Sanlar 9 bob
1 İzraillılar Mısırdan shıqqannan keyingi ekinshi jıldın' birinshi ayında Jaratqan İye Sinay sho'linde Muwsag'a bılay dedi:
2 – İzraillılar Qutqarılıw bayramın belgilengen waqıtta bayramlasın.
3 Barlıq nızam ha'm qag'ıydalarg'a a'mel qılıp, qurbanlıqtı belgilengen waqıtta, usı aydın' on to'rtinshi ku'ni keshte shalsın.
4 Solay etip, Muwsa izraillılarg'a Qutqarılıw bayramın belgilewdi buyırdı.
5 Olar Sinay sho'linde birinshi aydın' on to'rtinshi ku'ni keshte Qutqarılıw bayramın belgiledi. Olar ha'r bir na'rseni Jaratqan İyenin' Muwsag'a buyırg'anınday etip orınladı.
6 Al o'lige bir jerin tiygizip, haram sanalg'an bazı adamlar sol ku'ni Qutqarılıw bayramında qatnasa almadı. Sol ku'ni olar Muwsa menen Xaronnın' aldına kelip,
7 Muwsag'a bılay dedi: – O'lige jantasqanımız ushın haram sanalamız. Biraq belgilengen waqıtta basqa izraillılar menen birge Jaratqan İyege arnalg'an qurbanlıqtı ne ushın usına almaymız?
8 Muwsa: – Ku'tin', Jaratqan İyenin' sizler tuwralı mag'an ne buyıratug'ının tın'lap ko'reyin, – dedi.
9 Jaratqan İye Muwsag'a bılay dedi:
10 – İzraillılarg'a bılay dep ayt: «Aran'ızda birin'iz yamasa a'wladın'ızdan birewi o'lige bir jerin tiygizgeni ushın haram sanalsa yamasa birewi uzaq saparg'a ketse, onday adam Jaratqan İyege arnalg'an Qutqarılıw bayramın nıshanlawına boladı.
11 Bunday adamlar ekinshi aydın' on to'rtinshi ku'ni keshte Qutqarılıw qurbanlıg'ın shalıp, onı ashıtqısız nan ha'm ashshı sho'pler menen jesin.
12 Tan'g'a deyin qurbanlıqtın' go'shinen bir tu'yir de qalmasın, su'yekleri sındırılmasın. Qutqarılıw bayramın barlıq qag'ıydalar boyınsha belgilewin'iz tiyis.
13 Biraq pa'k sanalg'an ha'm uzaq saparda bolmag'an adam Qutqarılıw bayramına qatnasıwdan bas tartsa, ol belgilengen waqıtta Jaratqan İyege arnap qurbanlıq bermegeni ushın xalqının' arasınan joq qılınsın. Solay etip, ol o'z gu'nasının' jazasın tartadı.
14 Aran'ızda jasap atırg'an kelgindi bir adam Jaratqan İyege arnalg'an Qutqarılıw bayramına qatnasıwdı qa'lese, ol bayramnın' nızam ha'm qag'ıydalarına a'mel qılsın. Jergilikli bolsın, kelgindi bolsın, ha'mme ushın usı nızamdı qollanıwın'ız tiyis».
15 Muxaddes shatır, yag'nıy buyrıqlar qoyılg'an shatır tiklengen ku'ni onın' u'stin bult qapladı. Muxaddes shatırdı qaplag'an bult keshten azang'a deyin ot sıyaqlı bolıp turatug'ın edi.
16 Bul awhal ha'r ku'ni dawam etti. Muxaddes shatırdı qaplag'an bult keshte ot sıyaqlı bolıp turatug'ın edi.
17 Bult shatırdan joqarı ko'terilgende, İzrail xalqı jolg'a shıg'atug'ın edi. Bult qay jerde toqtasa, olar sol jerde toqtaytug'ın edi.
18 İzrail xalqı Jaratqan İyenin' buyrıg'ı boyınsha jolg'a shıg'ıp, Onın' buyrıg'ı boyınsha toqtap, shatırların tigetug'ın edi. Bult Muxaddes shatırdı qaplap turg'an waqıtta, olar da sol jerde turatug'ın edi.
19 Bult Muxaddes shatırdı uzaq waqıt qaplap turg'anda, İzrail xalqı Jaratqan İyenin' buyrıg'ına a'mel qılıp, jolg'a shıqpaytug'ın edi.
20 Bazıda bult Muxaddes shatırdı azg'antay ku'n qaplap turatug'ın edi. Xalıq ta Jaratqan İyenin' buyrıg'ı boyınsha, ya qonıs basqan jerde qalatug'ın, yamasa ko'shetug'ın edi.
21 Bazı waqıtları bult tek g'ana keshten azang'a deyin turıp, azanda Muxaddes shatırdan ko'teriletug'ın edi. Sonda xalıq jolg'a shıg'atug'ın edi. Tu'nde bolsın, ku'ndiz bolsın, bult shatırdan ko'teriliwden, xalıq jolg'a shıg'atug'ın edi.
22 Bult Muxaddes shatırdı eki ku'n, bir ay yamasa uzaq waqıt qaplap tursa da, izraillılar qonıs basqan jerinde qalıp, jolg'a shıqpaytug'ın edi. Biraq bult joqarı ko'teriliwden, olar jolg'a shıg'atug'ın edi.
23 Olar Jaratqan İyenin' buyrıg'ı boyınsha qonıs basatug'ın yamasa jolg'a shıg'atug'ın edi. Usılay etip, olar Jaratqan İyenin' Muwsa arqalı bergen buyrıg'ına a'mel qıldı.
