Sanlar 5 bob
1 Jaratqan İye Muwsag'a bılay dedi:
2 – İzrail xalqına buyır. Olar teri keselligine jolıqqan, jınısıy ag'zasınan irin' yaki qan bo'linip shıqqan yamasa o'lige bir jerin tiygizip haramlang'an ha'r bir adamdı ordadan sırtqa shıg'arıp jibersin.
3 Erkek bolsın, hayal bolsın arasında Men jasap atırg'an ordanı haramlamawı ushın, olardı ordanın' sırtına shıg'arıp jibersin.
4 İzrail xalqı aytılg'anlardı orınlap, Jaratqan İyenin' Muwsag'a buyırg'anınday olardı ordanın' sırtına shıg'arıp jiberdi.
5 Jaratqan İye Muwsag'a bılay dedi:
6 – İzrail xalqına bılay dep ayt: «Eger bir erkek yamasa hayal birewge qarsı qanday da bir gu'na islep, usı arqalı Jaratqan İyege qıyanet etse, ol adam ayıplı sanaladı.
7 Bunday adam islegen gu'nasın ashıq moyınlasın. Ol ja'bir shekken adamg'a keltirgen zıyanı ushın to'lem to'lesin, ja'ne de, onın' u'stine besten bir bo'legin de qosıp bersin.
8 Eger de ol adam o'lse ha'm og'an beriletug'ın to'lemdi alatug'ın birde bir jaqın ag'ayini bolmasa, onda sol to'lem Jaratqan İyege tiyisli bolıp, bunı ruwxaniyge bersin. Ayıplı adam usı to'lem menen birge gu'nadan tazalanıw ushın qurbanlıqqa bir qoshqar alıp kelsin.
9 İzrail xalqının' ruwxaniyge alıp kelgen muxaddes sadaqalarının' barlıg'ı ruwxaniyge tiyisli bolsın.
10 Ruwxaniy qabıl qılg'an ha'r bir sadaqa ruwxaniydin' o'zine tiyisli bolsın».
11 Jaratqan İye Muwsag'a bılay dedi:
12 – İzrail xalqına bılay dep ayt: «Eger bir adamnın' hayalı joldan azg'ırılıp, ku'yewine biyopalıq qılsa,
13 basqa bir adam menen jatıp, o'zin haramlasa, bunı ku'yewinen jasırsa ha'm bug'an gu'wa adam bolmag'anlıg'ı sebepli hayaldın' islegeni jasırın bolsa,
14 bug'an qaramastan, ku'yewi hayalın qızg'anıp, og'an qarsı ju'reginde gu'man payda bolıwı mu'mkin. Yamasa hayalı biyopalıq qılmasa da, ku'yewi onı qızg'anıp, ju'reginde og'an qarsı gu'man payda bolıwı mu'mkin.
15 Usınday jag'daylarda ol adam hayalın ruwxaniyge alıp kelsin. Hayalı ushın onnan bir efa* arpa unınan sadaqa alıp kelsin. Unnın' u'stine za'ytu'n mayın yamasa xosh iyisli shayır qospasın. Sebebi bul – ayıptı esletiw ushın beriletug'ın qızg'anıw sadaqası.
16 Ruwxaniy hayaldı alıp kelip, Jaratqan İyenin' aldına turg'ızsın.
17 Keyin ılaydan islengen ıdısqa muxaddes suw quysın ha'm Muxaddes shatırdın' ishindegi jerden topıraq alıp, suwg'a salsın.
18 Ruwxaniy sol hayaldı Jaratqan İyenin' aldına turg'ızg'annan son', onın' shashın jaysın, esletiw sadaqasın, yag'nıy qızg'anıw sadaqasın onın' qolına uslatsın. Ruwxaniydin' o'zi na'let keltiretug'ın ashshı suwdı qolına uslap tursın.
19 Sonnan son', ol hayalg'a na'letti tastıyıqlatıp, og'an bılay dep aytsın: „Eger sen basqa bir erkek penen jatpag'an bolsan', ku'yewin' bola tura joldan azg'ırılıp, o'zin'di haramlamag'an bolsan', onda na'let alıp keletug'ın mına suw sag'an zıyanın tiygizbesin.
20 Biraq ku'yewin' bola tura joldan azg'ırılıp, basqa bir erkek penen jatıp, o'zin'di haramlag'an bolsan',
21 onda adamlar birewdi na'letlegende, Jaratqan İye senin' atın'dı na'letke qosıp aytatug'ın qılsın ha'm qursag'ın' zıyanlanıp, biyperzent qılsın.
22 Na'let keltiretug'ın bul suw ishin'e barg'anda, qursag'ın' zıyanlanıp, bala tuwa almaytug'ın qılsın“. Sonda hayal: „Awmiyin, awmiyin“, – dep aytsın.
23 Ruwxaniy bul na'letlerdi bir bo'lek terige jazıp, onı ashshı suwg'a shaysın.
24 Na'let keltiretug'ın suwdı hayalg'a ishkizsin. Suw hayaldın' ishine kirgennen son', og'an azap bersin.
25 Ruwxaniy sol hayaldın' qolınan qızg'anıw sadaqasın alıp, Jaratqan İyenin' aldında joqarı ko'terip usıng'annan son', sadaqanı qurbanlıq orıng'a alıp kelsin.
26 Ruwxaniy g'a'lle sadaqasınan bir uwıs alıp, onı tolıq sadaqanın' belgisi retinde qurbanlıq orında tu'tetip jandırsın. Keyin hayalg'a suwdı ishkizsin.
27 ger hayal ku'yewine biyopalıq qılıp, o'zin haramlag'an bolsa, na'let alıp keletug'ın suwdı ishkende, og'an azap beredi. Suw onın' qarnın isirip, tuwmaytug'ın qılıp taslaydı ha'm ol xalqı arasında na'letiy bolıp qaladı.
28 Biraq hayal o'zin haramlamag'an ha'm pa'k bolsa, ol o'zine tag'ılg'an ayıptan qutıladı ha'm bala ko'teretug'ın boladı.
29 Qızg'anshaqlıq haqqında qag'ıydalar usılardan ibarat. Eger bir hayal ku'yewine biyopalıq qılıp, o'zin haramlasa,
30 yamasa ku'yewinde hayalına degen qızg'anısh ha'm ju'reginde og'an qarsı gu'man payda bolsa, onda ruwxaniy hayaldı Jaratqan İyenin' aldına turg'ızıp, usı nızam boyınsha is tutsın.
31 Sonda ku'yewi ha'r qanday ayıptan qutıladı, hayal bolsa, islegen ayıbının' jazasın tartadı».
