Sanlar 30 bob
1 Solay etip, Muwsa Jaratqan İyenin' o'zine buyırg'an ha'r bir so'zin izraillılarg'a jetkerdi.
2 Muwsa İzraildın' urıw basshılarına bılay dedi: – Jaratqan İye bılay dep buyırdı:
3 «Eger kim de kim Jaratqan İyege wa'de berse yamasa o'zin bir na'rseden tıyıw ushın ant ishse, ol o'z wa'desin buzbay, aytqan so'zlerinin' ha'mmesin orınlasın.
4 Eger bir qız a'kesinin' u'yinde jasap atırg'an waqtında, Jaratqan İyege wa'de berse yamasa o'zin bir na'rseden tıyıw ushın ant ishse,
5 a'kesi onın' Jaratqan İyege bergen wa'desin yamasa o'zin bir na'rseden tıyıw ushın bergen antın esitip, og'an qarsı shıqpasa, onda qızdın' bergen wa'desi ha'm antı o'z ku'shinde qaladı.
6 Al eger qızdın' a'kesi onın' bergen wa'desin ha'm o'zin bir na'rseden tıyıw ushın bergen antın esitken ku'ni qadag'an qılsa, qızdın' bergen wa'desi ha'm antı o'z ku'shinde qalmaydı. A'kesi qızının' antın qadag'an qılg'anı ushın, Jaratqan İye qızdı keshiredi.
7 Eger qız wa'de bergennen son' yamasa oylanbastan o'zin bir na'rseden tıyıw ushın ant ishkennen keyin turmısqa shıqsa,
8 onın' ku'yewi usı haqqında esitken ku'ni qarsı shıqpasa, onda qızdın' bergen wa'desi ha'm antı o'z ku'shinde qaladı.
9 Al eger qızdın' ku'yewi usı haqqında esitken ku'ni qadag'an qılsa, qızdın' bergen wa'desi ha'm antı o'z ku'shinde qalmaydı. Jaratqan İye qızdı keshiredi.
10 Jesir yaki ku'yewinen ayırılısqan hayaldın' bergen wa'desi yamasa o'zin bir na'rseden tıyıw ushın bergen antı o'z ku'shinde qaladı.
11 Eger ku'yewi menen birge jasap atırg'an hayal wa'de berse yamasa bir na'rseden o'zin tıyıw ushın ant ishse,
12 onın' ku'yewi bul haqqında esitip, og'an qarsı shıqpasa, onda hayaldın' bergen wa'desi ha'm ishken ha'r bir antı o'z ku'shinde qaladı.
13 Al eger onın' ku'yewi bul haqqında esitken ku'ni bunı biykarlasa, hayaldın' bergen wa'desi ha'm ishken antı o'z ku'shinde qalmaydı. Ku'yewi bulardı biykarlag'anı ushın, Jaratqan İye hayaldı keshiredi.
14 Solay etip, ku'yewi hayalının' bergen wa'desin yamasa bir na'rseden o'zin tıyıw ushın ishken antın orınlawına ruxsat beriwi de, onı biykar qılıwı da mu'mkin.
15 Eger ku'yewi bir ku'n ishinde bul ma'selede hayalına qarsı shıqpasa, onda hayalının' bergen barlıq wa'delerin yamasa bir na'rseden o'zin tıyıwı ushın ishken antın tastıyıqlap, ruxsat bergen boladı. Sebebi ol bulardı esitken ku'ni hayalına qarsı shıqpay, onı maqullag'an bolıp esaplanadı.
16 Biraq ku'yewi bulardı esitkennen keyin erten'ine biykarlasa, ol hayalının' ayıbına o'zi juwapker boladı».
17 Erli-zayıplılardın' ha'm a'kesi menen u'yinde jasap atırg'an qızdın' arasındag'ı qarım-qatnaslarg'a tiyisli Jaratqan İyenin' Muwsag'a buyırg'an nızamları usılardan ibarat.
