Sanlar 17 bob
1 Jaratqan İye Muwsag'a bılay dedi:
2 – İzrail xalqına ha'r bir urıw ko'semi ushın bir danadan on eki tayaq alıp keliwin buyır. Ha'r bir urıw basshısının' atın o'z tayag'ının' u'stine jaz.
3 Lebiy urıwına tiyisli tayaqtın' u'stine Xaronnın' atın jaz. Ha'r bir urıw basshısı ushın bir tayaqtan bolıwı tiyis.
4 Tayaqlardı Ushırasıw shatırındag'ı Men sizler menen ushırasatug'ın orınnın', Kelisim sandıg'ının' aldına qoy.
5 Men tan'lap alatug'ın adamnın' tayag'ı bo'rtik shıg'aradı. Solay etip, İzrail xalqının' sizlerge qarsı shıg'ıp, narazı bolıp, ton'qıldawlarına shek qoyaman.
6 Muwsa aytılg'anlardı İzrail xalqına jetkerdi. Xalıqtın' ko'semleri ha'r bir urıw ushın bir danadan on eki tayaq alıp keldi. Xaronnın' tayag'ı da solardın' ishinde edi.
7 Muwsa tayaqlardı buyrıqlar qoyılg'an shatırg'a, Jaratqan İyenin' aldına qoydı.
8 Muwsa erten'ine shatırg'a kirip qarasa, Lebiy urıwı ushın alıp kelingen Xaronnın' tayag'ı bo'rtik shıg'arıp g'ana qoymay, ol gu'llep, badam jemisin de bergen eken.
9 Muwsa barlıq tayaqlardı Jaratqan İyenin' aldınan alıp shıg'ıp, İzrail xalqına ko'rsetti. Xalıq tayaqlardı qarastırıp, ha'r biri o'zlerine tiyisli tayaqtı aldı.
10 Jaratqan İye Muwsag'a: – Ko'terilisshilerge eskertiw bolıwı ushın, Xaronnın' tayag'ın Kelisim sandıg'ının' aldına qaytadan aparıp qoy. Usılayınsha, sen ko'terilislerin toqtatıp, olardın' o'lip ketiwine jol qoymaysan', – dedi.
11 Muwsa Jaratqan İyenin' buyırg'anınday etip orınladı.
12 İzraillılar Muwsag'a: – O'lip ketemiz! Qırılıp ketemiz! Ha'mmemiz qırılıp ketemiz!
13 Jaratqan İyenin' Muxaddes shatırına jaqınlasqan ha'r bir adam o'ledi. Endi ha'mmemiz qırılıp ketemiz be? – dedi.
