Sanlar 22 bob
1 Sonnan keyin, izraillılar jolın dawam etti. Olar oypatlıqtın' Moabqa tiyisli bo'legine kelip, İordan da'ryasının' shıg'ısına, Erixo qalasının' qarsı aldına ornalastı.
2 Sippor ulı Balaqtın' izraillılardın' amor xalqına neler islegeninen xabarı bar edi.
3 İzrail xalqı sonshelli ko'p bolg'anlıqtan, moablılar olardan qattı qorqısıp, albırawshılıqqa tu'sken edi.
4 Sonda moablılar Midyan aqsaqallarına: «O'giz jaylawdag'ı ot-sho'pti jep joq qılg'anı sıyaqlı, bul xalıq ta do'geregimizdegi barlıq na'rseni ishipjep joq qıladı», – dedi.Sol waqıtları Sippor ulı Balaq Moab patshası edi.
5 Balaq Beor ulı Bilamdı shaqırtıw ushın xabarshıların jiberdi. Bilam Evfrat da'ryasının' boyında, Ammaw u'lkesindegi Petorda jasaytug'ın edi. Balaq Bilamg'a xabarshılarınan bılay dep aytıp jibergen edi: «Mısır jerinen shıg'ıp, jer ju'zin qaplag'an bir xalıq menin' janıma kelip ornalastı.
6 O'tinemen, siz kelip, mennen de ku'shli bolg'an sol xalıqtı men ushın na'letlen'. Mu'mkin, sonda men olardı jen'ip, elimnen quwıp shıg'ara alarman. O'ytkeni sizin' pa'tiya bergen adamın'ız jarılqanıp, na'letlegen adamın'ız na'letlenetug'ının bilemen».
7 Moab ha'm Midyan aqsaqalları Bilamg'a na'letlewi ushın to'lenetug'ın puldı alıp ketti. Olar Bilamg'a barıp, og'an Balaqtın' so'zlerin jetkerdi.
8 Bilam olarg'a: – Usı jerde qonıp qalın'. Jaratqan İyenin' aytqanı boyınsha sizlerge juwap beremen, – dedi. Solay etip, Moab basshıları Bilamnın' u'yinde qonıp qaldı.
9 Quday Bilamg'a kelip, onnan: – U'yin'de qalg'an mına adamlar kim? – dep soradı.
10 Bilam Qudayg'a bılay dep juwap berdi: – Moab patshası Sippor ulı Balaq mag'an mına xabardı jiberipti:
11 «Mısır jerinen shıqqan bir xalıq jer ju'zin qaplap ketti. Siz kelip, men ushın sol xalıqtı na'letlen'. Sonda men olarg'a qarsı urısıwg'a ku'shim jetip, olardı quwıp jibere alarman».
12 Biraq Quday Bilamg'a: – Olar menen birge barma! Sol xalıqtı na'letleme, sebebi olar jarılqaw alg'an xalıq, – dedi.
13 Azanda Bilam Balaqtın' jibergen basshılarına: – Elin'izge qayta berin'. Sebebi Jaratqan İye sizler menen birge barıwıma ruxsat bermedi, – dedi.
14 Moab basshıları izine qaytıp, Balaqqa: «Bilam bizler menen birge keliwge ırazı bolmadı», – dedi.
15 Sonda Balaq aldıng'ı jibergenlerinen de ko'birek ha'm olardan da abıraylılaw basshıların jiberdi.
16 Olar Bilamnın' aldına barıp, bılay dep ayttı: – Sippor ulı Balaq bılay dep aytıp jiberdi: «O'tinemen, menin' aldıma keliwin'izge hesh bir na'rse tosqınlıq qılıwına jol qoyman'.
17 O'ytkeni sizge ayrıqsha hu'rmet ko'rsetemen, ne qa'lesen'iz, sonı isleymen. Ne bolsa da, kelin', men ushın bul xalıqtı na'letlen'».
18 Bilam Balaqtın' xabarshılarına mınaday juwap qaytardı: – Balaq sarayındag'ı barlıq gu'mis ha'm altındı mag'an berse de, Qudayım Jaratqan İyenin' buyrıg'ısız hesh na'rse qılmayman.
19 Ma'rha'mat, bu'gin tu'nde usı jerde sizler de qonıp qalın', Jaratqan İyenin' mag'an basqa ne aytatug'ının bilip alayın.
20 Sol tu'ni Quday Bilamg'a kelip: – Bul adamlar seni shaqırıw ushın kelgen eken, olar menen birge bar, biraq Men sag'an ne aytsam, sonı isleysen', – dedi.
21 Solay etip, azanda Bilam eshegin ertledi de, Moab basshıları menen birge ketti.
22 Bilam jolg'a shıqqanda, Quday og'an g'a'zeplendi. Jaratqan İyenin' perishtesi og'an qarsılıq qılıw ushın, onın' jolında turıp aldı. Sonda Bilam eshegine minip, ketip baratır edi. Onın' qasında eki xızmetkeri bar edi.
23 Eshek qılıshın jalan'ashlap turg'an Jaratqan İyenin' perishtesin ko'rgende, joldan shıg'ınıp, atızdın' ishine kirip ketti. Al Bilam bolsa, eshegin jolg'a qaytarıw ushın, onı sabay basladı.
24 Sonnan son', Jaratqan İyenin' perishtesi ju'zimzarlardın' arasındag'ı tar soqpaqta turıp aldı. Soqpaqtın' eki ta'repi de diywallar menen qorshalg'an edi.
25 Eshek Jaratqan İyenin' perishtesin ko'rip, diywalg'a tıg'ılıp, Bilamnın' ayag'ın qısıp tasladı. Bilam eshegin ja'ne sabay basladı.
26 Jaratqan İyenin' perishtesi aldıg'a jıljıp, tar jerde turıp aldı. Endi eshek on'g'a da, solg'a da burılıp kete almaytug'ın edi.
27 Jaratqan İyenin' perishtesin ko'rgen eshek Bilamnın' astına jatıp aldı. Bilamnın' bug'an g'a'zebi qaynap, tayag'ı menen eshekti ja'ne sabay basladı.
28 Sonda Jaratqan İyenin' qu'direti menen eshekke til pitip, Bilamg'a: – Meni u'sh ma'rte urıp sabag'anday, men sag'an ne qıldım? – dep soradı.
29 Bilam: – Sen meni mazaq qılıp atırsan'. Eger qolımda qılıshım bolg'anda, seni o'ltirip taslag'an bolar edim! – dep baqırdı.
30 Eshek og'an: – Usı ku'nge deyin minip ju'rgen eshegin' men emespen be? Burın sag'an usınday qılıq shıg'arg'an ba edim? – dedi. Bilam: – Yaq, – dedi.
31 Sonnan son', Jaratqan İye Bilamnın' ko'zin ashtı. Sonda Bilam qılıshın jalan'ashlap, jolda turg'an Jaratqan İyenin' perishtesin ko'rip, et betinen jerge jıg'ıldı.
32 aratqan İyenin' perishtesi Bilamg'a: – Ne ushın eshegin'di u'sh ma'rte urıp, sabadın'? Sag'an qarsılıq qılıw ushın keldim. Sebebi tutqan jolın' seni ba'lege duwshar qıladı.
33 Al eshegin' bolsa Meni ko'rip, u'sh ma'rte o'zin joldan shetke alıp qashtı. Eger ol joldan shetke shıqpag'anda, seni o'ltirip, onı aman qaldırg'an bolar edim, – dedi.
34 Bilam Jaratqan İyenin' perishtesine: – Gu'na qıldım. Mag'an qarsı shıg'ıw ushın, jolda turg'anın'dı bilmeppen. Eger bul tutqan jolım Sag'an maqul bolmasa, onda u'yime qaytayın, – dedi.
35 Jaratqan İyenin' perishtesi og'an: – Mına adamlar menen birge kete ber. Biraq Men sag'an ne aytsam, tek g'ana sonı aytasan', – dedi. Solay etip, Bilam Balaqtın' basshıları menen birge ketti.
36 Balaq Bilamnın' kiyatırg'anın esitiwden, onı ku'tip alıw ushın Arnon boyındag'ı, Moab elinin' shegarasında jaylasqan İr qalasına ketti.
37 Balaq Bilamg'a: – Sizdi shaqırıw ushın jibergen aldıng'ı adamlarım menen ne ushın kelmedin'iz? Yamasa meni sawg'a menen sıylawg'a ku'shi jetpeydi, dep oylap pa edin'iz? – dedi.
38 Bilam Balaqqa: – Mine, endi sizin' aldın'ızg'a keldim. Quday menin' awzıma qanday so'z salsa, sonı aytaman, o'zligimnen ne aytıwım mu'mkin? – dep juwap berdi.
39 Sonnan keyin, Bilam Balaq penen birge jolg'a tu'sip, Kiryat-Xusot qalasına ketti.
40 Sol jerde Balaq bug'a ha'm qoylardı qurbanlıqqa shaldı. Qurbanlıqtın' go'shinen Bilam menen onın' qasındag'ı basshılarg'a da berdi.
41 Erten'ine azanda Balaq Bilamdı Bamot-Baal to'beshigine alıp shıqtı. Bilam ol jerden İzrail xalqının' bir bo'legin ko'rdi.
