Matta 2 bob
1 İysa Yahudiyanın' Beytlehem qalasında, patsha Hirodtın' zamanında tuwılg'annan son', Erusalim qalasına ku'nshıg'ıstan juldız izertlewshiler kelip:
2 – Yahudiylerdin' jan'a tuwılg'an Patshası qayaqta eken? O'ytkeni bizler ku'nshıg'ısta Onın' juldızın ko'rip, Og'an tabınıwg'a keldik, – dep soradı.
3 Bunı esitken patsha Hirod ha'm onın' menen birge pu'tkil Erusalim qalası tınıshsızlanıp qaldı.
4 Hirod xalıqtın' barlıq bas ruwxaniylerin ha'm diniy mug'allimlerin jıynap alıp, olardan Masixtın' qay jerde tuwılıwı tiyis ekenin sorastırdı.
5 Olar bılay dedi: – Yahudiyadag'ı Beytlehemde. Sebebi payg'ambar arqalı mınaday so'zler jazılg'an:
6 «Ha'y, Yahudiya jerindegi Beytlehem! Yahudiyanın' baslı qalalarınansen hesh kem emessen'! O'ytkeni Menin' xalqım İzraildı bag'atug'ın Ko'sem Sennen shıg'adı».
7 Sonda Hirod juldız izertlewshilerdi jasırın shaqırtıp, olardan juldızdın' shıqqan waqtın sorastırıp bilip aldı.
8 Olardı Beytlehemge jiberip: – Barıp, Na'reste haqqında jaqsılap bilip alın'lar. Onı tapqannan keyin, mag'an xabar berin'ler, men de barıp Og'an tabınayın, – dedi.
9 Olar patshanın' so'zin esitip bolıp, ju'rip ketti. Sonda o'zleri ku'nshıg'ısta ko'rgen juldız olardın' aldında ju'rip, jol ko'rsetti ha'm Na'reste bolg'an jerdin' u'stinde toqtadı.
10 uldızdı ko'rgende, olar qattı quwandı.
11 U'yge kirip, Na'resteni ha'm Onın' anası Ma'riyamdı ko'rdi de, Na'restenin' ayag'ına jıg'ılıp, Og'an tabındı. O'zlerinin' g'a'ziyne ıdısların ashıp, Og'an altın, ladan ha'm mirra* degen xosh iyisli zatlardı sıyg'a berdi.
12 Olar Hirodqa qaytıp barmaw haqqında tu'slerinde eskertilgenlikten, basqa bir jol menen o'z ellerine qaytıp ketti.
13 Juldız izertlewshiler ketkennen keyin, Qudaydın' bir perishtesi Yusuptın' tu'sine enip: – Ornın'nan tur da, Na'reste menen anasın alıp, Mısırg'a* qash! Sag'an o'zim xabar bergenimshe, sol jerde bol! Sebebi Hirod Na'resteni o'ltiriw ushın izlemekte, – dedi.
14 Yusup turdı da, Na'reste menen anasın alıp, tu'n ishinde Mısırg'a qashıp ketti.
15 Hirodtın' o'limine shekem sol jerde boldı. Solay etip, Qudaydın': «Ulımdı Mısırdan shaqırıp aldım», – dep payg'ambar arqalı aldın ala aytqan so'zleri orınlandı.
16 Al Hirod juldız izertlewshilerdin' aldap ketkenin tu'sinip, qattı ashıwlandı. Juldız izertlewshilerden waqıttı bilip alg'an ol Beytlehemdegi ha'm onın' do'geregindegi eki jasar ha'm onnan da kishi ul balalardın' ha'mmesin o'ltiriwdi buyırdı.
17 Solay etip, Eremiya payg'ambar arqalı aytılg'an mına so'zler orınlandı:
18 «Ramada bir dawıs esitiledi, Qattı zarlap jılag'an. Balaların joqlap jılar Rahila. Jubang'ısı kelmes, o'ytkeni joq endi olar».
19 Hirod o'lgennen keyin, Qudaydın' bir perishtesi Mısırda Yusuptın' tu'sine enip:
20 – Ornın'nan tur da, Na'reste menen anasın alıp, İzrail eline qayt. Sebebi Na'resteni o'ltirmekshi bolg'anlar o'ldi, – dedi.
21 Yusup turıp, Na'reste menen anasın alıp, İzrail eline qayttı.
22 Biraq Yahudiyada Hirodtın' ornına balası Arxelay patsha bolıp otırg'anın esitip, Yusup ol jerge barıwg'a qorqtı. Tu'sinde ayan arqalı eskertilgen ol Galila u'lkesine ketip,
23 Nasıra degen qalag'a ornalastı. Solay etip, «Ol Nasıralı dep ataladı», – dep payg'ambarlardın' aldın ala aytqanları orınlandı.
