Sanlar 34 bob
1 Jaratqan İye Muwsag'a bılay dedi:
2 – İzraillılarg'a bılay dep buyır: «Sizlerge mu'lik etip beriletug'ın Qanan eline kirgenin'izde, onın' shegaraları mınaday boladı:
3 Sizlerdin' qubla ta'reptegi shegaran'ız Zin sho'linen Edom shegarası boylap sozıladı. Bul qubla shegaran'ız shıg'ıstag'ı O'li ten'izdin' shetinen baslanadı.
4 Onnan keyin Aqrabbim biyikliginin' qublasınan Zin arqalı o'tip, Qadesh-Barniyanın' qublasına deyin sozıladı. Ol jerden shegara Xasar-Addar arqalı o'tip, Asmong'a deyin baradı.
5 Keyin sol jerden burılıp, Mısır shegarasındag'ı sayg'a deyin sozılıp, Jer Orta ten'izine barıp tawısıladı.
6 Batıs shegaran'ız Jer Orta ten'izinin' jag'ası boladı. Batıstag'ı shegaran'ız usıdan ibarat.
7 Arqa shegaran'ız Jer Orta ten'izinen Hor tawına deyin sozıladı.
8 Hor tawınan Lebo-Xamatqa deyin, keyin Sedadqa deyin barıp,
9 Zifrong'a deyin sozıladı ha'm Xasar-Enanda tawısıladı. Arqadag'ı shegaran'ız usıdan ibarat.
10 Shıg'ıs shegaran'ız Xasar-Enannan baslanıp, Shefamg'a deyin sozıladı.
11 Keyin shegara Shefamnan Ayınnın' shıg'ıs ta'repindegi Riblag'a deyin baradı. Ol jerden Kinneret ko'linin' shıg'ıs jag'ındag'ı janbawırlarg'a deyin sozıladı.
12 Sonnan keyin, shegara ol jerden İordan da'ryası boyınsha sozılıp, O'li ten'izge barıp toqtaydı. Ha'r ta'reptegi elin'izdin' shegaraları usı boladı».
13 Sonnan keyin, Muwsa izraillılarg'a: – Mine, mu'lik qılıp, shek boyınsha bo'lisip alatug'ın el usı boladı. Jaratqan İyenin' buyrıg'ı boyınsha bul el tog'ız urıw menen bir urıwdın' yarımına bo'listirip beriledi.
14 O'ytkeni Ruben ha'm Gad urıwları menen Menashshe urıwının' yarımı o'zlerine tiyisli jer u'lesin a'wladları boyınsha bo'lisip aldı.
15 Bul eki urıw menen yarım urıw Erixonın' qarsısındag'ı İordan da'ryasının' shıg'ıs ta'repinen o'z mu'liklerin aldı, – dedi.
16 Jaratqan İye Muwsag'a bılay dedi:
17 – Ruwxaniy Elazar ha'm Nun ulı Eshua İzrail xalqına eldi bo'listirip bersin.
18 Eldi bo'listiriw ushın ha'r bir urıwdan bir jetekshiden alıp, xızmetke qoyın'.
19 Sol adamlardın' atları mınalar: Yahuda urıwınan Efunne ulı Kaleb,
20 Shimon urıwınan Ammihud ulı Samuel,
21 Benyamin urıwınan Kislon ulı Elidad,
22 Dan urıwınan İogliy ulı basshı Bukkiy,
23 Yusup ulı Menashshe urıwınan Efod ulı basshı Xanniel,
24 Efrayım urıwınan Shiftan ulı basshı Kemuel,
25 Zebulon urıwınan Parnax ulı basshı Elisafan,
26 İssaxar urıwınan Azzan ulı basshı Paltiel,
27 Asher urıwınan Shelomiy ulı basshı Axihud,
28 Naftaliy urıwınan Ammihud ulı basshı Pedael.
29 Qanan jerin İzrail xalqına mu'lik etip bo'listirip berin', dep Jaratqan İye usı adamlarg'a buyırg'an edi.
