Sanlar 27 bob
1 Yusup ulı Menashshenin' urıwınan bolg'an Maxirdin' shawlıg'ı, Giladtın' aqlıg'ı, Xeferdin' ulı bolg'an Selofexad degen adamnın' qızları bar edi. Olardın' atları Maxla, Noa, Xogla, Milka ha'm Tirsa edi
2 Bir ku'ni Selofexadtın' qızları Ushırasıw shatırının' aldına, Muwsanın', ruwxaniy Elazardın', ko'semlerdin' ha'm pu'tkil ja'miyettin' aldına kelip, bılay dedi:
3 – A'kemiz sho'lde qaytıs bolg'an edi. Ol Jaratqan İyege ko'terilis qılg'an Qoraxtın' sherikleslerinin' arasında bolg'an joq edi, al o'z gu'nası sebepli qaytıs bolg'an edi. Onın' ul perzenti bolmadı.
4 Ul perzenti bolmag'anı ushın a'kemizdin' atı o'z tiyresi arasınan o'ship qalıwı kerek pe? A'kemizdin' tuwısqanları menen qosa bizlerge de jer u'les berin'.
5 Muwsa olardın' talabın Jaratqan İyege jetkerdi.
6 aratqan İye Muwsag'a bılay dedi:
7 – Selofexadtın' qızları durıs aytıp atır. Olarg'a a'kesinin' tuwısqanları menen bir qatar miyras qılıp, u'les jer ber. A'kesinin' jer u'lesi olarg'a berilsin.
8 İzraillılarg'a bılay dep ayt: Eger kim de kim ul perzenti bolmay qaytıs bolsa, onın' mu'lki qızına berilsin.
9 Eger qızı bolmasa, onın' mu'lki tuwısqanlarına berilsin.
10 Eger onın' tuwısqanları bolmasa, a'kesinin' tuwısqanlarına berilsin.
11 Al eger a'kesinin' tuwısqanları bolmasa, onın' mu'lki o'zine en' jaqın bolg'an tiyreles ag'ayinine berilsin. Sol ag'ayini miyrasxor bolsın. Muwsag'a buyırg'anımday, bul izraillılar ushın qag'ıyda bolıp qalsın.
12 Sonnan son', Jaratqan İye Muwsag'a: – Abarim tawına shıg'ıp, izraillılarg'a beretug'ın elge qara.
13 Sol eldi ko'rgenin'nen son', a'jag'an' Xaron sıyaqlı sen de o'lip, ata-babaların'a qosılasan'.
14 Sebebi Xaron ekewin'iz de Zin sho'linde buyrıg'ıma qarsı shıqqan edin'iz. Ja'miyet suw boyında Mag'an ko'terilis qılg'anda, sizler olardın' ko'z aldında Menin' muxaddesligime hu'rmet ko'rsetpedin'ler, – dedi. Bul waqıya Zin sho'linde, Qadeshtegi Meriba suwları boyında bolg'an edi.
15 Muwsa Jaratqan İyege bılay dedi:
16 – Jaratqan İye, pu'tkil adamzatqa jan bergen Quday, bul ja'miyetke bir basshı tayınla.
17 Ol adam ja'miyettin' aldında ju'rip, olarg'a basshılıq qılsın. Solay etip, Jaratqan İyenin', yag'nıy Senin' ja'miyetin' shopansız qoylarday bolıp qalmasın.
18 Sonda Jaratqan İye bılay dedi: – Ruwxıy ku'shli adamdı – Nun ulı Eshuanı janın'a al ha'm og'an qolın'dı qoy.
19 Sonnan keyin, onı ruwxaniy Elazar menen pu'tkil ja'miyettin' aldında shıg'arıp, olardın' ko'z aldında onı xızmetke tayınla.
20 Pu'tkil İzrail ja'miyeti og'an boysınıwı ushın, Eshuag'a o'z biyligin'nen ber.
21 Biraq Eshua ruwxaniy Elazardın' aldına barıp, xabarlasatug'ın bolsın. Elazar Urim arqalı Eshua ushın Menin' erkimdi bilip bersin. Usılay etip, Eshua ha'm pu'tkil İzrail ja'miyeti barlıq jag'dayda usıg'an qarap is tutsın.
22 Muwsa Jaratqan İyenin' o'zine buyırg'anınday etip orınladı. Ol Eshuanı ruwxaniy Elazardın' ha'm pu'tkil ja'miyettin' aldına tik turg'ızıp qoydı.
23 Keyin Jaratqan İyenin' buyrıg'ı boyınsha Muwsa Eshuanın' u'stine qolların qoyıp, onı xızmetke tayınladı.
