Mark 12 bob
1 İysa olarg'a tımsallar menen so'yley basladı: – Bir adam ju'zim bag'ın otırg'ızıp, onı diywal menen qorshaptı ha'm ju'zimnin' suwın sıg'ıwg'a arnalg'an shuqır qazıp, gu'zet minarasın ornatıptı. Son'ınan bag'ın diyxanlarg'a ijarag'a berip, o'zi uzaq jerge ketip qalıptı.
2 Terim ma'wsimi kelgende, ol bag'dın' jemisinen tiyisli u'lesin alıw ushın, diyxanlarg'a o'zinin' bir xızmetshisin jiberipti.
3 Biraq olar xızmetshini uslap alıp sabap, qurı qol qaytarıptı.
4 Ol ja'ne olarg'a basqa xızmetshisin jibergende, onın' basın jarıp, biyabıray qılıptı.
5 Sonda ol ja'ne basqa bir xızmetshisin jibergende, olar onı o'ltiripti. Ol ja'ne de ko'p basqa xızmetshilerin jibergende, geybirewlerin sabap, geybirewlerin o'ltiripti.
6 Endi bir g'ana adam, onın' su'yikli ulı qalıptı. En' aqırında ol: «Ulımdı hu'rmet eter» dep, olarg'a o'z ulın jiberipti.
7 Biraq diyxanlar bir-birine: «Bul – miyrasxor-g'o. Ju'rin'ler, onı o'ltireyik, sonda miyras mu'lki bizlerge qaladı», – desipti.
8 Solay etip, onı uslap alıp o'ltirip, ju'zim bag'ınan sırtqa shıg'arıp taslaptı.
9 Endi ju'zim bag'ının' iyesi ne isleydi? Ol kelip, diyxanlardı joq qıladı da, ju'zim bag'ın basqalarg'a beredi.
10 Sizler mına Muxaddes Jazıwdı oqımag'ansızlar ma: «Qurılısshılardın' kereksiz dep taslag'an tası, U'ydin' mu'yeshinin' tiykarg'ı tası boldı.
11 yemiz qılg'an bul is, Ko'zimizge a'jayıp ko'rindi!»
12 Olar bul tımsaldın' o'zlerine qarsı aytılg'anın bilip, İysanı qolg'a alıwg'a tırıstı. Biraq xalıqtan qorqqanlıqtan Onı qaldırıp, ketip qaldı.
13 Son'ınan olar İysanı so'zinen tutıw ushın, pariseylerdin' ha'm Hirodtın' adamlarının' geybirewlerin Og'an jiberdi.
14 Olar İysag'a kelip: – Ustaz! Bizler Senin' durıs adam ekenin'di ha'm jag'ımpazlıq etpeytug'ının'dı bilemiz. O'ytkeni Sen adamlardın' bet-ju'zine qaramay, Qudaydın' jolın durıs u'yretip otırsan'. Rim patshası-Qaysarg'a salıq to'lew durıs pa yamasa nadurıs pa? To'lewimiz kerek pe yamasa kerek emes pe? – dep soradı.
15 Biraq İysa olardın' eki ju'zliligin bilip: – Meni nege sınap atırsızlar? Mag'an bir dinar a'kelin'ler, ko'reyin, – dedi.
16 Olar alıp kelgende, Ol: – Bunda kimnin' su'wreti bar ha'm kimnin' atı jazılg'an? – dep soradı. Olar: – Rim patshası-Qaysardın', – dedi.
17 Sonda İysa olarg'a juwap berip: – Qaysardın' haqın Qaysarg'a, Qudaydın' haqın Qudayg'a berin'ler, – dedi. Olar Og'an tan' qalıstı.
18 Son'ınan qayta tiriliw joq dewshi saddukeylerdin'* bir neshesi İysag'a kelip:
19 – Ustaz! Muwsa bizlerge: «Eger birewdin' ag'ası balasız o'lip, hayalın qaldırsa, inisi onın' hayalın alıp, o'z ag'asının' urpag'ın dawam ettirsin», – dep jazıp qaldırg'an.
20 Ag'ayinli jeti jigit bar edi. Olardın' birinshisi u'ylenip, izinde bala qaldırmay o'lip ketti.
21 Sol hayaldı ekinshisi alıp, ol da izinde bala qaldırmay o'lip ketti. U'shinshisine de solay boldı.
22 Jeti ag'ayinlinin' hesh qaysısı da izinde bala qaldırmastan o'lip ketti. En' son'ında hayaldın' o'zi de qaytıs boldı.
23 Olar qayta tirilgende, hayal qaysısının' hayalı boladı? Sebebi ol jetewine de hayal bolg'an-g'o, – dep soradı.
24 İysa olarg'a juwap berip: – Sizler Muxaddes Jazıwlardı da, Qudaydın' qu'diretin de bilmegenlikten aljasıp tursızlar.
25 O'ytkeni adamlar o'limnen qayta tirilgende u'ylenbeydi de, turmısqa da shıqpaydı, al aspandag'ı perishteler sıyaqlı boladı.
26 O'lgenlerdin' qayta tiriliwi tuwralı Muwsanın' kitabında, janıp turg'an puta haqqında ayatta, Qudaydın' ne aytqanın oqımag'ansızlar ma? Quday Muwsag'a: «Men – İbrayımnın' Qudayıman, Isaqtın' Qudayıman, Yaqıptın' Qudayıman», – degen-g'o.
27 Quday o'lilerdin' emes, al tirilerdin' Qudayı. Sizler qattı aljasıp tursızlar, – dedi.
28 Diniy mug'allimlerdin' biri olardın' tartısların esitti. İysanın' olarg'a jaqsı juwap bergenin ko'rip, Onnan: – Buyrıqlardın' ishinde en' baslısı qaysı? – dep soradı.
29 İysa og'an: – En' baslı buyrıq bul: «Tın'la, İzrail! Qudayımız bolg'an İyemiz – jalg'ız İyemiz.
30 İyen' bolg'an Qudayın'dı pu'tkil ju'regin', pu'tkil janın', pu'tkil aqıl-oyın' ha'm pu'tkil ku'shin' menen su'y»
31 Ekinshisi mınaday: «O'zin'di su'ygenin' sıyaqlı, janın'dag'ı adamdı da su'y». Bulardan ullı buyrıq joq, – dedi.
32 Diniy mug'allim Og'an: – Awa, Ustaz! «Quday – jalg'ız, Onnan basqa quday joq», – dep durıs ayttın'.
33 Qudaydı pu'tkil kewlin', pu'tkil aqılın', pu'tkil ku'shin' menen su'yiw ha'm o'zin'di su'ygenin' sıyaqlı, janın'dag'ı adamdı da su'yiw – jag'ılg'an ha'mme qurbanlıqlardan ha'm Quday jolına berilgen sadaqalardan artıq, – dedi.
34 İysa onın' aqılg'a say juwap bergenin ko'rip: – Sen Quday Patshalıg'ınan alıs emessen', – dedi. Sonnan son', Og'an soraw beriwge hesh kimnin' batılı barmadı.
35 İysa İbadatxanada adamlarg'a ta'lim berip atırıp: – Qalayınsha diniy mug'allimler Masixtı Dawıttın' Urpag'ı deydi?
36 Dawıttın' o'zi Muxaddes Ruwxtan ilhamlanıp, bılay degen-g'o: «İyem menin' İyeme ayttı: „Dushpanların'dı ayag'ın'nın' astına bastırmag'anımsha, Menin' on' jag'ımda otır!“»
37 Dawıttın' o'zi Onı «İyem» dep atag'an bolsa, Ol qalayınsha onın' Urpag'ı boladı? – dep soradı. Ko'p xalıq Onı quwanısh penen tın'ladı.
38 İysa ta'lim berip: – Diniy mug'allimlerden saq bolın'lar! Olar uzın kiyim kiyip ju'riwdi, bazar maydanlarında o'zlerine sa'lem beriliwin,
39 ma'jilisxanalarda sıylı orında, zıyapatlarda to'rde otırıwdı jaqsı ko'redi.
40 Olar jesir hayallardın' u'ylerin jalmap jutıp, ko'zge ko'riniw ushın uzın duwa etedi. Bunday adamlar en' awır jaza aladı, – dedi.
41 İysa İbadatxanadag'ı sadaqa qutısının' qarsısında xalıqtın' qutıg'a aqsha salıwına qarap otırdı. Baylardın' ko'bisi ko'p aqsha saldı.
42 Sonda bir jarlı jesir hayal kelip, eki tiyin saldı.
43 İysa sha'kirtlerin qasına shaqırıp alıp: – Sizlerge shının aytıp turman: bul jarlı jesir hayal qutıg'a aqsha salg'anlardın' ha'mmesinen ko'p saldı.
44 Sebebi olardın' ha'mmesi o'z baylıqlarınan awısqanın saldı. Al bul hayal jarlı bolsa da, ku'n ko'risine kerekli barlıq aqshasın saldı, – dedi.
