menen, onın' menen birge barg'an adamlar: – Bul xalıqqa qarsı gu'rese almaymız, olar bizlerden go're ku'shlirek, – dedi.
33 Olar o'zleri ko'zden o'tkerip kelgen el haqqında izraillılardın' arasında mınaday jaman mısh-mıshlar tarqatıp ju'rdi: – Bizler ko'zden o'tkerip kelgen el, ishine ma'kan basatug'ınlardı jep pitiretug'ın el eken. Sol elde jasap atırg'an ha'r bir adam boyshan' ha'm iri.
34 Da'wlerdi, da'wlerdin' a'wladınan bolg'an anaqlardı ko'rdik. Olardın' qasında o'zlerimizdi shegirtke sıyaqlı sezdik, olarg'a da sonday bolıp ko'rindik.
