Sanlar 3 bob
1 Jaratqan İye Sinay tawında Muwsa menen so'yleskende, Xaron menen Muwsanın' urpaqları mınalardan ibarat edi:
2 Xaronnın' ulları: tun'g'ıshı Nadab, onnan keyingisi Abihu, Elazar ha'm İtamar.
3 May quyılıp, ruwxaniylik xızmetke tayınlang'an Xaronnın' ulları usılar edi.
4 Biraq Nadab penen Abihu Sinay sho'linde Jaratqan İyenin' aldında buyırılmag'an ot usıng'anı ushın o'lgen edi. Olardın' ekewi de perzentsiz edi. Sonlıqtan Elazar menen İtamar a'kesi Xaronnın' qasında ruwxaniylik xızmetin atqardı.
5 Jaratqan İye Muwsag'a bılay dedi:
6 – Ruwxaniy Xarong'a ja'rdem beriwi ushın Lebiy urıwın shaqırıp, olardı xızmetke qoy.
7 Olar Xaron ha'm pu'tkil ja'miyet ushın Ushırasıw shatırında qarawıllıq qılsın ha'm ondag'ı barlıq xızmetti alıp barsın.
8 Olar izraillılar ushın Ushırasıw shatırında xızmet qılıp, ondag'ı barlıq buyımlarg'a juwapker bolsın.
9 Lebiylilerdi Xaron ha'm onın' ullarının' xızmetine tapsır. Lebiyliler İzrail xalqının' ishinde pu'tkilley Xaronnın' xızmetine arnaladı.
10 Ruwxaniylik xızmetin atqarıwı ushın Xaron menen ulların xızmetke qoy. Olardan basqa Muxaddes orıng'a jaqınlag'an ha'r bir adam o'ltirilsin.
11 Jaratqan İye Muwsag'a ja'ne bılay dedi:
12 – Mine, İzrail xalqının' qarınnan birinshi shıqqan ullarının' ornına lebiylilerdi tan'ladım. Olar Mag'an tiyisli.
13 O'ytkeni barlıq tun'g'ıshlar Mag'an tiyisli. Men Mısırda tun'g'ıshlardın' ha'mmesin joq qılg'an ku'ni, İzraildın' barlıq tun'g'ıshların – adamnın' tun'g'ıshın, haywannın' birinshi to'lin O'zime ayırıp aldım. Olar Mag'an tiyisli. Sebebi Men – Jaratqan İyemen+.
14 Jaratqan İye Muwsag'a Sinay sho'linde bılay dedi:
15 – Lebiy urıwın sanaqtan o'tkiz. Bir aylıq ha'm onnan joqarı jastag'ı barlıq er adamlardı a'wladları ha'm tiyreleri boyınsha esaplap shıq.
16 Solay etip, Muwsa Jaratqan İyenin' buyrıg'ı boyınsha olardı sanap shıqtı.
17 Lebiydin' ullarının' atları mınalar: Gershon, Qohat ha'm Merariy.
18 Gershonnın' tiyre basshıları bolg'an ulları mınalar: Libniy ha'm Shimey.
19 Qohattın' tiyre basshıları bolg'an ulları: Amram, İshar, Xebron ha'm Uzziel.
20 Merariydin' tiyre basshıları bolg'an ulları: Maxliy ha'm Mushiy. A'wladları boyınsha Lebiy tiyreleri usılar.
21 Gershonnan Libniy ha'm Shimey tiyreleri kelip shıqtı. 22Olardın' bir aylıq ha'm onnan joqarı jastag'ı esaptan o'tken barlıq erkeklerinin' sanı 7500.
22 Olardın' bir aylıq ha'm onnan joqarı jastag'ı esaptan o'tken barlıq erkeklerinin' sanı 7500.
23 Gershon tiyreleri batısta, Shatırdın' artqı ta'repinde ornalasıwı kerek edi.
24 Gershon a'wladının' basshısı Lael ulı Elyasaf edi.
25 Gershonnın' urpag'ı Ushırasıw shatırının' mına zatları ushın juwapker edi: shatırdın' ishki bo'limi menen japqıshlarına, shatırdın' kirer awzındag'ı perdege,
26 ha'wli ha'm qurbanlıq orındı qorshap turg'an perdelerge, ha'wlinin' kirer awzındag'ı perdege, arqanlarg'a ha'm bularg'a tiyisli barlıq xızmetlerge.
27 Qohattan Amram, İshar, Xebron ha'm Uzziel tiyreleri kelip shıqtı.
28 Olardag'ı bir aylıq ha'm onnan joqarı jastag'ı barlıq er adamlardın' sanı 8600 edi. Olar Muxaddes shatırdın' xızmetine juwapker boldı.
29 Qohattan kelip shıqqan tiyreler shatırdın' qubla ta'repinde ornalasıwı kerek edi.
30 Qohat a'wladının' basshısı Uzziel ulı Elisafan edi.
31 Qohat urpag'ı Kelisim sandıg'ına, stolg'a, shıra qoyg'ıshqa, qurbanlıq orın menen tu'tetki tu'tetiletug'ın orıng'a, Muxaddes shatırdın' buyımlarına, En' muxaddes bo'lme menen Muxaddes bo'lmeni bo'lip turg'an perdege ha'm usılarg'a tiyisli xızmetlerge juwapker edi.
32 Lebiy urıwının' basshılarının' u'stinen ruwxaniy Xaronnın' ulı Elazar basshılıq qılatug'ın edi. Muxaddes shatırg'a juwapker adamlar onın' baqlawı astında boldı.
33 Merariyden Maxliy ha'm Mushiy tiyreleri kelip shıqtı.
34 Olardın' bir aylıq ha'm onnan joqarı jastag'ı esaptan o'tken barlıq erkeklerinin' sanı 6200.
35 Merariy a'wladının' basshısı Abixayıl ulı Suriel edi. Merariy tiyreleri shatırdın' arqa ta'repinde ornalasıwı kerek edi.
36 Merariy urpaqları shatırdın' mına zatları ushın juwapker edi:
37 shatırdın' taxtaylarına, qadalarına, baqanlarına, ultanlarına ha'm bularg'a tiyisli barlıq zatlarg'a, shatırdın' ha'wlisinin' a'tirapındag'ı baqanları menen ultanlarına ha'm qazıqları menen arqanlarına ha'm bularg'a tiyisli barlıq xızmetke.
38 Muwsa, Xaron ha'm onın' ulları shatırdın' shıg'ısqa qarag'an aldıng'ı ta'repine, Ushırasıw shatırının' aldında ornalasatug'ın edi. Olar izraillılar atınan Muxaddes ma'kanda xızmet qılıw ushın qoyılg'an edi. Olardan basqa sol xızmetti atqarıwg'a Muxaddes ma'kang'a jaqınlag'an ha'r bir adam o'ltiriletug'ın edi.
39 Muwsa menen Xaron Jaratqan İyenin' buyrıg'ına muwapıq Lebiy urıwın tiyreleri boyınsha bir aylıq ha'm onnan joqarı jastag'ı barlıq er adamlardı sanap shıqqanda, olardın' ulıwma sanı 22 000 boldı.
40 Sonnan keyin, Jaratqan İye Muwsag'a: – İzraillılardın' bir aylıq ha'm onnan joqarı jastag'ı erkek tun'g'ıshların sanap shıg'ıp, olardı atpa-at dizimge al.
41 İzraillılardın' barlıq tun'g'ısh ullarının' ornına lebiylilerdi, ja'ne de, izraillılardın' haywanlarının' birinshi to'llerinin' ornına lebiylilerdin' haywanların Mag'an ayırıp ber. Men – Jaratqan İyemen, – dedi.
42 Solay etip, Muwsa Jaratqan İyenin' buyırg'anınday etip, izraillılardın' barlıq tun'g'ısh ulların sanap shıqtı.
43 Atpa-at esapqa alıng'an bir aylıq ha'm onnan joqarı jastag'ı tun'g'ısh er adamlar barlıg'ı bolıp 22 273 boldı.
44 Jaratqan İye Muwsag'a ja'ne bılay dedi:
45 – İzraillılardın' tun'g'ısh ullarının' ornına lebiylilerdi, haywanlarının' ornına da lebiylilerdin' haywanların ayırıp shıg'ar. Lebiyliler Meniki boladı. Men – Jaratqan İyemen.
46 Lebiylilerdin' sanınan artıq shıqqan 273 izraillı tun'g'ısh er adamlar ushın qun to'lep qaytıp alıwı tiyis.
47 Ha'r bir artıq shıqqan adam ushın bes shekel gu'misten al. Ha'r bir shekel gu'mis bo'lekleri Muxaddes orın o'lshemi menen jigirma geradan bolsın.
48 Lebiylilerdin' sanınan artıq shıqqanlardan qun sıpatında alınatug'ın gu'misti Xaron menen ullarına ber.
49 Muwsa lebiylilerden artıq shıqqan izraillıllardan qun to'lemi sıpatında pul alg'anda,
50 bul Muxaddes orın o'lshemi menen 1365 shekel gu'mis boldı.
51 Muwsa Jaratqan İyenin' o'zine buyırg'anınday, qunnın' to'lemlerin Xaron ha'm onın' ullarına berdi.
