Sanlar 15 bob
1 Jaratqan İye Muwsag'a bılay dedi:
2 – İzrail xalqına bılay dep ayt: «Ma'kan etiwin'iz ushın sizlerge beretug'ın elge kirgenin'izde,
3 jandırılatug'ın qurbanlıq, wa'de boyınsha beriletug'ın qurbanlıq, ıqtıyarlı qurbanlıq yamasa bayramlarda usınılatug'ın qurbanlıq etip iri ha'm mayda maldan Jaratqan İyege usının'lar. Bular – Jaratqan İyege xosh iyisli sıy boladı.
4 Qurbanlıq usınatug'ın adam Jaratqan İyege g'a'lle sadaqası ushın to'rtten bir hin za'ytu'n mayı menen aralastırılg'an onnan bir efa sapalı un da alıp kelsin.
5 Ja'ne de, jandırılatug'ın qurbanlıq yamasa basqa qurbanlıq penen birge ha'r bir toqlıg'a ishimlik sadaqası etip to'rtten bir hin sharap ta usınıwı tiyis.
6 Eger qoshqardı qurbanlıq etip bersen'iz, g'a'lle sadaqası ushın u'shten bir hin za'ytu'n mayı aralastırılg'an onnan eki efa sapalı un
7 ha'm ishimlik sadaqası ushın u'shten bir hin sharap usının'. Bular – Jaratqan İyege xosh iyisli sıy boladı.
8 Jaratqan İyege jandırılatug'ın qurbanlıq, wa'de boyınsha beriletug'ın qurbanlıq yamasa tatıwlıq qurbanlıg'ı ushın bir bug'a alıp kelgenin'izde,
9 bug'a menen birge g'a'lle sadaqası ushın yarım hin za'ytu'n mayı aralastırılg'an onnan u'sh efa sapalı un usının'.
10 Sonın' menen birge, ishimlik sadaqası ushın yarım hin sharap usının'. Bul qurbanlıq Jaratqan İyege xosh iyisli sıy boladı.
11 Solay etip bug'a, qoshqar, ılaq yamasa toqlı qurbanlıq qılıng'anda, usı sadaqalar menen qosa usınılsın.
12 Qansha haywan qurbanlıq qılmaqshı bolsan'ız da, olardın' ha'r biri ushın belgilengen mug'darda g'a'lle ha'm ishimlik sadaqaların qosıp usınıwın'ız tiyis.
13 İzraillı bolg'an ha'r bir adam Jaratqan İyege xosh iyisli sıy etip, qurbanlıq alıp kelgende, ol usı aytılg'anlarg'a a'mel qılıwı tiyis.
14 Eger sizlerdin' aran'ızda waqtınsha jasap atırg'an kelgindi yamasa uzaq waqıt jasap atırg'an jat jerli adam Jaratqan İyege xosh iyisli sıy qılıp, bir qurbanlıq alıp kelse, ol da usı qag'ıydalarg'a a'mel qılıwı tiyis.
15 Sizler ushın da, aran'ızda jasap atırg'an kelgindi adam ushın da ja'miyet anıq usı qag'ıydalardı qollansın.
16 Bul keleshek a'wladların'ız ushın da ma'n'gi qag'ıyda bolsın. Jaratqan İyenin' aldında sizler de, sizlerdin' aran'ızda jasap atırg'an kelgindi de birdey».
17 Jaratqan İye Muwsag'a bılay dedi:
18 – İzrail xalqına bılay dep ayt: «Sizlerdi alıp baratırg'an elge kirgenin'izden keyin,
19 sol eldin' nanınan jegenin'izde, nannın' bir bo'legin ajıratıp, Mag'an usının'.
20 Qırmanın'ızdın' birinshi o'niminen ajıratılg'an sadaqa sıyaqlı qamırın'ızdın' birinshi zuwalasınan jabılg'an sho'rekti ajıratıp usının'.
21 Qamırın'ızdın' birinshi zuwalasınan jabılg'an bul sadaqanı a'wladlar dawamında Jaratqan İyege usının'».
22 «Eger birin'iz bilmesten gu'na islep, Jaratqan İyenin' men arqalı bergen buyrıqlarının' birine
23 – Jaratqan İyenin' buyrıq bergen ku'ninen baslap, a'wladlar boyı a'mel qılmasan'ız
24 ha'm ja'miyet bul qa'tege bilmesten jol qoyg'an bolsa, pu'tkil ja'miyet Jaratqan İyege xosh iyisli sıy usınıw ushın, bir bug'anı jandırılatug'ın qurbanlıq etip bersin. Olar bug'a menen birge belgilengen mug'darda g'a'lle ha'm ishimlik sadaqasın bersin. Sonın' menen birge, gu'na qurbanlıg'ı ushın bir teke alıp kelsin.
25 Solay etip, ruwxaniy pu'tkil İzrail ja'miyetinin' gu'nası ushın qun to'lew ra'simin o'tkeredi ha'm olardın' gu'nası keshiriledi. Sebebi olar bilmesten gu'na islegen edi ha'm bul ushın Jaratqan İyege jandırılatug'ın qurbanlıq ha'm gu'na qurbanlıqların usıng'an boladı.
26 Pu'tkil İzrail ja'miyeti de, aran'ızda jasap atırg'an kelgindi de keshiriledi. O'ytkeni xalıq bilmesten usı gu'nanı isledi.
27 Eger bir adam bilmesten gu'na islep qoysa, ol gu'na qurbanlıg'ı ushın bir jasar eshki alıp kelsin.
28 Ruwxaniy Jaratqan İyenin' aldında sol adamnın' pa'kleniwi ushın gu'nanın' qunın to'lew ra'simin o'tkersin. Bul ra'sim o'tkerilgende, sol adamnın' gu'nası keshiriledi.
29 Bilmesten gu'na islep qoyg'an izraillı ushın da, aran'ızda jasap atırg'an kelgindi ushın da usı nızamdı qollanıwın'ız tiyis.
30 İzraillı yamasa kelgindi bir adam bilip turıp gu'na islese, Jaratqan İyege til tiygizgen boladı. Bunday adam İzrail xalqının' arasınan joq qılınsın.
31 Ol Jaratqan İyenin' so'zlerin pisent etpey, buyrıqlarına qarsı shıqqanı ushın, ol adam xalqının' arasınan so'zsiz joq qılınsın. Onın' gu'nası o'z moynında qaladı».
32 Bir ku'ni izraillılar sho'lde ju'rgen waqıtta bir adam dem alıs ku'ni bolg'an Shabbat ku'ni otın jıynap ju'rgen jerinen uslap alındı.
33 Otın jıynap ju'rgen adamdı uslap alg'an adamlar onı Muwsa menen Xaronnın' ha'm pu'tkil ja'miyettin' aldına alıp keldi.
34 Sol adamg'a qanday shara qollanılıwı kerekligi anıq bolmag'anlıqtan, onı qamap qoydı.
35 Sonnan keyin, Jaratqan İye Muwsag'a: – Ol adam so'zsiz o'ltirilsin. Pu'tkil ja'miyet onı ordanın' sırtına alıp shıg'ıp, tas boran qılsın, – dedi.
36 Solay etip, Jaratqan İyenin' Muwsag'a buyırg'anınday, ja'miyet sol adamdı ordanın' sırtına alıp shıg'ıp, tas boran qılıp o'ltirdi.
37 Jaratqan İye Muwsag'a bılay dedi:
38 – İzrail xalqına bılay dep ayt: «A'wladların'ız dawamında kiyimin'izdin' eteklerine shashaq tiktirip qoyın'. Ha'r bir shashaqqa qızg'ısh ko'k jip qosıp islensin.
39 Usı shashaqlar sizlerge Menin', yag'nıy Jaratqan İyenin' buyrıqların esletip turadı. Solay etip, bulardı ko'rgenin'izde, buyrıqlarıma a'mel qılıp, ju'regin'izdin' ha'm ko'zin'izdin' qa'lewlerine erip ketpey, opasızlıq qılmaysızlar.
40 Sonda sizler pu'tkil buyrıqlarımdı yadın'ızda tutıp, Qudayın'ız ushın muxaddes bolasızlar.
41 Men Qudayın'ız bolıw ushın sizlerdi Mısırdan alıp shıqqan Qudayın'ız Jaratqan İyemen. Men – Qudayın'ız Jaratqan İyemen».
