Sanlar 36 bob
1 Bir ku'ni Yusup ulı Menashshe urıwınan Maxir ulı Gilad a'wladınan bolg'an basshılar Muwsanın' ha'm İzraildın' tiyre basshılarının' aldına kelip, olarg'a bılay dedi:
2 – Jaratqan İye eldi mu'lik etip, shek boyınsha izraillılar arasında u'lestiriw ushın mırzamız Muwsag'a buyrıq berdi. Tuwısqanımız Selofexadtın' mu'lki qızlarına beriliwi ushın da buyrıq berilgen edi.
3 Degen menen, eger Selofexadtın' qızları basqa bir İzrail urıwına tiyisli erkeklerge turmısqa shıqsa, olardın' mu'likleri ku'yewleri tiyisli bolg'an urıwdın' mu'lkine o'tip ketedi. Sonda urıwımız shek boyınsha alg'an jer u'lesinin' bir bo'leginen ayırılıp qaladı.
4 Ha'tteki, izraillılardın' Qutlı jılı belgilengende de, qızlardın' mu'lki urıwımızg'a qaytarılmay, ku'yewleri tiyisli bolg'an urıwda qalıp ketedi. Solay etip, olardın' mu'likleri babalarımızdın' urıwına tu'sken mu'likten alınıp, bir bo'lek jerimizden ayırılıp qalamız.
5 Muwsa Jaratqan İyenin' so'zi boyınsha izraillılarg'a bılay dep buyrıq berdi: – Yusup a'wladınan bolg'an adamlardın' aytqanları durıs.
6 Jaratqan İye Selofexadtın' qızları haqqında mınaday buyrıq beredi: «Selofexadtın' qızları qa'legen jigitke turmısqa shıg'ıwına boladı, biraq bul jigitler a'kesinin' urıwınan ha'm tiyresinen bolıwı sha'rt.
7 İzrail xalqının' mu'lik etip alg'an jeri bir urıwdan ekinshi urıwg'a o'tip ketpesin. Ha'r bir izraillı o'z urıwının' mu'lkin saqlap qalsın.
8 İzraildag'ı ha'r bir urıwdag'ı jer mu'lkine miyrasxor bolg'an qız a'kesi tiyisli bolg'an urıw ha'm tiyresindegi jigitke turmısqa shıqsın. Solay etip, ha'r bir izraillı ata-babalarının' mu'lkine o'zleri iyelik etip qalsın.
9 Sonda mu'lik bir urıwdan ekinshi urıwg'a o'tip ketpeydi. Ha'r bir İzrail urıwı o'zlerine alg'an mu'likti saqlap qalsın».
10 Selofexadtın' qızları Jaratqan İyenin' Muwsag'a buyırg'anınday isledi.
11 Selofexadtın' qızları Maxla, Tirsa, Xogla, Milka ha'm Noa o'z atalas ag'alarına turmısqa shıqtı.
12 Solay etip, olar Yusup ulı Menashshe urpag'ınan bolg'an jigitlerge turmısqa shıqtı ha'm olardın' mu'likleri a'keleri tiyisli bolg'an tiyre ha'm urıwda qaldı.
13 Jaratqan İyenin' Muwsa arqalı oypatlıqtın' Moabqa tiyisli bo'leginde, Erixo qalasının' qarsısındag'ı İordan da'ryasının' boyında izraillılarg'a bergen buyrıq ha'm nızamları usılardan ibarat edi.
