Sanlar 14 bob
1 Sol tu'ni pu'tkil ja'miyet qattı dawıslap, dad salıp jıladı.
2 Pu'tkil İzrail xalqı Muwsa menen Xarong'a narazı bolıp, bılay dep ton'qılday basladı: «Bunnan go're, Mısırda yamasa usı sho'lde o'lip ketkenimiz jaqsı edi!
3 Jaratqan İye ne ushın bizlerdi usı elge alıp keldi? Bizlerdi qılıshtan o'tkiziw ushın ba? Bala-shag'alarımız tutqın boladı. Bunın' ornına Mısırg'a qaytıp ketkenimiz bizler ushın jaqsıraq emes pe?»
4 Sonnan keyin, olar bir-birine: «O'zlerimizge bir basshı saylap alıp, Mısırg'a qaytayıq», – desti.
5 Sonda Muwsa menen Xaron İzrail ja'miyetinin' aldında et betinen jerge jıg'ıldı.
6 Eldi aralap qaytqanlardan Nun ulı Eshua menen Efunne ulı Kaleb qayg'ırıp kiyimlerin jırttı da,
7 pu'tkil İzrail ja'miyetine bılay dedi: – Bizler ko'rip kelgen el – ju'da' jaqsı jer.
8 Eger Jaratqan İyenin' bizlerge miyrimi tu'sse, Ol bizlerdi su't ha'm pal ag'ıp turg'an sol jerge alıp baradı ha'm onı bizlerge beredi.
9 Tek g'ana Jaratqan İyege qarsı shıqpan'lar! Ol jerde jasap atırg'an xalıqtan qorqpan'lar! Olar bizlerge an'sat g'ana olja boladı. Qorg'awshıları olardı taslap ketti, al Jaratqan İye bizler menen birge. Olardan qorqpan'lar!
10 Degen menen, pu'tkil ja'miyet olardı tas boran qılıwdı niyet qıldı. Sonda Jaratqan İyenin' saltanatı Ushırasıw shatırında pu'tkil İzrail xalqına ko'rindi.
11 Jaratqan İye Muwsag'a bılay dedi: – Qashang'a deyin bul xalıq Mag'an hu'rmetsizlik qıladı? Olardın' arasında qanshelli ka'ramat ko'rsetkenime qaramay, qashang'a deyin Mag'an isenbey ju'redi?
12 Men olardı illet penen jazalayman, miyrastan mahrum qılaman. Al sennen olardan ullıraq ha'm ku'shlirek bir xalıq do'retemen.
13 Biraq Muwsa Jaratqan İyege bılay dedi: – Onda mısırlılar bul haqqında esitedi. Bul xalıqtı O'z ku'shin' menen olardın' arasınan alıp shıqqan edin'.
14 Olar Qanan jerinde jasaytug'ın xalıqqa bul haqqında aytadı. Jaratqan İye, bul xalıqtın' arasında bolıp, olar menen ju'zbe-ju'z ko'riskenin'nen xabarı bar. Senin' bultın' olardın' u'stinde ha'mme waqıt turg'anın, ku'ndiz minara sıyaqlı bult ishinde, tu'nde minara sıyaqlı ot ishinde olarg'a jol ko'rsetkenin'di biledi.
15 Eger bul xalıqtı bir adam sıyaqlı etip o'ltirsen',
16 Sen haqqında esitken xalıqlar: «Jaratqan İye ant ishken bul jerge O'z xalqın alıp kele almag'anı ushın, olardı sho'lde qırıp jiberdi», – dep aytadı.
17 Endi O'z ku'shin'di ko'rset, o, İyem! Sen O'zin' bılay dep aytqan edin':
18 «Jaratqan İye bolg'an Men sabır-taqatlıman, su'yispenshiligim sheksiz, ayıp ha'm jınayattı keshiremen. Biraq ayıplını jazasız qaldırmayman, a'kesinin' islegen ayıbının' jazasın u'shinshi ha'm to'rtinshi a'wladlarınan talap qılaman».
19 Mısırdan shıqqannan baslap, bu'gingi ku'nge deyin bul xalıqtı keshirip keldin'. Endi O'zin'nin' ullı su'yispenshiligin'e say olardın' ayıpların keshire go'r.
20 Jaratqan İye og'an bılay dep juwap berdi: – Senin' tilegin'e bola olardı keshiremen.
21 Degen menen, ma'n'gi bar bolg'an Men jer ju'zin toltırıp turg'an ullılıg'ım menen ant ishemen:
22 ullılıg'ımdı, Mısırda ha'm sho'lde ko'rsetken ka'ramatlarımdı ko'rse de, Meni on ma'rte sınag'an, so'zime qulaq aspag'an bul adamlardın' hesh biri
23 Men ata-babalarına beremen dep ant ishken jerdi ko'rmeydi. Mag'an hu'rmetsizlik qılg'anlardın' hesh biri ol jerdi ko'rmeydi.
24 Biraq qulım Kaleb basqalarg'a uqsamaydı, ol pu'tkil ju'regi menen Mag'an erdi. Sonın' ushın, Men onı o'zi aralap, ko'zden o'tkerip qaytqan elge alıp baraman. Onın' a'wladı sol jerdi iyelep aladı.
25 Amalek penen qanan xalıqları usı oypatlıqlarda jasaydı. Sonın' ushın, sizler erten' artın'ızg'a qaytıp, Qamıs ten'izine qaray ju'rin'ler, sho'lge barın'lar.
26 Jaratqan İye Muwsa menen Xarong'a bılay dedi:
27 – Mına jawız ja'miyet qashang'a deyin Mag'an narazı bolıp, ton'qıldaydı? Mag'an qarsı so'ylegen İzrail xalqının' nalıwın esittim.
28 Olarg'a Menin' mına so'zlerimdi jetkiz: «Ma'n'gi bar bolg'an Men ant ishemen: aytqan so'zlerin'izdi so'zsiz o'zlerin'izdin' basın'ızg'a salaman.
29 O'liklerin'iz usı sho'lde qaladı. Mag'an narazı bolıp, ton'qıldag'anlardın' ha'mmesi – esaptan o'tken jigirma ha'm onnan joqarı jastag'ılar usı sho'lde o'ledi.
30 Sizlerdin' qonıslawın'ızg'a ant ishken elge Efunne ulı Kaleb penen Nun ulı Eshuadan basqa hesh kim kirmeydi.
31 Biraq sizlerdin' tutqın boladı, dep aytqan balaların'ızdı sol jerge kirgizemen. Sizler bas tartqan sol eldi balaların'ız ko'retug'ın boladı.
32 Sizlerdin' o'liklerin'iz bolsa usı sho'lde qalıp ketedi.
33 Ha'mmen'iz o'lip ketemen degenshe, balaların'ız sho'lde qırıq jıl shopanlıq qıladı ha'm sizlerdin' opasızlıg'ın'ız sebepli, olar azap shegedi.
34 Sizler eldi qırıq ku'n dawamında aralap shıqqan edin'ler. Endi ha'r bir ku'n ushın bir jıldan qırıq jıl ayıbın'ızdın' jazasın tartasızlar. Sonda Menin' sizlerden ju'z burg'anımdı bilip alasızlar!»
35 Men, Jaratqan İye aytqanımday, Mag'an qarsı jıynalg'an bul jawız ja'miyetke bulardı so'zsiz isleymen. Olar usı sho'lde qırılıp, o'lip ketedi.
36 Muwsanın' eldi ko'zden o'tkerip qaytıwg'a jibergen adamları qaytıp kelip, el haqqında jaman xabar tarqatıwı pu'tkil ja'miyettin' Jaratqan İyege narazı bolıwına sebep bolg'an edi.
37 Sol el haqqında jaman xabar taratqan bul adamlar Jaratqan İyenin' aldında oba keselligine shalınıp qaytıs boldı.
38 Eldi aralaw ushın ketken jansızlardan tek g'ana Nun ulı Eshua menen Efunne ulı Kaleb tiri qaldı.
39 Muwsa Jaratqan İyenin' so'zlerin pu'tkil İzrail xalqına aytqanda, xalıq teren' qayg'ıg'a battı.
40 Erten'ine azanda olar tawlı u'lkenin' joqarısına shıg'ıp baratırıp, bılay dedi: – Awa, bizler gu'na islegenimizdi moyınlaymız. Mine, endi Jaratqan İyenin' wa'de qılg'an jerine barıwg'a tayarmız.
41 Degen menen, Muwsa: – Ne ushın Jaratqan İyenin' buyrıg'ına ja'ne qarsı shıg'ıp atırsızlar? Bunın' menen hesh na'rsege erise almaysızlar.
42 Sawashqa shıqpan'lar, o'ytkeni Jaratqan İye sizler menen birge emes. Dushpanların'ızdın' aldında jen'iliske ushıraysızlar.
43 Amalek ha'm qanan xalıqları ol jerde sizlerge qarsılıq ko'rsetedi ha'm sizlerdi qılısh ju'zinen o'tkeredi. O'ytkeni Jaratqan İyenin' izinen ju'riwden bas tarttın'lar. Jaratqan İye de sizler menen birge bolmaydı.
44 Solay bolsa da, izraillılar o'zlerinin' aytqanınan qalmay, tawlı u'lkenin' joqarısına shıqtı. Jaratqan İyenin' Kelisim sandıg'ı menen Muwsa ordada qaldı.
45 Tawlı u'lkede jasaytug'ın amalek penen qanan xalıqları olarg'a qarsı hu'jim qıldı ha'm olardı Xorma qalasına deyin quwıp, tastalqan qıldı.
