Sanlar 35 bob

Lebiylilerge berilgen qalalar(1-5),Panalaytug'ın qalalar(6-34).

¹ Jaratqan İye oypatlıqtın' Moabqa tiyisli bo'leginde, Erixonın' qarsısındag'ı İordannın' boyında Muwsag'a bılay dedi:

² – İzraillılarg'a buyır, olar alatug'ın u'les jerinde lebiylilerdin' jasawı ushın qalalar ajıratıp bersin. Sonın' menen birge, qalalardın' a'tirapındag'ı jaylawlardı da bersin.

³ Solay etip, lebiylilerdin' jasawı ushın qalaları ha'm olardın' pada, su'riwleri menen basqa da haywanları ushın jaylawları bolsın.

⁴ Lebiylilerge beriletug'ın qalalardın' aylana a'tirapındag'ı jaylawlar qala qorg'anınan baslap mın' shıg'anaq uzınlıqqa sozılg'an bolsın.

⁵ Qala ortada jaylasqan bolıp, onın' sırtınan baslap, shıg'ısqa, qublag'a, batısqa ha'm arqag'a qaray eki mın' shıg'anaqtan o'lshep shıg'ın'. Bular qalalar ushın jaylawlar boladı.

⁶ – Lebiylilerge beriletug'ın qalalardan altawı panalaytug'ın qala bolsın. Solay etip, adam o'ltiriwshinin' sol jerge qashıwına jol qoyasızlar. Usı altı qaladan tısqarı lebiylilerge qırıq eki qala berilsin.

⁷ Barlıg'ı bolıp, lebiylilerge jaylawları menen birge qırıq segiz qala beresizler.

⁸ İzraillılardın' u'les jerinen lebiylilerge beriletug'ın qalalar ha'r bir urıwg'a tu'sken payına ılayıqlı bolsın. Ko'p alg'an urıw ko'p, az alg'an urıw az sandag'ı qala bersin.

⁹ Jaratqan İye Muwsa menen so'ylesiwin dawam etip, bılay dedi:

¹⁰ – İzraillılarg'a bılay dep ayt: «İordan da'ryasınan o'tip, Qanan eline kirgenin'izden keyin,

¹¹ panalaytug'ın qalalardı tan'lap alın'. Solay etip, abaysızda adam o'ltirip qoyg'an adam sol panalaytug'ın qalag'a qashıp kete alatug'ın bolsın.

¹² Bul qalalar adam o'ltirip qoyg'an adamnın' ja'miyet aldında hu'kim etilmesinen aldın o'ltirilmewi ushın, onın' o'sh alıwshı a'mengerden qashıp, panalaytug'ın jeri boladı.

¹³ Sizler ajıratatug'ın altı qala panalaytug'ın qala bolsın.

¹⁴ Panalaytug'ın qalalardın' u'shewi İordan da'ryasının' shıg'ıs ta'repinen, qalg'an u'shewi Qanan jerinen tan'lap alınsın.

¹⁵ Bul altı qala izraillılar ha'm aran'ızda jasap atırg'an kelgindiler menen jat jerli adamlar ushın panalaw qalası bolsın. Solay etip, abaysızda adam o'ltirip qoyg'an adam sol jerge qashıp barsın.

¹⁶ Eger kim de kim temir qural menen bir adamdı urıp o'ltirip qoysa, onda urg'an adam qanxor sanaladı ha'm ol so'zsiz o'ltirilsin.

¹⁷ Eger tas penen birewdi urıp, onı o'ltirse, o'ltirgen adam qanxor sanaladı ha'm ol so'zsiz o'ltirilsin.

¹⁸ Yamasa ol ag'ash buyım menen birewdi urıp, onı o'ltirse, onda o'ltirgen adam qanxor sanaladı ha'm ol so'zsiz o'ltirilsin.

¹⁹ O'lgen adamnın' o'sh alıwshı adamı qanxordı ushıratıp qalıwdan-aq, onı o'ltirsin.

²⁰ Sonday-aq eger bir adam birewdi jek ko'rgenlikten iyterip jiberip yamasa bilqastan og'an qaray bir na'rseni ılaqtırıp, ol adamdı o'ltirse,

²¹ yamasa o'shegisip, onı mushı menen urıp o'ltirse, urg'an adam so'zsiz o'ltirilsin. O'ytkeni ol qanxor. O'lgen adamnın' o'shin alıwshı adam qanxordı ushıratıp qalıwdan-aq, onı o'ltirsin.

²² Eger kim de kim bir adamdı o'shegisip emes, al abaysızdan iyterip jiberse, yamasa og'an qaray bilmesten bir na'rseni ılaqtırıp jiberse,

²³ yamasa onı ko'rmey qalıp, u'stine bir tastı tu'sirip alıp, onı o'ltirip qoysa, biraq o'ltirip qoyg'an adam og'an dushpan bolmay, og'an jawızlıq oylamag'an bolsa,

²⁴ ja'miyet adam o'ltirip qoyg'an menen o'sh alıwshı a'mengerdin' arasında usı qag'ıydalar boyınsha qarar shıg'arsın.

²⁵ Ja'miyet adam o'ltirip qoyg'an adamdı o'sh alıwshı a'mengerdin' qolınan qorg'awı kerek ha'm onı qashıp kelgen panalaytug'ın qalag'a qaytadan qaytarıp jibersin. Ol adam muxaddes may menen maylang'an bas ruwxaniydin' o'limine deyin sol jerde jasap qalsın.

²⁶ Biraq adam o'ltiriwshi qashıp barg'an panalaytug'ın qalanın' shegarasınan shıqsa,

²⁷ o'sh alıwshı a'menger de onı panalaytug'ın qalanın' shegarasının' sırtında ko'rip qalsa, o'sh alıwshı a'menger adam o'ltiriwshini o'ltirse, ol ayıplı sanalmaydı.

²⁸ O'ytkeni adam o'ltiriwshi bas ruwxaniydin' o'limine deyin panalaytug'ın qala ishinde bolıwı kerek. Tek g'ana bas ruwxaniydin' o'liminen son' o'z jerine qaytıwına boladı.

²⁹ Qay jerde jasasan'ız da bular a'wladlar dawamında sizler ushın qag'ıyda bolsın.

³⁰ Adam o'ltiriwshi gu'walardın' aytqan so'zleri boyınsha o'lim jazasına tartılsın. Tek bir adamnın' g'ana gu'walıg'ı menen hesh kim o'ltirilmesin.

³¹ O'limge ılayıqlı qanxordın' janın qutqarıw ushın qun alman', ol so'zsiz o'ltirilsin.

³² Panalaytug'ın qalag'a qashqan adam qun to'lep, bas ruwxaniydin' o'liminen aldın o'z jerine qaytıp barıp jasawına ruxsat bermen'.

³³ O'zlerin'iz jasap atırg'an eldi haramlaman'. Qan to'giwshilik eldi haramlaydı. İshinde qan to'gilgen jer tek g'ana qan to'kken adamnın' qanı menen pa'klenedi.

³⁴ O'zlerin'iz ishinde jasap atırg'an ha'm Men ishinde bolıp atırg'an jerdi haramlaman'. Sebebi Men izraillılardın' arasında jasaytug'ın Jaratqan İyemen».