Sanlar 19 bob
1 Jaratqan İye Muwsa menen Xarong'a bılay dedi:
2 – Jaratqan İye buyırg'an nızamnın' talapları mınalar: izraillılarg'a minsiz, kemshiligi joq ha'm hesh qanday moyıntırıq salınbag'an qızıl jas sıyır alıp keliwin aytın'.
3 Sıyır ruwxaniy Elazarg'a berilsin. Keyin onı ordanın' sırtına shıg'arıp, Elazardın' ko'z aldında soyın'.
4 Ruwxaniy Elazar barmag'ın sıyırdın' qanına batırıp, onı Ushırasıw shatırının' aldıng'ı ta'repine jeti ma'rtebe serpsi.
5 Sonnan keyin, Elazardın' ko'z aldında sıyır, onın' terisi, go'shi, qanı ha'm da'risi menen birge jandırıp jiberilsin.
6 Ruwxaniy kedr ag'ashın, mayoran sho'bin ha'm qırmızı jipti alıp, olardı janıp atırg'an sıyırdın' u'stine taslasın.
7 Keyin ruwxaniy kiyimlerin juwıp, o'zi suwg'a juwınıp alsın. Sonnan keyin, ol ordag'a kiriwine boladı. Biraq ol keshke deyin haram sanaladı.
8 Sıyırdı jaqqan adam da kiyimlerin juwıp, o'zi juwınıp alsın. Ol da keshke deyin haram sanaladı.
9 Sonnan keyin, pa'k sanalg'an bir adam sıyırdın' ku'lin jıynap alıp, ordanın' sırtındag'ı taza bir jerge aparıp qoysın. İzrail ja'miyeti bul ku'ldi pa'kleniw suwına qosıw ushın saqlap qoysın. Bul ku'l adamlardın' gu'nadan pa'kleniw ra'simi ushın qollanıladı.
10 Sıyırdın' ku'lin jıynag'an adam kiyimlerin juwsın, ol keshke deyin haram sanaladı. Bul izraillılar ushın da, aran'ızda jasap atırg'an kelgindiler ushın da ma'n'gi qag'ıyda bolsın.
11 Adamnın' o'ligine bir jerin tiygizip alg'an ha'r bir adam jeti ku'n haram sanaladı.
12 Ol adam pa'kleniw suwı menen u'shinshi ha'm jetinshi ku'ni o'zin pa'klesin. Sonda ol pa'k boladı. Eger ol u'shinshi ha'm jetinshi ku'ni o'zin pa'klemese, onda ol pa'k sanalmaydı.
13 Adamnın' o'ligine bir jerin tiygizip, o'zin pa'klemegen adam Jaratqan İyenin' Shatırın haramlag'an boladı. Onday adam İzrail xalqının' arasınan joq qılınsın. Onın' u'stine pa'kleniw suwı serpilmegeni ushın, ol haram sanaladı, haramlılıg'ı o'zinde qaladı.
14 Eger shatırdın' ishinde bir adam qaytıs bolsa, bug'an tiyisli qag'ıyda mınadan ibarat: sol waqıtta shatırda bolg'an ha'm shatırg'a kirgen ha'r bir adam jeti ku'n dawamında haram sanaladı.
15 Shatırdın' ishinde qaqpag'ı jabılmay, awzı ashıq qalg'an ha'r bir ıdıs haram sanaladı.
16 Dalada qılısh penen o'ltirilgen yamasa o'z a'jeli menen o'lgen birewdin' o'ligine, su'yegine yamasa qa'birine bir jerin tiygizgen ha'r bir adam jeti ku'n dawamında haram sanaladı.
17 Haram sanalg'an adam ushın bir ıdıstın' ishine jandırılg'an gu'na qurbanlıg'ının' ku'linen salıp, u'stine ag'ın suwdan quyın'.
18 Pa'k sanalg'an bir adam mayoran sho'bin alıp, suwg'a batırsın. Keyin onı shatırg'a, onın' ishindegi barlıq buyımlardın' ha'm ha'r bir adamnın' u'stine sebelesin. O'lgen adamnın' su'yegine, o'ltirilgen yamasa o'z a'jeli menen o'lgen adamg'a yamasa qa'birge bir jerin tiygizgen adamnın' u'stine de sol suwdan sebelensin.
19 Pa'k sanalg'an adam u'shinshi ha'm jetinshi ku'ni haram sanalg'an adamnın' u'stine suwdan sewip, onı jetinshi ku'ni pa'klesin. Pa'klengen adam kiyimlerin suwg'a juwıp, o'zi de juwınsın, sonda ol keshte pa'k sanaladı.
20 Eger haram sanalg'an adam o'zin pa'klemese, ol ja'miyettin' arasınan joq qılınsın. O'ytkeni ol Jaratqan İyenin' Muxaddes ma'kanın haramlag'an boladı. Pa'kleniw suwı onın' u'stine serpilmegeni ushın, ol adam haram sanaladı.
21 Bul xalıq ushın ma'n'gi qag'ıyda bolsın. Pa'kleniw suwın serpken adam da kiyimlerin juwsın. Pa'kleniw suwın uslag'an adam keshke deyin haram sanaladı.
22 Haram adam jantasqan ha'r bir na'rse haram sanaladı. Sol haramlang'an zatqa jantasqan adam da keshke deyin haram sanaladı
