Sanlar 6 bob
1 Jaratqan İye Muwsag'a bılay dedi:
2 – İzrail xalqına bılay dep ayt: «Eger erkek yamasa hayal ayrıqsha wa'de berip, o'zin na'zir sıpatında Jaratqan İyege bag'ıshlasa,
3 ol sharaptan ha'm ha'r qanday o'tkir ishimlikten o'zin tıysın. Ju'zimnen yamasa basqa o'tkir ishimliklerden islengen sirke suwınan ishpesin. Ju'zimnen tayarlang'an shireli suwdan ishpesin. Ju'zim de, kishmish te jemesin.
4 Ol Jaratqan İyege bag'ıshlang'an da'wirinde ju'zimnen tayarlang'an hesh na'rse jemesin, ha'tteki, ju'zimnin' da'nesinen qabıg'ına deyin awzına ulıwma almasın.
5 Na'zir sıpatında bag'ıshlang'an da'wirinde basına hesh qanday pa'ki tiymesin. Ol o'zin Jaratqan İyege arnag'an da'wirinin' aqırına deyin muxaddes bolsın, shashın o'sirsin.
6 Sol ku'nler dawamında o'lige jaqınlamasın.
7 Ha'tteki, onın' anası, a'kesi, ag'a-inisi yamasa a'japaqarındası qaytıs bolsa da, olar sebepli o'zin haramlamasın. O'ytkeni onın' basındag'ı shashı – o'zin na'zir sıpatında Qudayg'a bag'ıshlag'anının' belgisi.
8 Ol na'zir bolg'an da'wirinde Jaratqan İyege bag'ıshlang'an boladı.
9 Eger onın' janında tosattan birew qaytıs bolıp qalsa, onda ol adamnın' bag'ıshlang'an shashı haramlanadı. Sol sebepli na'zir bolg'an adam o'zin pa'klew ushın jeti ku'nnen keyin shashın aldırıp taslasın.
10 Segizinshi ku'ni ol eki qumırı yamasa eki jas kepter a'kelip, Ushırasıw shatırının' aldında ruwxaniyge bersin.
11 Ruwxaniy bulardın' birewin gu'na qurbanlıg'ı etip, ekinshisin jandırılatug'ın qurbanlıq etip bersin. Solay etip, o'li sebepli ayıplı bolg'an sol adam ushın pa'klew ra'simi o'tkerilsin. Sol ku'ni ol o'z basın qaytadan bag'ıshlasın.
12 Ol haramlang'anlıg'ı sebepli onın' aldıng'ı bag'ıshlang'an ku'nleri esapqa alınbaydı. Sonlıqtan, ayıp qurbanlıg'ı ushın bir jasar erkek toqlı usınıp, Jaratqan İyege o'zin qaytadan bag'ıshlawı tiyis.
13 Na'zir bolg'an adamg'a arnalg'an qag'ıyda mınalardan ibarat: onın' bag'ıshlanıw ku'nleri tamam bolg'anda, ol Ushırasıw shatırının' aldına alıp kelinsin.
14 Usı jerde ol Jaratqan İyege mına qurbanlıqlardı usınsın: jandırılatug'ın qurbanlıq ushın bir jasar minsiz bir erkek toqlı, gu'na qurbanlıg'ı ushın bir jasar minsiz bir qoy, tatıwlıq qurbanlıg'ı ushın minsiz bir qoshqar,
15 g'a'lle sadaqası ha'm ishimlik sadaqaları menen birge bir sebet ashıtqısız nanlar – sapalı unnan za'ytu'n mayı qosılg'an sho'rekler, u'stine za'ytu'n mayı jag'ılg'an pa'tirler.
16 Ruwxaniy bulardı gu'na qurbanlıg'ı ha'm jandırılatug'ın qurbanlıq ushın Jaratqan İyege usınsın.
17 Keyin qoshqardı g'a'lle ha'm ishimlik sadaqaları menen birge Jaratqan İyege tatıwlıq qurbanlıg'ı etip usınsın. Sonday-aq, sebettegi ashıtqısız nanlardı da usınsın.
18 Sonnan son', na'zir bolg'an adam Ushırasıw shatırının' aldında bag'ıshlang'an shashın aldırıp, shashın tatıwlıq qurbanlıg'ı jandırılıp atırg'an otqa jag'ıp jibersin.
19 Na'zir bolg'an adam shashın aldırg'annan son', ruwxaniy qoshqardın' qaynatılg'an aldıng'ı bir sanın, sebetten ashıtqısız bir nandı ha'm pa'tirdi onın' qolına uslatsın.
20 Keyin ruwxaniy bulardı Jaratqan İyege bag'ıshlaw ushın joqarı ko'terip usınsın. Bular joqarı ko'terip usınılg'an to's ha'm artqı san menen birge muxaddes bolıp, ruwxaniydin' payı sanaladı. Sonnan keyin na'zir bolg'an adam sharap ishiwine boladı.
21 Wa'de berip, na'zir sıpatında bag'ıshlang'an adam ushın qag'ıydalar usılardan ibarat. Ol usı qag'ıydalarg'a muwapıq Jaratqan İyege qurbanlıqların bersin. Sonın' menen birge, qolınan kelgeninshe onnan da ko'biregin beriwine boladı. Ol wa'de bergenindey etip ha'm bag'ıshlanıw qag'ıydalarına muwapıq tu'rde anıq orınlaw kerek».
22 Jaratqan İye Muwsag'a bılay dedi:
23 – Xaron menen onın' ullarına bılay dep ayt: «İzrail xalqına aq pa'tiya bergenin'izde, olarg'a bılay dep aytın':
24 „Jaratqan İye sizlerdi jarılqasın, qorg'asın!
25 Jaratqan İye sizlerge O'z ju'zinin' nurın shashsın, rehimli bolsın!
26 Jaratqan İye sizlerge O'z na'zerin salsın ha'm tınıshlıg'ın bersin!“
27 Solay etip, ruwxaniyler atımdı aytıp, İzrail xalqına aq pa'tiya bersin. Sonda Men de olardı jarılqayman».
