Sanlar 23 bob
1 Bilam Balaqqa: – Usı jerde men ushın jeti qurbanlıq orın qurıp, jeti bug'a menen jeti qoshqar tayarlan', – dedi.
2 Balaq onın' aytqanların isledi. Balaq penen Bilam ekewi ha'r bir qurbanlıq orınnın' u'stinde bir bug'a ha'm bir qoshqardan jandırılatug'ın qurbanlıq qıldı.
3 Keyin Bilam Balaqqa: – Siz qurbanlıqların'nın' qasında turın', men sa'l armanlaw barıp ko'reyin. Ba'lkim, Jaratqan İye menin' menen ushırasıwg'a keler. Ol mag'an ne dese, sag'an sonı aytaman, – dedi de, to'beshikke shıqtı.
4 Quday Bilamg'a ko'ringende, Bilam Qudayg'a: – Jeti qurbanlıq orın qurdırdım, ha'r bir qurbanlıq orınnın' u'stinde bir bug'a ha'm bir qoshqardan qurbanlıq qıldım, – dedi.
5 Jaratqan İye Bilamnın' awzına aytatug'ın so'zlerin salıp, og'an: – Balaqtın' aldına bar ha'm og'an Menin' aytqan so'zlerimdi jetkiz, – dedi.
6 Solay etip, Bilam Balaqtın' qasına qaytıp bardı. Ol Balaqtın' Moab basshıları menen birge jandırılg'an qurbanlıqtın' janında turg'anın ko'rdi.
7 Sonda Bilam mına so'zlerdi ayttı: «Moab patshası Balaq meni Aramnan, Shıg'ıs tawlarınan alıp keldi. Ol: „Kelip, menin' ushın Yaqıp urpag'ın na'letle, Kelip, İzrailg'a jamanlıq tile!“ – dedi.
8 Quday na'letlemegendi Men qalayınsha na'letleymen? Jaratqan İye jamanlıq tilemegenge, Men qalay jamanlıq tileymen?
9 Jartaslardın' to'besinde turıp, ko'rip turman olardı, To'belerden qarap turman olarg'a. O'z aldına jasaytug'ın, Basqa xalıqlardan o'zlerin bo'lek uslaytug'ın, Bir xalıqtı ko'rip turman.
10 Yaqıptın' qum sıyaqlı ko'p urpag'ın kim sanay aladı? Ko'terilgen shan' kibi sansız İzraildı kim esaplay aladı? Adil adamlardın' o'limi menen men de o'leyin, Aqıretim olardiki kibi bolsın!»
11 Balaq Bilamg'a: – Mag'an ne islep atırsız o'zi? Men sizdi dushpanlarımdı na'letlesin dep alıp kelgen edim, al siz bolsan'ız, olarg'a pa'tiya berip atırsız-g'o! – dedi.
12 Bilam: – Men Jaratqan İye awzıma salg'an so'zdi abaylap aytıwım kerek emes pe? – dep juwap berdi.
13 Sonnan son', Balaq og'an bılay dedi: – Menin' menen birge olardı ko're alatug'ın basqa jerge ju'rin'. Biraq ol jerden olardın' ha'mmesin emes, al tek g'ana bir bo'legin ko'resiz. Sol jerde turıp, İzrail xalqın menin' ushın na'letlen'.
14 Solay etip, Balaq Bilamdı Pisga tawının' to'besindegi gu'zetiw ornına alıp bardı. Balaq ol jerde de jeti qurbanlıq orın qurıp, ha'r bir qurbanlıq orınnın' u'stinde bir bug'a ha'm bir qoshqardan qurbanlıq berdi.
15 Bilam Balaqqa: – Siz usı jerde, jandırılatug'ın qurbanlıqtın' qasında turın', al men ana jerge barıp, Jaratqan İye menen ushırasıp kelemen, – dedi.
16 Jaratqan İye Bilam menen ushırastı ha'm onın' awzına aytatug'ın so'zlerin salıp: – Balaqtın' aldına barıp, og'an mına so'zlerdi jetkiz, – dedi.
17 Solay etip, Bilam Balaqtın' qasına qaytıp bardı. Ol Balaqtın' Moab basshıları menen birge jandırılg'an qurbanlıqtın' qasında turg'anın ko'rdi. Balaq: – Jaratqan İye ne dedi? – dep soradı.
18 Bilam og'an mına so'zlerdi jetkerdi: «Balaq, tın'lap tu'sinip alın', Sippor ulı, mag'an qulaq salın'.
19 Quday insan emes jalg'an so'yleytug'ın, Ol adamzat emes O'z pikirin o'zgertetug'ın. Ol O'z aytqan so'zin a'melge asırar, Wa'de bergende, so'zsiz orınlar.
20 Jarılqaw ushın mag'an buyrıq berdi, O'zgertire almaspan men Onın' jarılqawın.
21 Yaqıp urpag'ında apat ko'rinbeydi, Baxıtsızlıq ta ko'rinbes İzrailda, Qudayı Jaratqan İye olar menen birge, Ol Patshasıdur olardın' arasında, Patshalıq ka'rnay shertiler arnalıp Onın' atına.
22 Quday olardı Mısırdan alıp shıqtı, Jabayı bug'a sıyaqlı Onın' ku'shi bar.
23 Yaqıptın' urpag'ında jorıwshılıq joq, İzrailda palkerlik qılınbas. Endi bolsa, Yaqıptın' urpag'ı İzrail ushın, „Quday nelerdi isledi!“ – dep aytılıp atır.
24 Mine, xalıq ana arıslan kibi oyanar, Arıslan yan'lı oljasın jep tawıspag'ansha, O'ltirgen oljasının' qanın iship bolmag'ansha jatpas».
25 Sonda Balaq: – Eger İzrail xalqın na'letlemeydi ekensiz, onda olardı jarılqama da! – dedi.
26 Bilam og'an: – Sizge Jaratqan İye ne aytsa, sonı aytaman dep aytqan joq pa edim? – dep juwap berdi.
27 Balaq Bilamg'a: – Ne bolsa da, ju'r, endi sizdi basqa jerge alıp barayın. Ba'lkim, Qudayg'a maqul bolıp, ol jerden olardı na'letlewin'izge jol qoyar, – dedi.
28 Solay etip, ol Bilamdı Peor tawının' to'besine alıp bardı. Ol jerden sho'l dala ko'rinetug'ın edi.
29 Bilam og'an: – Bul jerde de jeti qurbanlıq orın qurıp, jeti bug'a ha'm jeti qoshqar tayarlan', – dedi.
30 Balaq onın' aytqanların isledi ha'm ha'r bir qurbanlıq orınnın' u'stinde bir bug'a ha'm bir qoshqardan qurbanlıq berdi.
