Sanlar 24 bob
1 Bilam Jaratqan İyenin' İzrail xalqın jarılqawdı maqul ko'retug'ının bilgende, aldıng'ıday barıp, jorıwg'a urınbadı. Ol o'z na'zerin sho'lge qarattı.
2 Bilam ol jaqta İzraildın' urıw-urıw bolıp jaylasqanın ko'rdi. Sonda Qudaydın' Ruwxı Bilamnın' u'stine tu'sti
3 ha'm Bilam mına so'zlerdi ayttı: «Ko'zi ashıq Beor ulı Bilam,
4 Qudaydın' so'zlerin esitken, Qu'direti ku'shli Qudaydın' ayanı tu'sken, Jerge qulag'an, biraq Quday ko'zlerin ashqan adam so'yleydi:
5 „Yaqıp urpag'ı, shatırların' qanday a'jayıp, İzrail xalqı, ma'kan jerin'iz qanday go'zzal!
6 Olar sozılg'andur palmazarday, Da'rya boyındag'ı bag'ı-baqsha kibi, Jaratqan İyenin' otırg'ızg'an aloe ag'ashınday, Megzeydi suw boyındag'ı kedr ag'ashlarına.
7 Suw ıdıslarınan suw tolıp tasar, Tuqımları mol suw menen suwg'arılar. Agagtan İzrail patshası ullı bolar, İzrail patshalıg'ı qu'diretli bolar.
8 Quday olardı Mısırdan alıp shıqtı, Jabayı bug'a sıyaqlı ku'shi bar Onın'. Dushpanı bolg'an xalıqlardı jalmamay jutar, Olardın' su'yeklerin ezip, oqların sındırar.
9 İzrail arıslanday, ana arıslan yan'lı, Jerge iyildi de, jattı, Onı oyatıwg'a kimnin' batılı barar? Seni jarılqaytug'ınlar jarılqansın, Seni g'arg'aytug'ınlar g'arg'ısqa ushırasın!“»
10 Bilamg'a g'a'zebi qaynag'an Balaq qolların bir-birine urıp: – Dushpanlarımdı na'letlesin dep, sizdi shaqırg'an edim. Al siz bolsan'ız, olarg'a u'sh ma'rte pa'tiya berdin'iz.
11 Endi da'rhal u'yin'izge qaytın'! Sizge sawg'a sıylayman degen edim, biraq Jaratqan İye sizdi sawg'adan bos qaldırdı, – dedi.
12 Sonda Bilam og'an juwap berip, bılay dedi: – Mag'an jibergen elshilerin'e: «Balaq sarayındag'ı barlıq gu'mis ha'm altındı mag'an berse de, Jaratqan İyenin' buyrıg'ısız hesh qanday jaqsı da, jaman da na'rse qılmayman.
13 Al Jaratqan İye neni buyırsa, sonı so'yleymen», – dep aytqan joqpan ba?
14 Endi men o'z elime qaytaman. Biraq aldın İzrail xalqının' keleshekte senin' xalqın'ızg'a neler isleytug'ının sizge aytıp bereyin.
15 Son'ınan Bilam mına so'zlerdi ayttı: «Ko'zi ashıq Beor ulı Bilam,
16 Qudaydın' so'zlerin esitken, Quday Taaladan bilim alg'an, Qu'direti ku'shli Qudaydın' sawlatın ko'rgen, Jerge qulag'an, Quday ko'zlerin ashqan adam so'yleydi:
17 „Onı ko'rip turman, biraq ha'zir emes, Og'an qarap turman, biraq ol jaqın emes. Yaqıp urpag'ınan bir juldız shıg'ar, İzraildan patshalıq hasası ko'teriler. Ol Moabtın' ko'semlerin joq qılıp, Shettin' urpag'ının' basların ezer.
18 Dushpanı bolg'an Edomdı iyelep alar, Awa, Seir jen'iliske ushırar, Al İzrail xalqı ku'shke tolar.
19 Yaqıp urpag'ınan bolg'an adam basshılıq qılar, Qala xalqının' qalg'anların joq qılar“».
20 Sonnan keyin, Bilam amaleklerdi ko'rip, mınaday so'zlerdi ayttı: «Amalek xalqı basqa xalıq arasında birinshi edi, Biraq apat bolajaq onın' aqırı».
21 Keyin ol ken xalqın ko'rip, mınaday so'z ayttı: «Sizlerdin' baspanan'ız bekkem, Uyan'ız jartaslarg'a qurılg'an.
22 Biraq, ha'y kenler, ashshur xalqı sizlerdi tutqın qılg'anda, Sizler janıp, joq bolasızlar».
23 Bilam so'zlerin ja'ne bılay dep dawam etti: «Oh, bunı a'melge asıratug'ın Quday bolsa, Onda kim aman qalar?
24 Kittim jag'alarınan kemeler keler, Ashshur menen eber xalqın ta'slim qılar, Biraq o'zleri de apatqa duwshar bolar».
25 Keyin, Bilam jolg'a shıg'ıp, u'yine qayttı. Balaq ta o'z jolı menen ketti.
