Sanlar 31 bob
1 Jaratqan İye Muwsag'a bılay dedi:
2 – Midyanlılardan izraillılardın' o'shin al, sonnan keyin bul du'nyadan ko'z jumıp, o'z ata-babaların'a qosılasan'.
3 Sonnan keyin, Muwsa xalıqqa: – Midyanlılarg'a barıp, olardan Jaratqan İyenin' o'shin alıw ushın o'z adamların'ızdı urısqa alıp shıg'ın'.
4 İzraildın' ha'r bir urıwınan mın' adamnan urısqa jiberin', – dedi.
5 Solay etip, İzraildın' ha'r bir urıwınan mın' adamnan, on eki mın' adam tan'lap alınıp, urısqa tayar bolıp turdı.
6 Muwsa olardı ha'm ruwxaniy Elazar ulı Pinexastı urısqa jiberdi. Pinexas o'zi menen birge muxaddes orıng'a tiyisli bazı buyımlardı ha'm dabıl qag'ıp belgi beretug'ın ka'rnaylardı alıp ketti.
7 İzraillılar Jaratqan İyenin' Muwsag'a bergen buyrıg'ı boyınsha midyanlılarg'a qarsı sawash ashıp, olardın' barlıq erkeklerin qırıp tasladı.
8 O'ltirilgenlerdin' arasında Midyannın' bes patshası – Ewiy, Rekem, Sur, Xur ha'm Reba da bar edi. Olar Beor ulı Bilamdı da qılısh penen o'ltirdi.
9 zraillılar midyan xalqının' hayalları menen balaların tutqın qılıp, barlıq malların, su'riwlerin ha'm mu'liklerin olja qılıp aldı.
10 Midyanlılardın' jasap atırg'an barlıq qalaları menen ordalarına ot berdi.
11 Olar adamlardı, haywanlardı ha'm olja qılıp alg'an barlıq mu'liklerdi o'zleri menen alıp ketti.
12 Bul tutqınlardı ha'm olja qılıp alg'an mal-mu'liklerdi İordan da'ryasının' boyına, Muwsa menen ruwxaniy Elazar ha'm İzrail ja'miyeti jıynalg'an Erixo qalasının' qarsısında jaylasqan oypatlıqtın' Moabqa tiyisli bo'legindegi ordag'a alıp keldi.
13 Muwsa, ruwxaniy Elazar ha'm ja'miyet basshıları olardı qarsı alıw ushın ordanın' sırtına shıqtı.
14 Biraq Muwsa sawashtan qaytqan orda sa'rka'rdalarına – mın'basılarg'a ha'm ju'zbasılarg'a g'a'zeplendi.
15 Muwsa olarg'a bılay dedi: – Ne ushın barlıq hayallardı aman qaldırdın'ız?!
16 Bul hayallar Bilamnın' bergen ma'sla'ha'ti boyınsha Peor tawında izraillılardın' Jaratqan İyege qıyanet etiwine sebep bolg'an edi. Sol sebepli Jaratqan İyenin' ja'miyeti arasında o'lim obası ha'wij alg'an edi.
17 Endi barlıq ul balalardı ha'm erkek ko'rgen hayallardı o'ltirin'.
18 Tek g'ana erkekke jaqınlaspag'an jas qızlardı o'zlerin'iz ushın aman qaldırın'.
19 Son'ınan aran'ızdag'ı adam o'ltirgen yamasa o'lige jantasqan ha'r bir adam jeti ku'n dawamında ordanın' sırtında qalsın. U'shinshi ha'm jetinshi ku'ni o'zlerin'izdi de, tutqınların'ızdı da pa'klen'.
20 Ja'ne de, barlıq kiyimlerdi, teriden, eshki ju'ninen ha'm ag'ashtan islengen ha'mme zatlardı pa'klen'.
21 Keyin ruwxaniy Elazar sawashtan qaytqan la'shkerlerge bılay dedi: – Jaratqan İyenin' Muwsag'a buyırg'an nızamının' talapları mınalardan ibarat:
22 altın, gu'mis, mıs, temir, qalayı, qorg'asın –
23 otqa janbaytug'ın barlıq zatlardı ottan o'tkerip, hadallap alın', sonda olar hadal sanaladı. Sonın' menen birge, olardı pa'klew suwı menen de hadallan'. Otqa janatug'ın zatlardı suwdın' o'zi menen hadallap alın'.
24 Jetinshi ku'ni kiyimlerin'izdi juwın'. Sonda sizler pa'k sanalasızlar. Keyin sizler ordag'a qaytıp keliwin'izge boladı.
25 Jaratqan İye Muwsag'a bılay dedi:
26 – Sen, ruwxaniy Elazar ha'm ja'miyettin' a'wlad basshıları qolg'a tu'sken tutqınlar menen oljag'a tu'sken mallardı esaplap shıg'ın'.
27 Qolg'a kirgizgenlerin'izdi ten'dey ekige bo'lip, sawashqa qatnasqan la'shkerler menen ja'miyettin' qalg'an adamlarına bo'listirip berin'.
28 Sawashqa qatnasqan la'shkerlerdin' payına tu'sken tutqınlardan, mal, eshek ha'm mayda maldan Jaratqan İyege, Mag'an bes ju'zden birewin pay qılıp ayırıp berin'.
29 A'skerlerden alıng'an usı paydı Mag'an ajıratılg'an tu'rde ruwxaniy Elazarg'a berin'.
30 İzraillılarg'a tu'sken jartı paydan – adamlardan, mal, eshek ha'm mayda maldan, yag'nıy barlıq haywanlardan eliwden birewin alıp, Menin' Muxaddes shatırımnın' jumısına juwapker bolg'an lebiylilerge berin'.
31 Muwsa menen ruwxaniy Elazar Jaratqan İyenin' Muwsag'a buyırg'anınday etip isledi.
32 Sawashqa qatnasqan la'shkerlerdin' qolg'a kirgizgenlerinen qalg'an oljalar mınalar edi: 675 000 mayda mal,
33 72 000 iri mal,
34 61 000 eshek,
35 erkekke jaqınlaspag'an 32 000 qız.
36 Sawashqa qatnasqan la'shkerlerge tu'sken jartı pay mınalar: 337 500 mayda mal,
37 bulardan Jaratqan İyege 675 iri mal pay qılıp berildi,
38 36 000 iri mal, bulardan Jaratqan İyege 72 iri mal pay qılıp berildi,
39 30 500 eshek, bulardan Jaratqan İyege 61 eshek pay qılıp berildi,
40 16 000 qız, bulardan Jaratqan İyege 32 qız pay qılıp berildi.
41 Muwsa Jaratqan İyenin' o'zine buyırg'anınday Jaratqan İyege ajıratılg'an paydı ruwxaniy Elazarg'a berdi.
42 Muwsanın' sawashqa qatnasqan la'shkerlerden alıp, izraillılarg'a ajıratıp bergen jartı payı mınalar:
43 337 500 mayda mal,
44 36 000 iri mal,
45 30 500 eshek,
46 16 000 qız.
47 Jaratqan İyenin' o'zine buyırg'anınday, Muwsa izraillılarg'a tu'sken jartı paydan ha'r eliw adamnan ha'm ha'r eliw haywannan birewin alıp, Jaratqan İyenin' Muxaddes shatırının' xızmetine juwapker bolg'an lebiylilerge berdi.
48 Sonnan keyin, orda sa'rka'rdaları – mın'basılar menen ju'zbasılar Muwsanın' aldına barıp:
49 Mırza, qol astımızdag'ı la'shkerlerdi sanap shıqtıq, birde bir la'shkerimizdi joytpappız.
50 Mine, qolg'a kirgizgen altın buyımlarımızdı – qolg'a tag'ılatug'ın shınjır, bilezik, ju'zik, sırg'a ha'm ha'ykellerimizdi alıp keldik. Janımızdın' qunı sıpatında usılardı Jaratqan İyege beremiz, – dedi.
51 Muwsa menen ruwxaniy Elazar olar alıp kelgen barlıq altın buyımlardı aldı.
52 Mın'bası menen ju'zbasılar Jaratqan İyege bergen altınnın' awırlıg'ı barlıg'ı bolıp 16 750 shekel.
53 Sawashqa qatnasqan ha'r bir la'shker bolsa, oljaların o'zlerine qaldırg'an edi.
54 Muwsa menen ruwxaniy Elazar mın'bası ha'm ju'zbasılardın' usıng'an altınların qabıllap aldı. Olardı Jaratqan İyenin' İzrail xalqın eslep turıwı ushın Ushırasıw shatırına alıp keldi.
