Sanlar 32 bob
1 Ruben ha'm Gad urıwlarının' malları ju'da' ko'p edi. Olar Yazer ha'm Gilad jerlerinin' mal sharwashılıg'ı ushın qolaylı jer ekenin ko'rip,
2 Muwsa menen ruwxaniy Elazardın' ha'm ja'miyet basshılarının' aldına barıp, bılay dedi:
3 Atarot, Dibon, Yazer, Nimra, Xeshbon, Elale, Sebam, Nebo ha'm Beon qalaları
4 jaylasqan eldi Jaratqan İye İzrail xalqına jen'ip berdi. Bul eldin' jeri mallar ushın qolaylı eken. Al qulların'ız bolg'an bizlerde mallarımız bar.
5 Eger de senin' kewlin'di tapqan bolsaq, bizlerdi İordan da'ryasının' arg'ı ta'repine o'tkizbey, bul eldi mu'lik etip, bizlerge ber.
6 Muwsa olarg'a bılay dep juwap berdi: – Tuwısqanların'ız sawashqa baratırg'anda, sizler usı jerde qalajaqsız ba?
7 Jaratqan İyenin' berip atırg'an jerine kiriwge izraillılardı ne ushın aynıtıp atırsızlar?
8 Men ata-babaların'ızdı eldi ko'zden o'tkeriwge QadeshBarniyadan jibergenimde, olar da tap usınday qılg'an edi.
9 Olar Eshkol sayına deyin barıp, eldi ko'zden o'tkergennen son', Jaratqan İyenin' o'zlerine beretug'ın jerge barmawı ushın izraillılardı aynıtqan edi.
10 Sol ku'ni Jaratqan İyenin' g'a'zebi qaynap, bılay dep ant ishken edi:
11 «Mısır jerinen shıqqan jigirma ha'm onnan joqarı jastag'ı adamlardın' hesh biri Menin' İbrayımg'a, Isaqqa ha'm Yaqıpqa beremen dep ant ishken jerdi ko'rmeydi. O'ytkeni olar pu'tkil ju'regi menen Mag'an boysınbadı.
12 Keniz tiyresinen bolg'an Efunne ulı Kaleb penen Nun ulı Eshuadan basqa hesh biri ol jerdi ko'rmeydi. Sebebi Kaleb ha'm Eshua pu'tkil ju'regi menen Mag'an sadıq qaldı».
13 Jaratqan İye izraillılarg'a qattı g'a'zeplendi. Jaratqan İyenin' na'zerinde jawızlıq bolg'an islerdi qılg'an sol a'wladtın' pu'tkilley joq bolıp ketkeninshe, olardı qırıq jıl sho'lde alıp ju'rdi.
14 Endi, mine, gu'nakarlar a'wladı bolg'an sizler a'kelerin'izdin' ornın basıp, Jaratqan İyenin' İzrailg'a bolg'an g'a'zebin ku'sheytip atırsızlar.
15 Eger Onnan ju'z bursan'ız, Ol pu'tkil bul xalıqtı ja'ne sho'lge taslap ketedi. Solay etip, sizler usı xalıqtı joq qılajaqsızlar.
16 Biraq Gad ha'm Ruben urıwı Muwsanın' qasına jaqınlap, bılay dedi: – Bizlerdin' usı jerde mallarımız ushın qoralar sog'ıp, balashag'alarımız ushın qalalar qurıwımızg'a ruxsat ber.
17 Al o'zlerimiz bolsa qurallanıp, izraillılar menen birge barıp, olardın' ma'kan qılatug'ın jerin iyelep alg'ang'a deyin, olardın' aldında ju'remiz. Bala-shag'alarımız eldin' turg'ınlarınan qa'wipsiz bolg'an qorg'an qalalarda jasay bersin.
18 Ha'r bir izraillı o'z mu'lkin iyelemegenshe, bizler u'ylerimizge qaytpaymız.
19 İordan da'ryasının' arg'ı jag'asında olar menen birge jer u'lesten almaymız, sebebi bizlerdin' u'lesimiz İordan da'ryasının' shıg'ıs jag'asında boladı.
20 Muwsa olarg'a bılay dep juwap berdi: – Eger sizler aytqanların'ızdı orınlaytug'ın bolsan'ız, Jaratqan İyenin' aldında sawashqa barıw ushın qurallanın'.
21 Jaratqan İye dushpanların quwıp jibermegenshe, ha'mmen'iz Onın' aldında qurallanıp, İordan da'ryasının' arg'ı jag'asına o'tin'.
22 Pu'tkil sol el Jaratqan İye ushın basıp alıng'annan son', sizler Jaratqan İye ha'm İzrail xalqı aldındag'ı minnetin'izden azat bolasızlar. Sonda sizler usı jerge qaytıp keliwin'izge boladı ha'm bul jer Jaratqan İyenin' aldında sizlerdin' mu'lkin'iz bolıp qaladı.
23 Biraq aytqanların'ızdı orınlamasan'ız, Jaratqan İyege qarsı gu'na islegen bolasızlar ha'm bul gu'nan'ız o'z basın'ızg'a jetedi.
24 Balashag'aların'ız ushın qalalar qurıp, malların'ız ushın qoralar sog'ın'. Degen menen, bergen wa'den'izde turın'.
25 Gad ha'm Ruben urıwlarının' adamları Muwsag'a bılay dedi: – Mırzamız, siz ne buyırsan'ız, qulların'ız bolg'an bizler sonı orınlaymız.
26 Bala-shag'amız, mallarımız ha'm haywanlarımız usı jerde, Gilad qalalarında qaladı.
27 Al qulların'ız bolg'an bizler sizin' buyırg'anın'ızday, ha'r birimiz qurallanıp, Jaratqan İyenin' aldında sawashqa tu'siw ushın da'ryanın' arg'ı jag'asına o'temiz.
28 Sonnan keyin, Muwsa Gad ha'm Ruben urıwları haqqında ruwxaniy Elazarg'a, Nun ulı Eshuag'a ha'm İzrail urıwlarının' a'wlad basshılarına buyrıq berip,
29 bılay dedi: – Eger Gad ha'm Ruben urıwlarınan qurallang'an adamlar Jaratqan İyenin' aldında sizler menen birge İordan da'ryasının' arg'ı jag'asına o'tse ha'm sizler sol eldi qolg'a kirgizsen'iz, onda Gilad u'lkesin mu'lik qılıp, olarg'a berin'.
30 Biraq, eger de olar qurallanıp, sizler menen birge da'ryanın' arg'ı jag'asına o'tpese, onda olar Qanan u'lkesinen sizler menen birge u'les jer aladı.
31 Sonda Gad ha'm Ruben urıwlarının' adamları: – Jaratqan İye qulların'ız bolg'an bizlerge qanday buyrıq bergen bolsa, sonın' ha'mmesin orınlaymız.
32 Bizler qurallanıp, Jaratqan İyenin' aldında Qanan u'lkesine baramız. Al bizlerdin' alatug'ın jer u'lesimiz İordan da'ryasının' shıg'ıs jag'asında bolsın, – dedi.
33 Solay etip, Muwsa Gad penen Ruben urıwlarına ha'm Yusup ulı Menashshe urıwının' jartısına amor xalqının' patshası Sixonnın' eli menen Bashan patshası Ogtın' elin ha'm olardın' qalaları menen qala do'geregindegi jerlerdi berdi.
34 Gad urıwı Dibon, Atarot, Aroer,
35 Atrot-Shofan, Yazer, İogboha,
36 Beyt-Nimra ha'm Beyt-Haran degen qorg'anlı qalaların jan'adan qurdı, malları ushın qoralar soqtı.
37 Ruben urıwı Xeshbon, Elale, Kiryatayım,
38 atları o'zgertilgen eki qala Nebo menen Baal-Meon ha'm Sibma qalaların qayta qurdı. Olar tiklegen qalalarına jan'adan at qoydı.
39 Menashshenin' ulı Maxirdin' a'wladları Giladqa bardı ha'm onı iyelep alıp, ol jerde jasap atırg'an amor xalqın quwıp shıg'ardı.
40 Solay etip, Muwsa Giladtı Menashshe ulı Maxirdin' a'wladına berdi. Olar sol jerge qonıs bastı.
41 Menashshenin' ulı Yair bir neshe qalalarg'a hu'jim etip, olardı iyelep aldı. Sol jerlerdi Yairge tiyisli qalalar dep atadı.
42 Nobax ta Kenat qalasın ha'm onın' do'geregindegi awıllardı iyelep alıp, ol jerdi o'zinin' atı menen Nobax dep atadı.
